Mwothi wa kwaa eetîgîri ba Njerusaremu
16
1 Îîndî ka ngwete mantû ma kweyaga antû ba Ngai mwothi. Bûbatîîrue bûrûthaga ta bûra ndeerire makanica ma Garatia marûthage. 2 Wa kîra ntugû ya mbere ya kwanjîîria kiumia, wa kîra ûmwe wacienu nabatîîrue aiga mbia igana ûna bantû kûringana na bûra athaarimîîtwe bûgana. Ciaigeeni irî cia mwothi ûyu ndabûgwetera kaingo rîra nkaaya ciîgua i rîo na tene. 3 Ndaaya ngaatûma bara bûkoona baagîrîte baire mwothi wenu Njerusaremu. Nkabaandîkîra baarûa cia kûbamenyithania kîrî bo. 4 Na twona bûrî bwega na niû nthi, nwa tûthiiyanie nabo.Mîgambo ya Paûrû ya mûthia
5 Mbangîîte mbûyîîre Macendonia. Kwoogu nkaaya kwenu mbumîîte noogo. 6 Kwaûmbîka ngaakarakaranga kwenu wana kinya kagiita ga mpîo konthe. Na rîra ngaakara kûthi wa naara ûkeegua nthiîte, nwa bûmbumagarie. 7 Ntikwenda mbûya kûbwona nkûrûkanîîtie. Ndîenda nkara kwenu kagiita kaaganu, wegua Mwathani ageetîgîîria. 8 Îndî ngaakara naaga Efeso mwanka kagiita ga kîatho gîa ntugû ya *Pentekosti gîkinye. 9 Inkwona mwanya wa kûruta ngûgî inyingî naaga, wana kinya ûkeegua i baingî bakûrûa naani.
10 Timotheo akaaya kûûya naagu bwone bûkûmûgwata ûgeni bwega aaganîrwa kwîgua arî amwe naabi, n'ûntû i Mwathani akûrutîra ngûgî ta bûra na niû nkûmûrutîra. 11 Bûtikaareke muntû amûmeneeria. Aakara gûcooka bûmuumagarieni na ûkiri acooke kaîrî kîrî niû. Ndîîrîgîîra aayania na aruayia babu barî naagu.
12 Îgûrû rîa mûruayia Apooras, ndamûkinyîîrie ndamwîra aayanie na aruayia bara baayîîte, îndî atireenda kûûya îîndî. Akaaya rîra akeegua arî na kaanya.
13 Îkaragaani bwîmenyeereete. Karagaani bwîrikîîtie wîtîgioni bwenu, bûrî na kûûmîîria na bûrî na inya. 14 Bunthe bûra bûkaarûthaga, bûbatîîrue bûburûthaga bûrî na wendo.
15 I bwiyî Sitefanas na antû ba mûciî wake i bo antû ba mbere nthîgûrû ya Akaaya gûtuîka eetîgîri, na i beerutîîte kûrutîra antû ba Ngai ngûgî. Ndîenda kûbwîra, aruayia na aarayia, 16 bwîtîgagîîrie bûgaatongoragîîrua n'antû ta baba na muntû wonthe ûra arutanagîria nabo ngûgî îno îrî inya ûûgû.
17 I nkeneete mûno n'ûntû Sitefanasi, Botunatas, na Akaikas ibarakinyire. I bo baingîîte kaanya keenu. 18 I baambîkîrîte wîru bûûnene mûno ta bûra na biû baabwîkîîre. Bathûkagieni barî antû ba gîtûmi.
Nkeethi cia mûthia
19 Bûgûkeethua i makanica ma gîteere gîa Îcia. Akuira barî na Pirisiira, na eetîgîri bara barîîkanaga kwao bakûbûkeethia mûno riîtwaani rîa Mwathani. 20 Aruayia na aarayia bara barî naaga bonthe wana bo bakûbûkeethia. Keethanagiani na wendo bwa eetîgîri.
21 I niû Paûrû ndî ningwa mbwandîkîrîte nkeethi ino na njara ciakwa ningwa.
22 Ûkaaya kwîgua kûrî na muntû ateendeete Mwathani, ûyu n'ûmûrume i Ngai. Mwathani arooya na mpwî.