Bûtikaameneerie bara barî na wîtîgio bûtarî bûûriku
14
1 Bûtikaarege ngwatanîro na bara batarî na wîtîgio bûûriku. Bûtigaakararanîrie nabo bûra bathûgaanagia i bwega kana bûra bathûgaanagia ti bwega. 2 Kwa ngerekano, waûmba kwîgua kûrî na muntû eetîgîîtie ti mabîtia, nwa arîe irio bia mîthemba yonthe. Na waûmba kwîgua kûrî na muntû ûngî nwe atarî na wîtîgio bûûganu, ûra we atarîa irio bia nyama. 3 Ûra we gûtarî irio atarîa atibatîîrue ameneeria ûra atarîa irio bia mûthemba woora ûkeegua birî. Na ûra atarîa irio bia mûthemba woora ûkeegua birî atibatîîrue agiitîra îgamba ûra gûtarî irio we atarîa n'ûntû Ngai namwîtîgîrîte. 4 Ûrîthûgaania ûrî ûû wa kûgiitîra îgamba mûruti ngûgî wa itha? N'îgûrû rîa mûnene wake kûmenya wegua i mabîtia kana ti mabîtia. Na n'îgûrû rîa mûruti ngûgî kûrûtha bûra kûbatîîrue n'ûntû Mwathani akamwaa inya ya kûmwotithia.5 Ngerekano îngî n'ya muntû ûra we athûgaanagia atî, ntugû nna n'yo îrî gîtûmi nkûrûki ya ira ingî na ûngî nwe ûra athûkagia ntugû cionthe irî bûmwe. Kîrî woora ûmwe wa antû babu nabatîîrue eegua akîmenyaga gîtûmi gîake gîa kuuga ûgu. 6 Ûra athûgaanagia, ntugû nna n'yo îrî gîtûmi nkûrûki ya ira ingî arûthaga ûgu n'ûntû bwa gûtîîya Mwathani. Ûra arîyaga irio bia mûthemba woora ûkeegua birî, abirîyaga agîtîîya Mwathani n'ûntû n'amûcookagîria nkaatho n'ûntû bwa bio. Na ûra atarîyaga irio bia mûthemba mûna aregaga kûbirîa n'ûntû bwa gûtîîya Mwathani, na wana kinya we n'amûcookagîria nkaatho. 7 Gûtirî we wacietû atwîre n'ûntû bwa kûrûtha akî mantû wa mara marî na gîtûmi kîrî we kana akuyaga n'ûntû bwa baita nna îra akwona arî we. 8 Rîra tûrî mwoyo, twîgagua tûrî mwoyo kîrî Mwathani, na twakua, tûkuyaga kîrî Mwathani. Nwîgue itûgaatûûra mwoyo kana itûgaakua, tûrî ba Mwathani. 9 Gîtûmi kîra gîatûmire Kîrîstû akua na ariûka, i kaingo eegua arî Mwathani wa bara bakuû na bara barî mwoyo. 10 Îîndî woû rî, i mbi n'ûntû ûkûgiitîra mwîtîgîri ûra ûngî îgamba kana ûkamûmeneeria? Ntugû nîengeerie gûkinya îra twinthe tûkaarûngama mbere ya Ngai tûgiitîrwe îgamba. 11 Kwandîkîîtwe *Maandîkooni Maatheru,
“Mwathani augîîte, ‘Na mma wa ta bûra ntwîre mwoyo
i mma muntû wonthe agaanturîria maru
akûûyîîre auge ndî Ngai.’ ”
12 Kwoogu nwa mwanka woora ûmwe wacietû akeegua arî na bwa kwîra Ngai kuumania na mara monthe akeegua arûthîîte.
13 Na kwoogu tûtikaagiitagîre bara bangî îgamba. Na nwa mwanka tûkûrûkie tuuge tûtiirûtha ûntû bûûmba kwîgua bûrî kîrigîîria kîrî eetîgîri bara bangî kana bûûmba gûtûma bataratara wîtîgioni. 14 Ndeeni ya Mwathani Yiesû i mbîtîgîîtie n'ûmma gûtirî gîntû gîtaagîrîte kîrî kîo. Îndî muntû akathûgaania gîntû kîna gîtiagîrîte, kîrî we gîtiagîrîte. 15 Ûkaaya gûtûma eetîgîri bara bangî beeyia na irio bira ûrîyaga, woû ûtirî na wendo kîrî bara bangî kaîrî. Ûtikaareke irio bira ûrîyaga bithûûria muntû Kîrîstû aakuire n'ûntû bwake. 16 Ûtikaareke mantû mara ûrûthaga matûma antû bara bangî baaria mantû maathûûku îgûrû rîa bûra uugaga i bwega. 17 Ûneneeni bwa Ngai, irio na biakûnyua bitirî gîtûmi. Kîra kîrî gîtûmi i wagîru, ûkiri na gîkeno, bira Kîrundu Ûmûtheru atweyaga. 18 Ûgatûmîkîra Kîrîstû na njîra ta înu ûkenagia Ngai, na bara bangî bakoona bûra ûkûrûtha n'ûntû bwega.
19 Kwoogu tûgeragieni na inya mûno bûra kûûmbîka tûrûthe mantû mara mareetaga ûkiri. Na tûrûthageeni ûntû bûra bûûmba wîkîra muntû ûra ûngî wîru. 20 Ûtikeenyangie ûntû bûra Ngai arûthîrîte ûra ûngî n'ûntû bwa irio! Irio bia mîthemba yonthe nwa birîwe. Îndî i mabîtia kûrîa irio bina wegua bigaatûma bara bangî bataratara wîtîgioni. 21 I kaaba ûtarîe nyama kana ûnyua ncoobi, kana ûrûtha ûntû bûûmba gûtûma mwîtîgîri ûra ûngî ataratara wîtîgioni.
22 Bûra wîtîgîîtie mantûûni mamu i bûkare bûrî witho bwaku na Ngai. Kîthaarimo i kîrî muntû ûra arûthaga bûra eetîgîîtie ti mabîtia. Atiigiitîrwa îgamba bûûthûûku. 23 Îndî ûkaaya kwîgua muntû arî na nkanja na irio bia mûthemba mûna, atibatîîrue abirîa. Akabirîa neegiitîra îgamba arî we, n'ûntû eetîgîîtie bitiagîrîte birîîgwa. Ûntû bunthe bûra muntû arûthaga atagwîtîgia n'ûntû bwagîru, i wîyia.