Tûrî baakuû kîrî meeyia îndî tûrî mwoyo ndeeni ya Kîrîstû
6
1 Kwoogu nwa tuuge tûthi na mbere na kwîyia kaingo Ngai oongeera ûtugi? 2 Arî buru! Gûtirî ûntû ta bûbu! Anga ti taka tûrî baakuû kîrî meeyia. Kwoogu n'ata tûûmba gûcooka gûtûûra kîrî mo kaîrî? 3 I mma i bwiyî rîra twabaatithiirue twagîa ngwatanîro na Kîrîstû Yiesû, itwabaatithiirue twagîa ngwatanîro n'we gîkuûni gîake. 4 Kwoogu i taka twathikanîîrue amwe na Kîrîstû kûbaatithuani gwetû na itûgwatanîrîte n'we gîkuûni gîake, kaingo na tiû tûtûûra ûtûûro bûngî bûûyerû ta bûra Kîrîstû aariûkiirue n'inya ya kûgegania ya Îthe.5 Ûkoona tûgwatithanîîtue na Kîrîstû gîkuûni gîake, wana kûriûkuani gwake ûkeegua tûgwatithanîîtue n'we. 6 Itwiyî mûtugo wetû ûra twarî na uu wambanîîrue na Kîrîstû kaingo wîyia bûthirua mîîrîîni yetû, na kaingo tûtatuîka nkombo cia wîyia kaîrî. 7 Ûra wonthe aaroakua n'ûmûkûûre auma inyaani ya wîyia. 8 Ûkoona twakuuyanîîrie na Kîrîstû, itwîtîgîîtie wana gûtûûra tûgaatûûrania amwe n'we. 9 Itwiyî Kîrîstû naariûkire na atiikua kaîrî. Gîkuû gîtimûûmba kaîrî. 10 Rîra Kîrîstû aakuire, aakuire rîmwe na rîa mûthia kaingo athiria wîyia. Îîndî arî oogo n'ûntû bwa gûkenia Ngai.
11 Wana biû îîthûkieni bûrî baakuû kîrî wîyia na îîthûkieni bûrî mwoyo kîrî Ngai ndeeni ya Kîrîstû Yiesû. 12 Kwoogu bûtikaarekeeni wîyia bwatha mîîrî yenu bwathîkîra mawîrirîîria maayo maathûûku. 13 Bûtikaarûthe mantû maathûûku na gîcuncî kîa mîîrî yenu bûtûmîkîra wîyia nakîo. Îruteeni kûrû kîrî Ngai bûrî antû bara barutîîtwe gîkuûni baareetwa mwoyooni. Înenkeraani Ngai icuncî bienu bionthe bitûmîke kûrûtha mantû maagîru. 14 Îîndî bûtiathagwa i wîyia n'ûntû i bûtiganîîte na watho bwagarûkîra ûtugi.
Nkombo cia wagîru
15 Kwoogu nwa twîyie n'ûntû itûtiganîîte na watho twagarûkîra ûtugi? Arî buru! 16 I bwiyî ûkeeruta gûtuîka nkombo ya muntû nwa mwanka wathîkîre mûnene ûyu waku. Nwa ûthuure kwathîkîra meeyia kûra kûreetaga gîkuû, kana ûkathuura kwathîkîra Ngai kûra kûreetaga wagîru. 17 Nkaatho i kîrî Ngai n'ûntû bwa bûra bûthingataga na nkoro cienu cionthe mara bwarutanirwe, bwauma ûkombooni bûra bwarî bwa meeyia. 18 Îîndî ibûthaûrîîtwe bwauma meeyiani bwatuîka nkombo cia wagîru.
19 Ndîtûmîra ngerekano îno n'ûntû n'îmbûthû kaingo bûmenya bûra nkûbwîra. Ta bûra bwanenkanîrîte icuncî bimwe bia mîîrî yenu biatuîka nkombo cia mantû mataagîrîte na kûrega kwathîka, îîndî nenkanîraani icuncî bia mîîrî yenu bituîke nkombo cia wagîru, kaingo bûtûûraga ûtûûro bûûtheru. 20 Kagiitaani kara bwarî nkombo cia meeyia wagîru bûtikîûmba kûbûrigîîria kûrûtha bûra bûkwenda. 21 I baita mbi bwonire kuumania na mantû mara? Mantû mara matûmaga bwîgua nthoni bwaririkana ibwamarûthaga. Baita ya mo i gîkuû! 22 Îndî îîndî ibûthaûrîîtwe bwauma inyaani ya meeyia bwatuîka nkombo cia Ngai. Îîndî bûrûthaga mantû mara mareetaga ûtheru na baita yaamo i mwoyo wa tene na tene. 23 Mûcaara wa meeyia i gîkuû. Îndî kîewa kîa Ngai kîra atwete kîa mana i mwoyo wa tene na tene ndeeni ya Kîrîstû Yiesû Mwathani wetû.