Mantû ma mûthia mara Paûrû eendaga kwîra Akorintho
13
1 Rîrî îîndî n'îgiita rîakwa rîa mathatû kûûya. Na wa ta bûra *Maandîko Maatheru maugîîte, ûra arî na ntheto na ûra ûngî nwa mwanka oonanie bûra abîtangîrîtue “kûrî na ûkûûyî bwa antû baîrî kana bathatû.” 2 Rîra ndaarî naagu rîa maîrî indakaaniirie bara bonthe beeyîîtie. Ntarî akubî naabi woogu, ka mbîîre bara bangî beeyiirie rîra nkaaya naagu bûrî kaîrî bakoona thîîna înene. 3 Rîru i rîo bûkoona bûra bûkwenda atî, wabu Kîrîstû nagûntûmîra kwaria. Tika akûruta ngûgî kîrî biû atakwîbûmba. Arî na inya. 4 Wana wegua aambirwe mûtharabaani atarî na inya, n'inya ya Ngai îtûmîîte eegua arî mwoyo. Na wana tiû tûtirî na inya wata Kîrîstû bûra aakari, îndî tûgaatûûrania amwe n'we kwa inya ya Ngai kaingo tûmûtûmîkîra na ngûgî îra tûkûruta n'ûntû bwenu.5 Îraitheeni bwingwa. Îgeriani bwone kana bûrî wîtîgioni. Na mma i bwiyî Yiesû Kîrîstû arî ndeeni yenu bunka bûtagwîte kîgerio. 6 Na inkwîrîgîîra bûkoona tiû tûtaagwa. 7 Itûkûromba Ngai bûtikaaye kûrûtha ûntû bûtaagîrîte. Na ti kaingo bwonania itwarutire ngûgî îmbega rîra twarî kwenu, îndî i kaingo bûrûtha bûra kûbatîîrue wana wegua kûrîonekana tiû tûtigwîtîgîîrîka. 8 Gûtirî bu tûrûtha tûrigîîria ntheto ya mma, nwa tûrûthire bûra îkwenda. 9 Tûkenaga rîra tiû tûtarî na inya, biû bûrî n'yo. Itûkûbûrombera bûtuîka agima wîtîgioni. 10 Gîku i kîo gîtûmi gîakwa gîa kûbwandîkîra mbwîra mantû mama kinya ntarî akubî naabi, kaingo rîra nkaaya ntatûmîra watho bûra Mwathani ampete ntakûbwîgua nthoni. Ndeerwe watho bûbû mbûkûria, îndî ti mbwînyangia.
Nkeethi cia mûthia
11 Nkîthiria, aruayia na aarayia, ka mbwîreeni bûtigwe bwega. Cûûgiani na inya bwone bûgûtuîka eetîgîri agima. Rûthagaani ûgu mbûûrîîtie bûrûthage. Îgaguani bûrî na meeciiria mamwe na tûûranagiani na ûkiri. Rîru i rîo Ngai ûra arî wendo na ûkiri akeegua arî amwe naabi.
14 Ûtugi bwa Mwathani Yiesû Kîrîstû, na wendo bwa Ngai, na ngwatanîro ya Kîrundu Ûmûtheru birookaraga naabi bwinthe.