7
1 Eendwa, n'ûntû bwa mawîrane mama Ngai atwete, ga twîtherieni kuumania na ûntû bunthe bûra bûûmba gûtûma mîîrî yetû kana mîoyo yetû îrûtha meeyia. Ga twîtherieni buru tûkarage tûkuthûkîîte Ngai.Gîkeno gîa Paûrû
2 Twîtîgîreeni bûrî na wendo. Gûtirî we twabîtîria kana tûbîtithia njîra. Na gûtirî we twatûmîra bûra gûtaagîrîte. 3 Na kuuga ûgu ti kuuga ga nkûbûgiitîra îgamba. Wa ta bûra mbwîrire i tûbwendeete mûno, nwa tûtûûre kana tûgakua naabi. 4 Inkûbwîtîgia mûno na nwa ndîkumîrie biû. Ibûmbûmagîîria mûno nkeegua nkeneete mûno mathîînaani mara monthe tûrî namo.
5 Rîra twayire Macendonia tûtaanogoka i mathîîna mara maatûthiûrûkîîte nteere cionthe. Anthû beetû baatûkarariirie twamaka. 6 Îndî Ngai ûra aûmagîîria bara barî thîînaani naatûûmîîrie aatûma Tito aaya. 7 Kûmûûmîîria kûra bwamûûmîîrie kinya ku igwatûûmîîrie. Naatwîrire i bûkwenda kûmbona mûno na bûrî na kîeba n'ûntû bwa bûra gwakarîkire. Na kinya naatwîrire bûra bûrî na mwoyo wa kwenda gûnteethia ndeegua ndakena mûno.
8 Wana kinya ûkeegua baarûa îra ndaabwandîkîîre nîatûmire bûgwatwa i kîeba, ntikwona ndî na mabîtia kûmîandîka. Mbereeni ndaroonaga maarî mabîtia kûbwandîkîra yo n'ûntû nîabûgwatithiirie kîeba gîa kagiita gaakai. 9 Îndî îîndî ndîîgua nkeneete mûno. T'ûntû bwa bûra baarûa yakwa yabûgwatithiirie kîeba, îndî n'ûntû bwa kwîgua kîeba kîra kîabûgwatire i gîatûmire bwîrira meeyia meenu. I Ngai aatûmîîre kîeba. Kwoogu tiû gûtirî bu twabûtonya nabu. 10 Kîeba kîra Ngai atûmagîra kîreetaga kwîrira kwa meeyia kûra gûtûmaga muntû oonokua. Na gûtirî mabîtia marî agu! Îndî kîeba gîa kuumania na mantû ma kîînthîgûrû kîreetaga gîkuû. 11 Ndîenda bûmenya baita ya Ngai gûtûmîra kîeba kîrî biû. Îîndî bûrî na wîru nkûrûki, i bûkwenda kwîtheteera, na i gîatûmire bwathûûra bwakuthûka. Kîeba gîku i gîatûmire bwenda kûmbona mûno na bûgîa wîru. Na i gîatûmire bwona gûkûrûthwa bûra kûbatîîrue. I bwonanîîtie bûtirî na mabîtia mantûûni monthe maakoneetie ûntû bûbû. 12 Ntaabwandîkîra baarûa îra n'ûntû bwa ûra aabîtîîtie kana n'ûntû bwa ûra aabîtîrîtue. Ndaandîkire yo kûbûmenyithia bwega, Ngai akîonaga, bûra bwîrutîîte bûgana n'ûntû bwetû. 13 Na gîku i kîo gîatûmire tûûmîîria.
Ti kûûmîîria gunka twaûmîîrie. Wana gûkena i twakenire na inya mûno tûkwona bûra Tito aakeneete bûgana, n'ûntû bwa bûra bwinthe bwatûmire nkoro yake îîgua bwega. 14 I ndeerire Tito bûra bûnkeneetie. Na i bwonanîîtie wabu i nkeneete. Bûra bunthe twabwîrire n'ûmma. Na i bwonanîîtie mantû mara twerire Tito wabu i ma mma. 15 Na kwoogu kûbwenda kûra abwendeete ikwongeerekeete, aaririkana bûra bwinthe bwendeete kwathîka. Bwamûthûkiirie na gîtîîyo kîînene mûno. 16 Ingûkena mûno n'ûntû inkûbwîtîgia kûrû.