Paûrû na atûmwa bara bangî
2
1 Nyuma ya mîanka îkûmi na îna indacookire ndathi Njerusaremu tûrî na Baranaba na Tito. 2 Kûthi gwakwa kwarî n'ûntû bwa bûra Ngai angwûrîrîte ambonia nthi. Nkûthi twonanire na bara baataragwa barî atongoria bonka, ndabataranîria bwega ntheto îra ntûmagîîria bara batarî Ayaundi. Na gîtûmi gîa kûrûtha ûgu ga nteendaga gûtuîka i ngûgî ya ûtheri ndarutaga. 3 Gûtirî we wa atongoria babu aakinyîîria gûtaanwa wa Tito ûra twarî n'we, n'ûntû aarî Mûngiriki na ataarî ûmûtaane. 4 Îndî kûrî antû bangî beendaga Tito ataanwa. Baarî eetîgîri ba ûrongo. Baayîîte beecinîkîîria gîkundiini gîetû bathigaana kûthaûrwa kûra tûthaûrîîtwe ndeeni ya Kîrîstû Yiesû kaingo batûtuîkithia nkombo ciao. 5 Îndî tûteetîgîîria ûgu beendaga nwa aniini kaingo bûtauma ûmmani bwa ntheto îmbega.6 Gûtirî kîo babu boonekaga taka baarî gîtûmi boongeera ntûmîîriini îra ntûmagîîria (îndî nwîgue baarî ba ûû, gûtirî mûkûûrani kîrî niû n'ûntû Ngai atitûmagîra kîmenyano). 7 I boonire wabu Ngai nambîtîgiirie ntûmîîria ntheto îmbega kîrî antû ba nthîgûrû ira ingî, ta Petûrû bûra aatûmagîîria Ayaundi. 8 Ngai ûra aatûmire Petûrû aruta ngûgî ya ûtûmwa kîrî Ayaundi nwa we aatûmire nduta ngûgî ya ûtûmwa kîrî bara bangî. 9 Na wana Njakubu, Petûrû na Njoana bara boonagwa barî atongoria ba kanica batûkeethia tûrî na Baranaba îrî njîra ya kwonania ngwatanîro, bakwona wabu Ngai nampete ngûgî înu ya mwanya. Twacooka twagwatanîra twauga bo ibarute ngûgî kîrî Ayaundi, naani tûrî na Baranaba tûtûmîîrie antû ba nthîgûrû ira ingî. 10 Bûra baatwîrire tûririkane kûrûtha, i tûririkanage bara batarî nabio. Na wana niû nwabu ndoonaga itwagîrîte kûrûtha.
Paûrû aathetia Petûrû barî Antiokia
11 Îgiita rîmwe Petûrû akûûya Antiokia, indamûtheteerie antûûni n'ûntû kwaria mma naabîtîîtie. 12 Akûûya warîo naarîîyaga irio na eetîgîri bataarî Ayaundi. Îndî Ayaundi bamwe baugaga i Njakubu aabatûmîîte arî Njerusaremu bakûûya, Petûrû eebathûrana na eetîgîri babu n'ûntû naakuthûkaga Ayaundi babu. 13 Na wana Ayaundi bangî baarî Antiokia baarûtha ûgu Petûrû aarûthire, ta eebwithia. Na wana Baranaba mwene i bu aarûthire. 14 Nkwona bataarûthaga bûra kûbatîîrue kûringana na ûmma bûra bûrî nthetooni îmbega, i rîo ndeerîîre Petûrû mbere yao bonthe, “Ûkaaya kwîgua woû ûrî Mûyaundi ûtikûthingata maathana ma Kîîyaundi na ûrîkara ta bara batarî Ayaundi, kûrî na gîtûmi kîrîkû gûkinyîîria bara batarî Ayaundi bo bakara ta Ayaundi?”
15 Tiû tûrî Ayaundi gûciarwa, tûtirî bara batarî Ayaundi, bara tuugaga bo n'eeyia. 16 Na itwiyî kîra gîtûmaga muntû atuîka ûmwagîru. Muntû atuîkaga ûmwagîru eetîgia Yiesû Kîrîstû. T'ûntû bwa kûthingata *watho. Itweetîgiirie Kîrîstû Yiesû, na wîtîgio bwetû kîrî we i bu bwatûtuîkithiirie baagîru. T'ûntû bwa kûthingata watho, n'ûntû kûthingata watho gûtituîkithia muntû ûmwagîru kîrî Ngai. 17 Ûkaaya kwîgua rîra tûgûcûa kwagîrithua ndeeni ya Kîrîstû antû barîtwona tûrî “eeyia” ta bara batarî Ayaundi, i Kîrîstû atûmaga twîyia? Arî buru! 18 Nûkeegua nkîîyia waya kwîgua watho bûra ndaareganire nabu îrî njîra ya gûtuîka ûmwagîru i bu ncookeete kûthingata. 19 Indaathingataga watho. Îndî îîndî ndî ûmûkuû kîrî bu, na i bu bûmbûragîîte kaingo ntûûrîra Ngai. 20 Indaambanîîrue amwe na Kîrîstû mûtharabaani na ndakuyanîria n'we kaingo gûtuîka niû ntirî mwoyo, i Kîrîstû atwîre ndeeni yakwa. Ûtûûro bûbû ndî nabu îîndî, ntwîre na wîtîgio kîrî Mwana wa Ngai ûra aambendire aakua n'ûntû bwakwa. 21 Ntiûmba kûrega ûtugi bwa Ngai. Ûkaaya kwîgua muntû aûmba kwonokua aathingata watho, gûkua gwa Kîrîstû i kwa ûtheri kwarî.