1 AKORINTHO
Nkeethi
1
1 I niû Paûrû nkûbwandîkîra tûrî na mûruayia wetû Sosithenes. Ndeetirwe ntuîka mûtûmwa wa Kîrîstû Yiesû kûringana na wendi bwa Ngai.2 Tûrîbwandîkîra biû eetîgîri ba kanica ya Ngai ya Korintho, biû bûtuîkithîîtue antû baatheru ndeeni ya Kîrîstû Yiesû. Bwîtîîtwe bûtuîka antû ba Ngai amwe na bonthe bara gûntû kunthe beetîgîrîte Yiesû Kîrîstû aatuîka Mwathani wao. N'we Mwathani wao na wetû.
3 Ngai Baaba wetû na Mwathani Yiesû Kîrîstû baroobwaa ûtugi na ûkiri.
Paûrû agîcookeria Ngai nkaatho
4 Incookagîria Ngai nkaatho rîonthe n'ûntû bwenu, n'ûntû bwa ûtugi bûra aabûtugire nabu ndeeni ya Kîrîstû Yiesû. 5 Kwîgua bûrî ndeeni ya Kîrîstû îgûtûmîîte bûtongua na njîra inyingî. Bûtongeetue na rwaria na ûmenyo. 6 Ûgu i ta kwonania ntûmîîri yetû îra tûbûtûmagîîria îgûrû rîa Kîrîstû n'ya mma. 7 Kwoogu gûtirî kîthaarimo bûkwaga îîndî kuuma kîrî Ngai wabweteereete kûûya kwa Mwathani wetû Yiesû Kîrîstû. 8 Ngai agaatûma bûkaraga bûrikîîte mwanka ntugû ya mûthia, kaingo bwîgua bûrî na riîtwa rîega rîra Mwathani wetû Yiesû Kîrîstû akaaya kaîrî. 9 We i mwîtîgua ûra aabwîtire bwîgua bûrî na ngwatanîro na Mwana wake, Yiesû Kîrîstû Mwathani wetû.
Gûtarî na ngwatanîro îmwe kanicaani
10 Aruayia na aarayia, kwa riîtwa rîa Mwathani wetû Yiesû Kîrîstû ndîbwîra bûgwatanagîre bwinthe bûtakwathûkana. Karagaani bûrî gîntû kîmwe, bûrî na meeciiria mamwe na mworooto ûmwe. 11 Aruayia na aarayia, i mbîîrîîtwe n'antû ba Kiroe atî bûrîkara bûkîthetanagia. 12 Bûra nkuuga n'atî bamwe beenu baugaga, “Tiû tûrî ba Paûrû,” bangî bakauga, “Tiû tûrî ba Apooras,” bangî nabo bakauga, “Tiû tûrî ba Kefas,” na bangî bakauga, “Tiû tûrî ba Kîrîstû.”
13 Kîrîstû aûmba kûgaanua? I Paûrû aambirwe mûtharabaani n'ûntû bwenu? Kana ka bwabaatithiirue riîtwaani rîa Paûrû? 14 Ingûcookeria Ngai nkaatho n'ûntû bwa kwîgua gûtirî we wacienu ndabaatithia, tatiga Kirisipas na Gayas. 15 Kwoogu gûtirî we aûmba kuuga aabaatithiirue riîtwaani rîakwa. 16 Kaîrî indabaatithiirie Sitefanasi na antû baake, na nkîthûgaania gûtirî ûngî ndabaatithia tatiga babu bonka. 17 Kîrîstû ataantûma mbaatithanagia, îndî i ntûmîîria ntheto îmbega, na ti na mîgambo ya ûûme bwa kîîmuntû mûtharaba wa Kîrîstû ûûya kwaga inya.
Kîrîstû n'we ûûme bwa Ngai
18 Bara baûrîîte boonaga ntûmîîri ya gîkuû gîa Kîrîstû mûtharabaani îrî waa. Îndî tiû bara twonokeetue twonaga n'inya ya Ngai. 19 *Maandîkooni Maatheru kwandîkîîtwe,
“Nkeenyangia ûûme bwa bara baûme,
ngaatuîkithia gûciûka kwa bara bathoomu kwa mana.”
20 Ûra îîndî mûûme n'ûû? Ûra îîndî mûthoomu n'ûû? Ûra îîndî aiyî ûgambi nthîgûrû îno n'ûû? Anga Ngai ationanîîtie ûûme bwa kîînthîgûrû i waa? 21 Ngai aatûmîîre ûûme bwake gwatuîka antû ba nthîgûrû batiûmba kûmûmenya batûmîrîte ûûme bwao. Aabangire akoonokagia bara bageetîgagia baatûmîîrua ûntû bûra bara barî ba nthîgûrû boonaga bûrî waa. 22 Ayaundi beendaga kwona biama kaingo beetîgia. Angiriki nabo bacûaga ûûme. 23 Îndî tiû tûtûmagîîria Kîrîstû ûra aambirwe mûtharabaani, ntûmîîri îra Ayaundi bateendaga kwîgua, îra Angiriki baugaga i waa. 24 Kîrî bara Ngai eetîîte, nwîgue n'Ayaundi kana i bara batarî Ayaundi, Kîrîstû n'we inya na ûûme bwa Ngai. 25 Bûra antû boonaga bûrî waa bwa Ngai, i bûkûrûkîîte ûûme bwa antû. Na bûra antû boonaga taka bûrema Ngai i bûkûrûkîîte bûra antû baûmba kûrûtha.
26 Aruayia na aarayia, ririkanagaani bûra bwakari rîra Ngai aabwîtire. Ti baingî beenu bwarî baûme bûkîonwa n'antû ba nthîgûrû. Na ti baingî bwarî bûkîûmba kûrûtha ûntû bûkwonekana n'antû na ti baingî bwarî ba gîtûmi. 27 Ngai aathuurire bara antû ba nthîgûrû boonaga ta biaa kaingo bara baûme baconoka. Ngai aathuurire bara bataûmba kûrûtha ûntû kaingo bara baûmba kûrûtha ûntû baconoka. 28 Ngai aathuurire bara batarî gîtûmi na bamenagîîrua gûkû nthîgûrû, bara boonagwa barî ba mana, kaingo atuîkithia bara antû ba nthîgûrû boonaga barî ba gîtûmi ba mana. 29 Kwoogu gûtirî we eekumîria Ngai. 30 I Ngai aatûmire bwîgua bûrî ndeeni ya Kîrîstû Yiesû. N'we aatuîkithiirie Kîrîstû ûûme bwetû, ta bu wagîru, ûtheru bwa nkoro na ûkûûri kuuma meeyiani. 31 Kwoogu, wa ta bûra kwandîkîîtwe *Maandîkooni Maatheru, “Ûra eekumagia neekumie na ûntû bûra Mwathani arûthîîte.”