AGARATIA
1
1 I niû Paûrû nkûbwandîkîra, biû eetîgîri ba Garatia. Mwîto wakwa wa gûtuîka mûtûmwa t'wa kuuma kîrî muntû kana gûkûrûkîîra kîrî muntû. Mwîto wakwa n'wa kuuma kîrî Yiesû Kîrîstû na Îthe Ngai ûra aamûriûkiirie. 2 Ndîbwandîkîra tûrî amwe na aruayia bara bangî bonthe ndeeni ya Kîrîstû.3 Ngai Baaba wetû na Mwathani Yiesû Kîrîstû baroobwaa ûtugi na ûkiri. 4 I kaingo atûthaûra tuuma ûthûûkuuni bwa nthîgûrû îno, Yiesû neepeyanire n'ûntû bwa meeyia meetû kûringana na bûra Ngai Baaba wetû eendeete. 5 Ngai arookumua tene na tene. Aameni.
Paûrû agîkaania Agaratia
6 Ibûkûndigaria mûno! N'ata bûûmba kûgarûkanga na mpwî ûgu bûgatiga ûra abwîtîîte ûtugiini bwa Kîrîstû, bûkaanjîîria gwîtîgîîria ntheto îngî îtarî ya mma? 7 Kwaria mma gûtirî ntheto îngî îmbega. N'antû bamwe bakwenda kûbûreetera thîîna bakîenda kûgarûra ntheto îmbega ya Kîrîstû. 8 Îndî ka mbwîreeni, nwîgue n'ûmwe wetû tûrî atûmwa, kana i mûraîka kuuma îgûrû akûbûtûmîîria ntheto îngî îtarî îra twabûtûmîîrie kuuma mbere, ûyu n'ûmûrîrîke i Ngai! 9 Ka mbwîreeni kaîrî bûra twabwîrire atî, muntû akaaya kûbûtûmîîria ntheto îngî îtarî îra bwarutanirwe, ûyu n'ûmûrume i Ngai!
10 Î rîo rî, ga nkuuga ûgu nkîenda mbendwa n'antû kana i Ngai? Ka ngûcûûgia gûkenia antû? Arî. Ûkaaya kwîgua n'antû nkwenda gûkenia ûtiîgua ndî mûruti ngûgî wa Kîrîstû.
Bûra Paûrû eetangirwe aatuîka mûtûmwa
11 Ndîenda bûmenya ntheto îno îmbega ngûtûmîîria t'ya kuuma kîrî muntû. 12 Na ntaarutanwa yo i muntû. I Yiesû Kîrîstû aangwûrîîre yo.
13 I bwîgîîtue bûra mûtûûrîre wakwa wakari rîra ndathingataga wîthîre bwa Kîîyaundi, na bûra ndanyamaaragia athingati ba Ngai ntakûbeegua kîao ngîcûûgia kûthiria kanica cwe. 14 Gûtirî we wa taarîetû agîncinda kûthingata wîthîre bwa Kîîyaundi. Ndarî mûthingati wengwa wa moorutani ma akûrû beetû. 15 N'ûtugi bwa Ngai bwatûmire anthuura kinya mbere ya nciarwa na aambîta mmûrutîra ngûgî. Rîra aabangire 16 kûngwûrîra mmenya Mwana wake kaingo mmûtûmîîria kîrî bara batarî Ayaundi, ntaathi kwîra muntû antaûrîre, 17 kana nthi Njerusaremu kûromba ûkûrû kîrî bara baarî bagûtuîka atûmwa mbere yakwa. Ndaathiire Arîbia na nyumaani ndacooka Ndamasiki kaîrî.
18 Mîanka îthatû îkûthira, indathiire Njerusaremu kûriûngîra Petûrû na twakarire n'we ntugû îkûmi na îtaano. 19 Na ntugû înu ndaarî Njerusaremu i Petûrû na Njakubu mûruagina wa Mwathani twonanire nabo bonka. Tûtoonana na atûmwa bara bangî. 20 Mantû mama monthe nkûbwîra i ma mma na Ngai i mûkûûyî, mbîtîgiani. 21 Nkuuma Njerusaremu, indacookire ndathi Aramu na Sirîsia. 22 Kagiita gaku twaka eetîgîri ba gîteere kîa Njundea baarî bakûmbona ningwa. 23 N'antû beegîîtue bakîngweta bakiugaga, “Muntû ûra aratûnyamaaragia îîndî nagûtûmîîria wîtîgio bûra aracûûgagia kwînyangia!” 24 Baakumia Ngai n'ûntû bwa kûgarûka gwakwa.