Mîîrî îngî
5
1 Mîîrî yetû îkari ta mîciî îra tûtûûraga gûkû nthîgûrû. Itwiyî rîra mîîrî yetû îkoomboranua tûrî na îngî îgûrû îtarî ya gwakwa na njara cia antû kûra tûgaatûûra tene na tene. 2 Kagiitaani gaka tûtwîre mûciî ûyû itûkiiaga n'ûntû twendaga gûtûûra mîciî ya îgûrû. 3 Tûtiaga a gûtûûra n'ûntû tûgeekîrwa yo. 4 Kagiitaani gaka tûrî mwîrîîni ûyû tûkiiaga i mûrigo ûra tûrî na uu. Tika twendaga twîgua tûtarî na mwîrî, îndî ga twendaga twîgua tûrî na ûngî kaingo kaanya ka ûyû ûra ûkuyaga kathûkua n'ûra ûtûûraga tene na tene. 5 Gîku i kîo gîgûtûma Ngai atûthuuranîra, na natwete Kîrundu kwonania wabu i bu akaarûtha.6 Kwoogu tiû rîonthe twîgagua tûrî na kûûmîîria. Itwiyî kagiitaani gaka tûrî mwîrîîni ûyû, tûtitûûraga kûra Mwathani atûûraga. 7 Tûtûîrue i wîtîgio ti kwona. 8 I ntûma tûrî na kûûmîîria. Twenda mûno mûno kuuma mwîrîîni ûyû, ûkeegua tûrî mûciî amwe na Mwathani. 9 Îndî nwîgue tûrî mûciî amwe na Mwathani kana tûrî gûkû mûciî ûyû, mworooto wetû i gûkenia Mwathani. 10 Nwa mwanka twinthe tûkaarûngama mbere ya Kîrîstû atûgiitîre îgamba. Na woora ûmwe wacietû akaagiitîrwa bûra kûbatîîrue, kûringana na mantû mara twarorûtha tûrî mwîrîîni ûyû wa kîînthîgûrû, meega kana maathûûku.
Kûreeta antû kîrî Ngai
11 Itwiyî gûkuthûka Mwathani i ta kuuga ata. Na i ntûma tûcûûgagia na inya kûreeta antû bara bangî kîrî we. Ngai naiyî bwega bûra tûkari. Inkwîrîgîîra wana biû i bûkûmenya na nkoro cienu bûra tûkari. 12 Tika tûgûcûûgia kaîrî kûbwonia bûra tûrî antû beega. Ga tûkwenda kûbwonia gîtûmi kîenu gûtûkeneera,a kaingo bwîgagua bûrî na bwa kwîra bara beekumagîria mantû mara moonagwa, bantû a beekumîria bûra bûrî nkorooni. 13 Wegua bûrîona taka tûthûûkîîte biongo, tûthûûkîîte bio n'ûntû bwa Ngai. Na wegua itûkûthûgaania bwega, i biû tûkûthûgaanîria. 14 Tûtongoragîîrua i wendo bwa Kîrîstû bûra arî kîrî tiû n'ûntû itwiyî n'we aakuîrîîre antû bonthe gwatuîka i taka antû bonthe baakuire. 15 Kîrîstû aakuîrîîre antû bonthe kaingo bara barî mwoyo batigaatûûre n'ûntû bwa mantû maao bongwa, îndî i batûûre kûrutîra ngûgî ûra aabakuîrîîre na aariûka.
16 Îgiitaani rîrî tûtithûgaanagîria antû ta bûra antû ba nthîgûrû babathûgaanagîria. Tene twathûgaanagîria Kîrîstû ta bûra antû ba nthîgûrû bamûthûgaanagîria. Îndî îîndî tûtimûthûgaanagîria ûgu. 17 Muntû akeegua arî ndeeni ya Kîrîstû atuîkaga kîûmbe kîîyerû. Mantû mara makûrû imathiraga akeerûua kûrû. 18 Mantû mamu monthe maumanagia na Ngai. Ngai aatûmîîre Kîrîstû aatûma tûtuma ûnyanya n'we na tûrî atûmwa atwa ngûgî ya kwîraga antû bûra baûmba gûtuma ûnyanya n'we. 19 Ngai aatumire ûnyanya na antû ndeeni ya Kîrîstû atagûtara meeyia maao. Na natwete ngûgî ya gûtambia ntûmîîri îno ya ûnyanya. 20 Kwoogu ga tûtûmîîtwe i Ngai bantû a Kîrîstû. I taka Ngai agûtûtûmîra kûbwîta arî we wengwa. Itû tûkûbwereka tûrî kaanyaani ga Kîrîstû, tumaani ûnyanya na Ngai. 21 Kîrîstû ataarî na meeyia. Îndî Ngai aamûtuîkithiirie kîgongwana kîa meeyia n'ûntû bwetû kaingo ndeeni yake twîgua tûrî baagîru kîrî Ngai.