Gwîtîgîka kwa Ngai
3
1 Kwoogu îîndî rî, kwîgua ûrî Mûyaundi kûrîkûguna na mbi? Kana gûtaanwa kûrî na gîtûmi kîrîkû? 2 Yîî bu kûrî na baita na njîra inyingî. Na bwa mbere, n'Ayaundi Ngai eetîgiirie na mîgambo yake.3 Îndî rî, ûkaaya kwîgua bamwe baao bataatuîka eetîgua, ka gûtuîka Ngai agaatiga kwîgua arî mwîtîgua? 4 Arî buru! Ngai aaragia ûmma wana kinya ûkeegua muntû wonthe nthîgûrû i mûûrongo. *Maandîkooni Maatheru kwandîkîîtwe ûûgû îgûrû rîa Ngai,
“Ûkoonekana waragia ûmma,
na wathitangwa ûgaacinda îgamba.”
5 Ûkaaya kwîgua mantû maathûûku mara tûrûthaga moonanagia bûra Ngai aagîrîîte bûgana, Ngai tika agûtûbîtîria rîra akûthûûra i tiû agatwa îkaanûkia? (Aaga ndîaria ta muntû wa kîînthîgûrû.) 6 Bûbu n'ûrongo. Ûkeegua ûgu n'ûmma rî, n'ata îndî Ngai akaagambithangia antû? 7 Waûmba kwîgua muntû akiuga, “Ûkaaya kwîgua ndaarongoa ingûtûma Ngai atîîywa n'ûntû bwa kwonania aaragia ûmma rî, i kî îndî n'ûntû nkaagiitîrwa îgamba bûûthûûku, mbîtwe mwîyia?” 8 Kûthûgaania ûntû ta bûbu i ta bûmwe na kuuga, “Ga tûrûthe mantû maathûûku kaingo mantû meega maaya.” Na wabu kûrî antû bagûtûtuîrîîra bakauga ûgu i bu tûrutanaga antû. Antû ta babu baagîrîtwe bagiitîrwa îgamba bûûthûûku.
9 Kwoogu Ayaundi twaûmba kuuga tûrî gîtûmi nkûrûki ya antû bara bangî? Arî, gûtirî gîntû ta gîku! Itûbwoniirie atî, Ayaundi na bara batarî Ayaundi bonthe baathagwa n'inya ya wîyia. 10 Na wa ta bûra kwandîkîîtwe *Maandîkooni Maatheru,
“Gûtirî we mwagîru, kinya nwa ûmwe ûgu.
11 Gûtirî we aciûkagîrwa, gûtirî we eendaga kûmenya Ngai.
12 Antû bonthe barî aaraaya na Ngai, bonthe i babîtîîtie.
Gûtirî muntû arûthaga mantû meega,
kinya nwa ûmwe”
13 “Mîgambo yao n'ûgwati, nîtûmaga antû bakua.
Batûmagîra ndîme ciao kwaria ûrongo.”
“Mîgambo yao îkari ta cûmû ya njoka.”
14 “Tûnyua twao i twa kûrîrîkana na ntheto cia rûmena.”
15 “Barî mpwî cia gûtonyana na kûûragana.
16 Wa naara barathi batigaga wînyangia na kînyamaara.
17 Batiendaga ûkiri.”
18 “Batikuthûkaga Ngai nwa aniini.”
19 Itwiyî atî, ûntû bunthe bwandîke *wathooni bwandîkirwe n'ûntû bwa bara baathagwa i watho. Na watho buugîîte mantû mamu kaingo antû bonthe batoona bwa kwîgwatia na kaingo gûtuîka kîrîndî kîa nthîgûrû kîonthe gîkaagiitîrwa îgamba i Ngai. 20 Na kwoogu gûtirî muntû aûmba kwagîrithua i Ngai kuumania na kûthingata watho. Watho i bûtûmaga tûmenya meeyia meetû.
Kwagîrithua kûra kuumanagia na wîtîgio
21 Îgiitaani rîrî tûrî, itûgwûrîrîtwe wagîru bûra Ngai atwete atagûtûmîra *watho. Mabuku ma watho na ma iroria imakûûyîîrîîte ûntû bûbû. 22 Ngai atweyaga wagîru bûbû n'ûntû bwa gwîtîgia Yiesû Kîrîstû. Nabu i bwa kîrî muntû wonthe ûra eetîgagia. Antû bonthe i bûmwe, 23 n'ûntû antû bonthe n'eeyia na tûrî aaraaya na wagîru bwa Ngai. 24 Gûtwagîrithia kûra Ngai atwagîrithagia i kîewa kuumania na ûtugi bwake. Atwagîrithagia gûkûrûkîîra kîrî Kîrîstû Yiesû ûra atûthaûraga tûkauma meeyiani meetû. 25 Ngai aatûmire Kîrîstû eeruta arî kîgongwana n'ûntû bwa meeyia meetû. Twagîrithagua rîra twetîgia atî Kîrîstû eetûûrire nthakame yake n'ûntû bwetû. Na ûgu i kwonania bûra Ngai aagîrîîte bûgana, n'ûntû mbereeni ateeyaga bara beeyagia îkaanûkia na mpwî. 26 Îndî îgiitaani rîrî tûrî oonanagia wagîru bwake. Na kaîrî Ngai aatûmire Kîrîstû kwonania n'ûmwagîru na naagîrithagia bara beetîgagia Yiesû.
27 Kwoogu rî, kûrî gîtûmi gîetû gwîkumia? Gûtirî kîo. Na i kî? Gîtûmi i kwîgua tûtituîkaga baagîru n'ûntû bwa kûthingata watho, îndî i kuumania na wîtîgio bwetû. 28 Kwoogu itwiyî muntû aagîrithagua i Ngai n'ûntû bwa wîtîgio na t'ûntû bwa kûthingata watho. 29 Ka Ngai arî Ngai wa Ayaundi bonka akî? Anga twa we Ngai wa bara batarî Ayaundi kinya bo? 30 Ngai n'ûmwe. Aagîrithagia Ayaundi n'ûntû bwa wîtîgio bwao na akaagîrithia bara batarî Ayaundi kuumania na wîtîgio bwao. 31 Ûkeegua twagîrithagua i wîtîgio rî, ga tûkwenda kwonania watho bûtirî na gîtûmi? Arî buru! Ûmma n'atî, nwa rîra rîonka tûrî na wîtîgio twingagia gîtûmi kîa watho.