Akîrîstû i babatîîrue baathîkîra anene
13
1 Muntû wonthe nabatîîrue aathîkîra thirikaarî, n'ûntû gûtirî mûnene aathana Ngai atamwete inya ya kwathana. I mûbango wa Ngai thirikaarî cionthe kwîgua irî oogo. 2 Na kwoogu ûra areganaga na thirikaarî eegagua akîregana na kîra Ngai abaangîîte wîgua kîrî oogo. Na muntû ta ûyu nagaakaanûkua. 3 Anene batibatîîrue bakuthûkagwa i bara barûthaga mantû meega. Bara barûthaga mantû maathûûku i bo babakuthûkaga. Wegua wenda ûkara ûtakûbakuthûka, rûthaga mantû meega wone bagagûkumia. 4 Mûnene i mûruti ngûgî wa Ngai wa gûgûteethia. Ûkarûtha mantû maathûûku nûbatîîrue ûkuthûka n'ûntû arî na watho bwa gûgûkaanûkia. We i mûruti ngûgî wa Ngai wa gûkaanûkagia bara barûthaga mantû maathûûku. 5 Kwoogu nwa mwanka bwathîkagîre anene. Na t'ûntû bwa gûkuthûka babûkaanûkia bunka, îndî i kinya n'ûntû nkoro cienu nikûbwîra ûgu i bu kûbatîîrue.6 Na gîtûmi gîa kûrûngaga ûgooti, i kwîgua anene i Ngai barutagîra ngûgî n'ûntû bwa kwîgua gîku i kîo gîtûmîîte beegua barî oogo. 7 Eyanagaani kîra bûbatîîrue bweyana. Wegua n'ûgooti, îrûngagaani kîrî bara babatîîrue babuîrîgîîra. Kana wegua i gîtîîyo, tîîyagaani bara babatîîrue beerîgîîra gûtîîywa.
Endagaani antû bara bangî
8 Îrandû rîra rîonka bûbatîîrue bwîgagua bûrî narîo, n'îrandû rîa wendo. Bûkeendanaga bûkwingia *watho bwa Ngai bunthe. 9 Maathana mara maugîîte, “Ûtikaathûngîîre,” “Ûtikaûragane,” “Ûtikaiye,” “Ûtigaatuuyanîîre,” “Ûtikeerirîîrie gîntû kîa muntû,” na maathana mara mangî monthe makamatîîtwe i yathana rîrî rîmwe rîra rîkuuga, “Enda mûtûûri waku ta bûra wîbendeete.” 10 Wendo bûtithûûkagia muntû ûra ûngî. Wendo ibwingagia bûra bunthe watho buugîîte.
11 Kwoogu rûthagaani ûgu n'ûntû bûkûmenya i kagiita karîkû gaka tûrî. I kagiita keenu ga gûûka torooni, n'ûntû îîndî kwonokua gwetû kûrî akubî nkûrûki ya rîra twetîgiirie rîa mbere. 12 Ûtugû bûrî akubî kûthira, kûrî akubî gûkea. Kwoogu tûtigeeni kûrûtha mantû ma mwindu, ga tûthûkieni mîrigo ya werû ya ndûa. 13 Tûtûûrageeni bûra tûbatîîrue tûtûûra tûrî antû ba mûthenya. Tûtiagîrîtwe tûthiiyaga biathooni birî na mantû maathûûku, kana tûtuîka atogooni. Tûtibatîîrue tûrûtha wîyia bwa ûmaramari nwa bûrîkû, kana tûthetania, kana twîgagua antû bara bangî rûriitho. 14 Karagaani ta bûra Mwathani Yiesû Kîrîstû akari. Bûtikaathûgaanie kwingia mawîrirîîria meenu maathûûku ma mwîrî.