Rûthagaani mantû meega
6
1 Aruayia na aarayia, ûmwe wacienu akaaya kûgwa meeyiani, bara bûrî agima gîîkîrundu geriani kûmûteethia acooke kûrûthaga bûra kûbatîîrue. Îndî ingî ti na ûgîti. I mpoora, bûkîmenyagîîra bûtikaaye kûthûngîra magerioni na biû. 2 Twaranagiani mîrigo. Na bwarûthaga ûgu ûkeegua bûkiingia watho bwa Kîrîstû. 3 Ûkaaya kwîgua muntû eebonaga taka arî wa gîtûmi, ûyu i kwîbenia eebenagia, atirî nwa mûthigi. 4 Îndî woora muntû nathime mûkarîre wake we wengwa. Ûkaaya kwîgua ûrî mûkarîre ûmwega, rîru muntû nwa akeneere uu, n'ûntû bwa mantû mara arûthîîte arî we. Îndî t'akîîbuanaanagia na bûra muntû ûngî arûthîîte. 5 Woora muntû akaûrua n'ûntû bwa mûkarîre wake.6 Muntû ûra akûrutanwa rûtheto rwa Ngai nabatîîrue arûmagia mûrutani wake ûra akûmûrutana into biega bionthe bira arî nabio.
7 Bûtikeebenie mana. Muntû atiûmba kweneeria Ngai. Kîra muntû akaanda i kîo agaaketha. 8 Ûra aandaga mantû ma mûtugo wa kîîmuntû, ta uu wa wîyia agaaketha gîkuû. Îndî ûra aandaga mantû ma gîîkîrundu agaaketha ûtûûro bwa tene na tene kuumania na Kîrundu. 9 Tûtikaanoge i kûrûtha mantû meega n'ûntû twaûmîîria tûgaaketha kagiita gaakinya. 10 Kwoogu, rîra tûrî na kaanya tûbatîîrue tûrûthagîra muntû wonthe mantû meega, na mûno mûno, aruayia na aarayia bo barî na wîtîgio bûmwe na bwetû.
Kûthiria baarûa na nkeethi
11 Tacûûbaani bwone bûra mbwandîkîrîte na ntemwa iinene na njara yakwa ningwa.
12 Antû bara bakwenda kûbûkinyîîria bûtaanwa i bara beendaga kwonwa barî beega meethooni ma antû. Na gîtûmi kîra gîgûtûma barûtha ûgu i kîmwe akî. Nakîo i kaingo batanyamaarua n'ûntû bwa mûtharaba wa Kîrîstû. 13 Wana bo bongwa barî bataane woogu, twaka baathîkagîra watho. Barîenda bûtaanwa kaingo beekumagîria biû. 14 Îndî niû gûtirî gîntû ndîîkumîria, tatiga mûtharaba wa Mwathani wetû Yiesû Kîrîstû, n'ûntû niû nûtûmîîte mantû ma nthîgûrû maakua naani ndaakua kîrî mo. 15 Gûtaanwa kana kûrega gûtaanwa t'ûntû. Bûra bûrî gîtûmi i kûgarûka na gûtuîka kîûmbe kîîyerû. 16 Bara bathingataga ûrutani bûbû, ûkiri na kîao birookaraga nabo na bara bonthe barî antû ba Ngai.a
17 Nkîthiria ka mbwîre, muntû atikaanthîînie kaîrî n'ûntû marema mama ndî namo mwîrî ûyû wakwa i makwonania na mma ndî wa Yiesû.
18 Aruayia na aarayia, ûtugi bwa Mwathani wetû Yiesû Kîrîstû bûrookaraga naabi. Aameni.