6
1 Tûrutaga ngûgî na Ngai. Na kwoogu tûtikwenda bûreka ûtugi bûra aabwere bûtuîka bwa ûtheri. 2 Ngai augîîte,“Ndabwîgiirue kagiita kara kaagîrîîte
ndabûteethia ntugû ya kwonoka.”
Ga nkûbwîra, “kagiita kara kaagîrîîte” n'îndî, na “ntugû ya kwonoka” n'îndî.
Kûnyamaarua kûra Paûrû aanyamaarîîtue
3 Tûtikwenda ngûgî yetû yonekana îrî na mabîtia. Kwoogu i tûcûûgagia mûno kwona gûtirî muntû tûreekîîra kîrigîîria. 4 Mantûûni monthe mara tûrûthaga itwonanagia mûkarîre wetû n'ûmwega na tûrî aruti ngûgî ba Mwathani. Ûgu i bu mûkarîre wetû ûkari mathîînaani maingî ma mîthemba îmingî mara tûûmagîîria. 5 Tûturagwa na tûkaingîrwa nceera, na wana gîtuma tûraûkîrua n'antû. Tûrutaga ngûgî na inya rîmwe tûtakwona toro na rîngî tûtarîîte. 6 Itûkwonania tûrî aruti ngûgî ba Ngai n'ûntû bwa ûkembu bwetû, ûmenyo, kûûmîîria, kûbua kûra tûbuîte, Kîrundu Ûmûtheru ûra arutaga ngûgî arî ndeeni yetû, na n'ûntû bwa wendo bwa mma bûra tûrî nabu. 7 Tûrutanaga antû ûmma na tûrî na inya ya Ngai. Tûtûmagîra wagîru kwîrwîrîîra mbarî cionthe. 8 Kûrî batweyaga gîtîîyo na kûrî batûmenagîîria. Kûrî batûrumaga na kûrî batûkumagia. Na kûrî bo baugaga tûrî arongo, îndî twaragia ûmma. 9 Twonagwa tûrî ageni, îndî twiyîkeene mûno. Tûkari ta antû bagûkua, îndî tûtigûkua. Na wana wegua i tûnyamaaragua, tûtiûragagwa. 10 Tûrî na kîeba, îndî rîonthe itûkenaga. Tûrî nkîa, îndî itûtûmîîte baingî baatonga wîtîgio. Gûtirî kîo tûrî, îndî ûmma n'atî bionthe i bietû.
11 Akorintho, tûbwîrîîte mantû gûtarî bu tûkûbwitha na tûbwendeete kûthiria. 12 Tiû tûtitigîîte kûbwenda, i biû bûtigîîte gûtwenda. 13 Ndîaria naabi ta aana baakwa bongwa nkwaria nabo. Rûthaani ûgu tûrûthîîte, bûtwende na biû ta bûra tûbwendeete!
I tiû Nyomba ya Ngai ûra atûûraga mwoyo
14 Bûtikaagwatane na bara bateetîgîîtie. N'ata wagîru bûûmba gûtuîka mûnyaanya wa ûthûûku? Werû bwengîrana na mwindu? 15 N'ata Kîrîstû na Berio, ta we Nkoma, baûmba kwîgua barî na ngwatanîro? N'irîkû mwîtîgîri aûmba kwaria na muntû ateetîgîîtie? 16 Nyomba ya Ngai yaûmba gûtuma nthungurumi na mîbuanaano? Tiû, i tiû Nyomba ya Ngai ûra atûûraga mwoyo. I Ngai augire,
“Ngaatûûra kîrî antû baakwa na nkarage nabo.
Nkeegua ndî Ngai wao, nabo barî antû baakwa.”
17 “Kwoogu Mwathani ariuga, ‘Umaani kîrî bo, bwîbathûre.
Wegua bûtiitonga gîntû kîrî na mûgiro, nkabwîtîgîra.’ ”
18 “Nkeegua ndî abaagu, naabi bûrî aana baakwa,
ba arûme na ba aarî.
Ûgu i bu Mwathani Mwene Inya augîîte.”