Macwo 8

Yesu à tògofoo cùuŋɔ

(Marika 1.40-45; Luka 5.12-16)

Yesu à tîge ɲaŋke na ke, ka shinɲyahara si ntaha u fye e. 2 Ka tògofooŋi wà si file u na maa niŋkure sín u fere e maa jwo: «Kafooŋi, mu aha ɲɛɛ, mu sí n‑jà mii tòge láha mii na si mii .» 3 Ɲyɛ ka Yesu si u cyɛge sànha maa bwɔ̀n u na maa jwo: «Mii à ɲɛɛ, tòge ku láha ma na!» Ka tòge si ntílʼa láha u na. 4 Ka Yesu si u pyi: «Cû ma ɲwɔge na, ma hà yaaga jwo sùpya á mɛ, ŋka ta sì, maa sà maye cyêe sáragawwuŋi na u u ma kàanmucya, sárage kyaa Kile tùnntunŋi à jwo tògofeebii kyaa na ke, maa kuru wwû. Lire li sí li cyêe na mu à cùuŋɔ.»

Yesu à sòrolashiibii ɲùŋufooŋi wà báarapyi cùuŋɔ

(Luka 7.1-10; Yuhana 4.43-54)

5 Mà Yesu yaha u u jyè Kapɛrɛnamu kànhe e, Ɔrɔmu sòrolashiibii yyaha yyére shinŋi wà à file u na maa u ɲáare na: 6 «Kafooŋi, mii báarapyiŋi nizinniŋi na wá bage e. U à mûruŋɔ, maa ŋkyaali sèlʼe.» 7 Ka Yesu si u pyi: «Mii u sà u cùuŋɔ la?» 8 Ka sòrolashiibii yyaha yyére shinŋi si jwo: «Kafooŋi, mii ɲùŋkʼà cyɛ́rɛ mu u jyè mii pyɛnge e. Mu aha jwuŋkanŋa niŋkin jwo, kuru sí mii báarapyiŋi cùuŋɔ. 9 Mii wi ke, sòrolashiibii pìi na ɲyɛ mii ɲùŋɔ na, mii sí ɲyɛ pìi ɲùŋɔ na. Mii aha wà pyi “Ta sì” u maha ŋkàre. Mii aha wabɛrɛ pyi “Ta ma” u maha mpa. Mii aha na biliŋi pyi “Nde pyi” u maha lire pyi.»

10 Yesu à yire lógo ke, ka li i u kàkyanhala. Mpii pi mpyi u fye e ke, ka u u jwo pirʼá: «Sèeŋi na mii sí yi jwo yii á, mii sàha ntêlʼa sùpya ɲya ná ŋge dániyaŋi fiige e Izirayɛli shiinbii shwɔhɔlʼe mɛ! 11 Mii sí yi jwo yii á, shinɲyahara sí raa yîri canŋafworompe ná canŋajyimpe e, si mpa lyî ná ná Ishaka ná Yakuba e e. 12 Ŋka Izirayɛli shiinbii mɛɛ na Kile Saanre à bégele ke, pire pìi sí n‑wà cyíinŋi na numpini i. Wani pi sí raa myahigii súu sʼa ŋkyànhigii kùru.»

13 Ɲyɛ Yesu à puru jwo ke, maa sòrolashiibii yyaha yyére shinŋi pyi: «Ta sì pyɛngɛ. Ná mu à dá mii na, nde mu à cya ke, lire li pyi.» Ka u báarapyiŋi si ntílʼa cùuŋɔ lire tèenuuni i.

Yesu à Pyɛri nafeɲcwoŋi cùuŋɔ

(Marika 1.29-34; Luka 4.38-41)

14 Ɲyɛ Yesu à kàre Pyɛri pyɛngɛ mà sà Pyɛri nafeɲcwoŋi ta tasinnage e cifwuro cye e. 15 Ka Yesu si bwɔ̀n u cyɛge na, ka cifwure si láha u na. Ka u u yîri, maa ɲjyì kan Yesu á.

16 Yàkoŋkʼà nɔ ke, ka pi i wá na ma ná jínacyaanbii niɲyahamilʼe Yesu á. Ka u u jínabii kɔ̀rʼa yige pi e ná u ɲwɔjwumpe e, maa yampii puni cùuŋɔ. 17 Ɲyɛ lire pyiŋkanni na, ka Kile tùnntunŋi Ezayi jwumpe si fûnŋɔ, u mpyi a jwo: «U à jyè wuu ná wuu cwɔ̀hɔmpe shwɔhɔlʼe, maa wuu yampe láha wuu na.»

