APIRIPI
Nkeethi
1
1 I tiû Paûrû na Timotheo tûkûbwandîkîra baarûa îno, tûrî aruti ngûgî ba Kîrîstû Yiesû. Tûrîbwandîkîra biû antû ba Ngai bûrî Firipi, atongoria beenu na ateetheeria bara bûrî ndeeni ya Kîrîstû Yiesû.2 Ngai Baaba na Mwathani wetû Yiesû Kîrîstû baroobwaa ûtugi na ûkiri.
Gûcookia nkaatho na maromba
3 Magiita monthe rîra mbûririkanaga incookagîria Ngai wakwa nkaatho. 4 Na rîonthe rîra mbûrombagîra, mbûrombagîra bwinthe nkeneete, 5 n'ûntû bwa bûra bûnteetheetie ngûgîîni ya gûtûmîîria ntheto îmbega kuuma ntugû îra bwamîîtîgîîre mwanka îîndî. 6 Ngûgî îra Ngai aanjîîrie ndeeni yenu i ngûgî îmbega. Na ndî na mma Ngai akaathi na mbere n'yo mwanka îthire, rîra Kîrîstû agaacooka.
7 I mbatîîrue kwîgua ûgu îgûrû rîenu bwinthe, n'ûntû i mbwendeete mûno. I bûnteetheetie ngûgîîni îno ya mwanya, îra Ngai ampete nduta. I bwanteethiirie kûrwîrîîra ntheto îmbega twonania n'ya mma na ibûgûnteethia ndî niû îîndî ndî nceera. 8 Ngai naiyî n'ûmma nkwaria inkwenda kûbwona bwinthe n'ûntû i mbwendeete na wendo bwa Kîrîstû Yiesû.
9 Îromba rîakwa rîra nkûbûrombera i rîrî, atî wendo bwenu bûthi na mbere kwingîa, bwîgue bûrî na ûmenyo bunthe, 10 na bûmenye kûthuura bûrûthage mantû mara meega kîrî monthe. Rîru i rîo bûgaatuîka antû baatheru, na batarî na mabîtia mwanka rîra Kîrîstû agaacooka. 11 Na i rîo bûgaatuîka antû ba kûrûthaga mantû maingî meega gûkûrûkîîra kîrî Yiesû Kîrîstû. Bwarûtha ûgu bûkoonania i bûgûtîîya Ngai na i bûkûmûkumia.
Kûthaîkwa gwa Paûrû igwateethiirie ntheto îmbega yatamba
12 Aruayia na aarayia, ndîenda bûmenya mantû monthe mara ndarûthîîrwe imaateethiirie ntheto îmbega yatamba. 13 Acikaarî na antû bara bangî bonthe ba nyomba ya mûnene i baiyî nthaîkîîtwe n'ûntû ndî mûthingati wa Kîrîstû. 14 Na n'ûntû bwa kûthaîkwa gwakwa, eetîgîri baingî i bagîîte ûcamba mûno na batigûkuthûka gûtûmîîria ntheto cia Ngai.
15 I mma antû bamwe batûmagîîria mantû ma Kîrîstû barî na rûriitho na bakîthetanagia. Îndî kûrî bara batûmagîîria n'ûntû bwa wendi bûra barî nabu. 16 Na barûthaga ûgu na wendo, n'ûntû i baiyî i Ngai ampete ngûgî ya kûrwîrîîra ntheto îmbega. 17 Îndî kûrî babu batûmagîîria mantû ma Kîrîstû barî na itûmi bitarî biega. I bo bakwenda kûndeetera thîîna îîndî ndî nceera. 18 Îndî nwîgue barîtûmîîria n'ûntû bwa itûmi biega kana biithûûku, bûbu t'ûntû. Bûra bûrî na gîtûmi n'atî, ntheto cia Kîrîstû nigûtûmîîrua na njîra cionthe. Kwoogu ingûkena na nkaathi na mbere gûkena.
19 N'ûntû bwa maromba meenu na ûteethio bûra buumaga kîrî Kîrundu wa Yiesû Kîrîstû, ndî na mma nkaatharua mbuume nceera. 20 Ndî na wîrîgîîro bûûnene mûno atî, kîrî bûra bunthe ndûthaga, gûtirî rîo nkaarûtha ûntû bwa kûmbîkîra nthoni. Na ûgu i bu nkaraga mbîrîgîîrîîte. Wîrîgîîro bwakwa n'atî, ngaakaraga na ûcamba bwingî mûno îîndî na magiita monthe, mbonanagie na mantû mara ndûthaga bûra Kîrîstû arî ûmûnene, nwîgue ingaatûûra mwoyo kana inkaûragwa. 21 Wegua ngaatûûra mwoyo ngaatûûrîra Kîrîstû. Naka na ngakua nwa baita. 22 Ndaathi na mbere gûtûûra, ûkeegua ndî na kaanya ga kûthi na mbere kûrutîra Mwathani ngûgî. Kwoogu ntithûûra. 23 Kîrî mantû mamu marî maîrî, ntiuga i bûrîkû bwega. Inkwenda gûtigana na ûtûûro bûbû mbîgue ndî amwe na Kîrîstû. Na ûgu i bu bwega mûno. 24 Îndî kwîgua ndî mwoyo ndeeni ya mwîrî kûrî gîtûmi mûno kîrî biû. 25 Na ndî na mma ûgu i bu gûgaakara. Kwoogu, nkeegua ndî amwe naabi bwinthe mbûteetheerie bûkûre, bûkeneere wîtîgio bwenu. 26 Rîra nkauma gûkû mbûye, bûkeegua bûrî na itûmi biiganu bia gûnkeneeraa n'ûntû bwa mantû mara Kîrîstû Yiesû arûthîîte naani.
27 Îndî wana ndaakara ata, bûtikaariganîrueni i gûkaraga mûkarîre ûra ûgaatûma ntheto îmbega ya Kîrîstû îtîîywa. Kwoogu ndaaya kûbwona kana ndaremwa kûûya, ndeenda kwîgua ibûrikîîte wîtîgioni bûgwatanîrîte. Ndeenda kwîgua bûrîrwîrîîra wîtîgio bûra tûrî nabu kuumania na ntheto îmbega bûgwatanîrîte. 28 Bûtikaamakue n'anthû beenu ûntûûni kinya bûrîkû. Ûcamba bwenu i bu bûgaatûma bamenya i bo bakaathirua, biû bwonokue. Na i Ngai akaarûtha ûgu. 29 Ngai atibûthaarimîîte na kaanya ga gwîtîgia Kîrîstû gonka. Abûthaarimîîte kinya na kaanya ga kûnyamaarua n'ûntû bwa Kîrîstû. 30 I bwoneete bûra nnyamaarîîtue bûgana n'ûntû bwa Kîrîstû. Na i bwîgîîtue wana îîndî nwa nkûnyamaarua. Îndî na wana biû ibûkûnyamaarua nkînyamaarua.