Tûrî Marita
28
1 Tûgûkinya rûteere tûrî mwoyo twinthe twaya kûmenya gîcîgîîrio gîku gîetagwa Marita. 2 Antû ba Mûrita batûgwata ûgeni twinthe bwega mûno. Batûbuîra mwanki n'ûntû i kwauraga na i kwarî na mpîo. 3 Paûrû aarûma nkû. Agîîkîra mwankiini njoka yamongooroka ku n'ûntû bwa mûrugutîra, yamûrûma njara yakara îcuncuuri. 4 Antû ba gîcîgîîrio gîku bakwona njoka îcuncuuri njara ya Paûrû, beerana, “Na mma muntû ûyû i mûûragani. Wana wegua noonokire kûûra na îria, ngai itireetîgîîria atûûra mwoyo.” 5 Paûrû aaburunca njoka înu yamûrûmûka, yagwa mwankiini, na gûtirî bu aakara. 6 Antû babu baakara beeteereete boona Paûrû akiimba kana agîturana nthîgûrû akua. Bagweteera îgiita mma wabatoona agîkara nwa ata, baagarûka mathûgaania. Bauga, “Arî, muntû ûyû i ngai.”7 Akubî na agu twarî i kwarî na mûnda wa mûnene wa gîcîgîîrio gîku. Mûnene ûyu eetagwa Pubirias. Atûgwata ûgeni twakara gwake ntugû ithatû tûkîmenyagîîrwa bwega mûno. 8 Îthe wa mûnene ûyu naamaami ûrîrî aayîîtue kûbîîyanîra kwa mwîrî na rwaro rwa nthakame. Paûrû aathi gûku aamaami amûrombera amwaigîîrîîte njara, amworia. 9 Gûgûkarîka ûgu, bara bangî baayîîtue gîcîgîîrioni gîku baaya kîrî Paûrû abooria. 10 Antû ba gîcîgîîrio gîku ibaatûtîîyîîte mûno. Kagiita geetû ga kûthi gagûkinya, batwaa into biingî bira twarî na ûbatu bwa bio.
Twakinya Rooma
11 Nyuma ya mîeri îthatû twatwa meeri îngî ya kuuma Aregisandiria. Yarî na mîbuanaano ya ngai ba maatha beetagwa Kastas na Porakisi. Yakarîîte agu yeteereete kagiita ga mpîo gakûrûka. 12 Tûkuuma agu twathi twakinya taûni yeetagwa Sairakius, twakara oogo ntugû ithatû. 13 Twauma agu twathi mbere na rûgendo twakinya taûni yeetagwa Regiamu. Rûûni rwa ntugû înu, i kwarî na ruuo rwabuutanaga ruumîîte bwa njara ya ûmotho. Twaûmba kûthi mwanka aûkeeni twakinya taûni yeetagwa Putiori. 14 Tweethîra eetîgîri oogo batwîra tûkarakarange nabo kiumia kîmwe. Rîru twathi twakinya Rooma. 15 Eetîgîri ba Rooma i beegîîtue tûkaaya. Kwoogu ibaatûthagaanîîte. Bamwe baatweteereete bantû antû baarîîkanaga eetagwa Boromu ya Apiûs. Na bara bangî baatweteereete bantû eetagwa “Nyomba Ithatû cia Ageni.” Paûrû akwona eetîgîri babu aacookeria Ngai nkaatho. Eegua aagîa wîru. 16 Tûgûkinya Rooma, Paûrû eetîgîîrua akara nyomba yake wenka. Îndî naarî na mûcikaarî wa kûmûkaria.
Paûrû aatûmîîria Rooma
17 Nyuma ya ntugû ithatû, Paûrû eeta atongoria ba Kîîyaundi mûceemanio. Bakwîthîrana abeera, “Antû beetû, amwe na kwîgua gûtirî mabîtia ndarûthîrîte antû beetû kana mbuna kîîwîthîre kîa biûyûûyû bietû, ndaagwatirwe ndathaîkwa Njerusaremu ndanenkanîrwa kîrî Arooma. 18 Arooma bakûngambithia i beendaga kûndekia n'ûntû batoona ndî na mabîtia makîûmba gûtûma ntuîrwa kûûragwa. 19 Îndî Ayaundi bamwe baarega ndekua. I rîo ndoonire i kaaba îgamba rîakwa rîgiitwe i Kaisaarî. Îndî ntikwenda kûgarûka antû beetû mbathitanga. 20 Kwoogu gîku i kîo gîtûmîîte mbwîta mbûmenyithia atî, nthaîkîîtwe na nyororo ino n'ûntû bwa wîrîgîîro bûra Aisiraeri barî nabu.”
21 Bamwîra, “Gûtirî baarûa twagwata kuuma Njundea îkîgwetaga mantû maaku, kana muntû aaya atwîra ntheto ciaku inthûûku. 22 Îndî kaaba ûgatwîra tûkamenya bûra ûkûthûgaania n'ûntû bûra twiyî n'atî gûntû kunthe antû barîaria mantû maathûûku îgûrû rîa gîkundi kîenu.”
23 Baatua kîatho rîra bagaakomana kaîrî. Ntugû îgûkinya, antû baaya agu Paûrû aakaraga kwa wingî, na gûkûrûkîîria baakûrûkîîria. Paûrû abatûmîîria mantû ma ûnene bwa Ngai kuuma rûkîîrî mwanka riûa rîathûa. Aacûûgagia boona ûmma bûra bûgweteetwe bûgîkonagia Yiesû kûringana na bûra *watho bwa Musa buugîîte na bûra mabuku ma iroria maugîîte. 24 Bamwe baao i beetîgiirie mantû mamu Paûrû aabeeraga. Îndî kûrî bara baaregire gwîtîgia. 25 Baariganwa baanjîîria kwaragana bathi. Paûrû abeera ûntû bûmwe, atî, “Waabu n'ûmma bûra Kîrundu Ûmûtheru aatûmire kîroria Isaya eera biûyûûyû biao. 26 Aabeerire,
‘Îthi wîre antû baba,
“Bûkeegua kaîrî na kaîrî, îndî bûtiiciûkîrwa.
Bûgaacûûba kaîrî na kaîrî, îndî bûtiona.”
27 N'ûntû antû baba i baûmo biongo.
Bakunîkîîte matû na baincia.
Ûkeegua tibu, wîgua meetho maao makîonaga,
matû maao makîîgagua,
na mathûgaania maao magîciûraga mantû,
bakagarûka kîrî niû nkabooria.’ ”
28 Paûrû akîthiria, aarîîkia na kûbeera, “Kwoogu ndîenda bûmenya atî bara batarî Ayaundi i bareerirwe ntûmwa ya Ngai ya wonokio, bo bakeegua.” [ 29 Paûrû akuuga ûgu Ayaundi baathi bagîturanagia mbaara mûno.]a