Mpii la ku ɲyɛ si ntaha Yesu fye e ke

(Luka 9.57-62)

18 Ɲyɛ shinɲyahara mpyi a pa Yesu kwûulo, lire kurugo ka u u u pyi pi baŋi jyiile ná urʼe. 19 Ka Kile Saliyaŋi cyelentuŋi wà si file u na maa u pyi: «Cyelentuŋi, mii sí n‑taha mu fye e ma tasheyi puni i.» 20 Ka Yesu si u pyi: «Wyigii na ɲyɛ sigepwuunbilʼá, shèere mú sí ɲyɛ saɲcyɛɛnrʼá. Ŋka tashwɔngɔ ɲyɛ á mɛ.» 21 Ka u cyelempyaŋi wabɛrɛ si u pyi: «Kafooŋi, yyére, mii aha na tuŋi tò, mii sí n‑ta n‑pa n‑taha mu fye e.» 22 Ka Yesu si u pyi: «Taha mii fye e, maa kwùubii yaha pi a piye tùni.»

Yesu à kafeebwɔhe yyéeŋɛ baŋi ɲuŋʼi

(Marika 4.35-41; Luka 8.22-25)

23 Ɲyɛ Yesu à jyè bakwɔɔge e, ka u si jyè u fye e. 24 Ka kafeebwɔhɔ si yîri na fwu baŋi ɲuŋʼi, fo lwɔhe na ŋko si bakwɔɔge tò. Lirʼà Yesu ta u u ŋwúuni. 25 Ka pi i file u na, maa u ɲɛ̀ maa jwo: «Kafooŋi, yîri maa wuu shwɔ, lire baare e wuu sí n‑kwôro lwɔhe e.» 26 Ka u u pi pyi: «Ɲaha na yii na fyáge yɛ? Ɲaha na yii dániyaŋʼà cyɛ́rɛ yɛ?» Maa yîrʼa yyére maa fànha cyán kafɛɛge ná baŋi lwɔhe na. Ka yi puni si yyére siu! 27 Ka pi puni si wá na ŋkyáali u na, maa jwo: «Ɲaha supyifiiwe u ɲyɛ ŋge nàŋi, fo ka kafɛɛge ná lwɔhe si ntɛ̀ɛn u wuuni taan yɛ?»

Yesu à jínacyaan shuunni cùuŋɔ

(Marika 5.1-20; Luka 8.26-39)

28 Ɲyɛ ka Yesu si baŋi jyiilʼa sà nɔ Gadara shiinbii kùluni i. Ka jínacyaan shuunni si fworo fanɲyi i mà u ɲùŋɔ bɛ̂. Pi mpyi a pi sèe sèlʼe, fo wà sàha mpyi na jà a tòro kuru kuuge e mɛ. 29 Ka pi i wá na yu fànha na: «, ɲaha mu ɲyɛ na ɲcaa wuu á yɛ? Mu à pa mpa kawaa pyi wuu na mà ta tèni sàha nɔ mà?»

30 Ɲyɛ lirʼà caakurumbwɔhɔ ta ku u lyî pi byanhampe e. 31 Ka jínabii si Yesu ɲáare sèlʼe na: «Mu aha wuu kɔ̀rʼa yige mpii sùpyiibilʼe, ma a wuu yaha wuu sà jyè mpii caabilʼe.» 32 Ka u u pi pyi: «Yii a sì.» Ka pi i fworo pire nàmbaabii shuunniŋi i, maa sà jyè pire caabilʼe, ka caakuruŋke puni si sùrugʼa yîri ɲaŋke numpɛnge na, mà cwo cwo baŋi i mà kwû. 33 Ka cáanahabii si fê a kàre kànhe e, ɲcyii cyi à pyi ke, maa sà cyire yyaha jwo, mà cye cyán jínacyaanbii wogigii na. 34 Ka kànhe shiinbii puni si ntílʼa fworʼa kàre Yesu ɲùŋɔ tabeŋi i. Pi à sà u ɲya ke, maa u ɲáare sèlʼe na u fworo pire kùluni i.