Kûrîa irio birutîrîtwe ngai cia ûrongo
8
1 Îîndî ga twarîîrie irio bira birutîrîtwe ngai cia ûrongo. N'ûmma “Woora muntû arî ûmenyo.” Na ûmenyo bwaûmba gûtûma muntû agîa wîkumia, îndî wendo i bûtûmaga antû bagîa wîru. 2 Muntû akoona taka aiyî ûntû bûna, muntû ûyu gûtirî bu aiyî bûra akûthûgaania. 3 Îndî muntû ûra eendaga Ngai naiyîîwe i Ngai.4 Ka mbuge ûûgû îgûrû rîa irio bira birutîrîtwe ngai cia ûrongo. Itwiyî atî, ngai ya ûrongo ti gîntû muntû auga i gîntû kîna nthîgûrû îno. Na itwiyî Ngai n'ûmwe, gûtirî ûngî. 5 N'into biingî antû beetaga ngai. Îndî amwe na kwîgua kûrî na “ngai” na “aathani” baingî, 6 kîrî tiû Ngai n'ûmwe, ta we Îthe wa bonthe. N'we kaumo ka bionthe na n'we atûtûîrie. Na kûrî Mwathani ûmwe, ta we Yiesû Kîrîstû. Into bionthe biaûmbirwe gûkûrûkîîra kîrî we na tûrî na mwoyo gûkûrûkîîra kîrî we.
7 Îndî eetîgîri bamwe bûtiiyî ûmma bûbu. Antû bamwe boonaga ngai cia ûrongo ta cia mma. Kwoogu baarîa irio bira birutîrîtwe cio, bathûgaanagia gûku i kûromba ngai cia mma. Na n'ûntû bwa kûnyiîrwa i gûtaûkîrwa ûntûûni bûbû, babirîa nkorooni ciao beegagua bakûrûtha ûntû bûtaagîrîte. 8 Irio bitiûmba gûtûma tûthiyanga akubî na Ngai. Gûtirî kîo twonaga twarîa na gûtirî kîo twagaga tûtarîîte.
9 Îmenyeeraani bûtigaatûme bara batarî na wîtîgio bûûganu baaya kûthûngîra meeyiani kuumania na bûra bwiyî atî, nwa bûrûthe bûra bûkeenda ûntûûni bûbû. 10 Nwa bwîgue bûrî na ûmenyo bûkarîa irio nyomba ya ngai ya ûrongo. Îndî mwîtîgîri atarî na wîtîgio bûûganu akoona bûkîrûtha ûgu, akauga wana we kaarîe bio ta biû, îndî nkorooni yake akîîgagua ûntû bûbu akûrûtha bûtiagîrîte. 11 Gûkarîkîîte ûgu, i bûgaatûma mûruanyûkwe ûyu Kîrîstû aakwire n'ûntû bwake kana mwaranyûkwe ûyu atarî na wîtîgio bûûganu abîtia kuumania na “ûmenyo” bwenu! 12 Bûkaaya gûtûma mûruanyûkwe kana mwaranyûkwe arûtha ûntû akwîgua nkorooni yake ti bwega kûburûtha, gûku i kûmwîyîria, na i Kîrîstû bweyîria. 13 Kwoogu ûkaaya kwîgua irio bira ndîyaga bitûmaga mûruayia kana mwarayia ataratara wîtîgioni, ntibirîa kaîrî rî kana rî, kaingo ntatûma bataratara wîtîgioni.