Macwo 9

Yesu à supyimuruŋɔ cùuŋɔ maa ku kapegigii yàfa ku na

(Marika 2.1-12; Luka 5.17-26)

Ɲyɛ ka Yesu si jyè bakwɔɔge e, maa baŋi jyiilʼa kàre u yabiliŋi kànhe e. 2 Ka pi i mpa u á ná yaŋi wʼe u yasinniŋke e, u mpyi a mûruŋɔ. Yesu à pi ɲya pi à dá uru na ke, maa jwo supyimuruŋkʼá: «Na jya, màban le maye e! Mu kapegigilʼà yàfa mu na.»

3 Ɲyɛ pi mpyi wani ke, ka pire pìi si wá na sɔ̂nŋi piye funŋʼi na Yesu na Kile mɛge kɛ̀ɛge. 4 Ka Yesu si ntílʼa pi sɔ̀nŋɔre cè, maa jwo pi á: «Ɲaha na yii ɲyɛ ná nte sɔ̀nŋɔpeere shiŋi i yɛ? 5 Mà jwo “Mu kapegigilʼà yàfa mu na” ná “Yîri, ma a ɲaare” yii ɲyii na, cyire kapyaagii mú shuunni i, ndire jwumɔ pʼà táan yɛ? 6 Ŋka yii pi li cè na síŋi na ɲyɛ á naha ɲiŋke na, u wà kapegii yàfa u na.» Lire e u à jwo supyimuruŋkʼá: «Yîri, maa ma yasinniŋke lwɔ́, maa sì pyɛngɛ.» 7 Ka u u ntílʼa yîrʼa kàre pyɛngɛ. 8 Sùpyirʼà lire ɲya ke, ka pi i fyá maa Kile pêe, uru ŋgemu u à ŋge síŋi fiigiŋi kan sùpyirʼá ke.

Yesu à lyî ná mɛpɛngɛ shiinbilʼe

(Marika 2.13-17; Luka 5.27-32)

9 Yesu à yîri wani ke, u à sà múnalwɔɔre shwofooŋi wà ɲya u à tɛ̀ɛn u báaraŋi tapyige e, u mɛge mpyi Macwo. Ka Yesu si u pyi: «Yîrʼa taha na fye e.» Ka u u yîrʼa taha u fye e.

10 Ɲyɛ lire kàntugo ka Yesu ná u si sà ntɛ̀ɛn na lyî Macwo bage e ná mɛpɛngɛ shiinbii niɲyahamilʼe mu à jwo múnalwɔɔre shwofeebii ná piibɛrii. 11  pìlʼà lire ɲya ke, maa Yesu cyelempyiibii pyi: «Ɲaha na yii cyelentuŋi na lyî ná múnalwɔɔre shwofeebii ná mɛpɛngɛ shiinbii piibɛrilʼe yɛ?» 12 Yesu à yire lógo ke, maa jwo: «Mpii pi à cùuŋɔ ke, wempyiŋi kyaa ɲyɛ pire na mɛ, mpii pi na yà ke, pire na u kani ɲyɛ. 13 Kile à jwo u Jwumpe Semɛŋi i “Yii a ɲùɲaara taa yii shinɲɛɛbii na, lirʼà táan mii á mà tòro sáragawwuuni na.” Ɲyɛ yii sɔ̂nŋɔ puru jwumpe ɲwɔhe na. Ɲaha na yɛ mpii pi ɲyɛ na piye sɔ̂nŋi na pirʼà tíi ke, mii ɲyɛ a pa ɲìŋke na pire tayyerege e mɛ. Ŋka mpii pi à li cè na pire ɲyɛ a tíi mɛ, pire tayyerege e mii à pa.»

Jwumpe Nintanmpe fànhʼà ɲyaha Yahutuubii làdaabii woge na

(Marika 2.18-22; Luka 5.33-39)

14 Lire kàntugo Yuhana Batizelipyiŋi cyelempyiibilʼà pa Yesu yíbe na ɲaha na pire ná maha súnŋi leni, Yesu sí ɲyɛ na u leni mà yɛ? 15 Ka Yesu si pi pyi: «Cipooŋi ceveebii sí n‑jà yyaha tanha, mà pi yaha ná cipooŋi i cikwɔɔnre na la? Ŋka tèni là na ma, cipooŋi sí n‑pa n-yige pi shwɔhɔlʼe. Lire tèni i pi sí n‑ta raa súnŋi leni.

16 Wà ɲyɛ na vàanvɔnŋɔ taha na vàanɲjyɛga tacwɔngɔ jwooli mɛ. Lire ká mpyi, vàanvɔnŋke maha vàanɲjyɛge kɛ̀ɛge, tacwɔngʼa sì nâara a pêe. 17 Wà mú sí ɲyɛ na sinmpurugo leni seeye boolyɛgilʼe mɛ. Lire baare e pʼaha mpa ntanha, pu maha pu yaleŋke jya, maa wu, yaleŋkʼa sì ŋkɛ̀ɛge. Pi maha sinmpuruge leni seeyi boofɔnŋkilʼe, yire mú shuunniŋi yʼà bɛ̂.»

Yesu à ceeŋi wà cùuŋɔ, maa Zharusi pworoŋi buwuŋi ɲɛ̀

(Marika 5.21-43; Luka 8.40-56)

18 Ɲyɛ mà Yesu yaha puru jwumpe na, Yahutuubii ɲùŋufooŋi wà à pa niŋkure sín u taan maa jwo: «Yesu! Mii pworoŋʼà kwû numɛ. Maye sanŋa yaha, maa mpa ma cyeyi taha u na, u sí ɲɛ̀.» 19 Ka Yesu ná u cyelempyiibii si yîri na ŋkɛ̀ɛge ná u e.

20 Mà pi niŋkaribii yaha, ceeŋi wà à file Yesu na maa bwɔ̀n u vàanntinŋke zhwɔ̀ɔre na. Lùwuliŋkwombaayi mpyi uru ceeŋi na yyee kɛ ná shuunni funŋʼi. 21 U mpyi na yu uye funŋʼi: «Mii aha bú jà a bwɔ̀n u vàanɲyi na, mii sí n‑cùuŋɔ.» 22 Ka Yesu si yyaha kɛ̂ɛnŋʼa wílʼa u ɲya, maa jwo u á: «Na pworo, ma hà raa fyáge mɛ, ɲaha na yɛ mu dániyaŋʼà mu cùuŋɔ.» Ka ceeŋi si ntílʼa cùuŋɔ.

23 Yesu à sà nɔ uru ɲùŋufooŋi pyɛnge e, maa kwùge tìnmpirigii wyìfeebii ná supyiɲyahare ɲya ti i ɲyàha na wùruge tiye e ke, maa jwo pi á: 24 «Yii caala a yîri naha, pùceebilini ɲyɛ a kwû mɛ, li na ŋwúuni.» Ka pi i wá na ɲcyàhali u na. 25 Sùpyirʼà fworʼa kwɔ̀ pyɛnge e ke, ka Yesu si jyè bage e, maa pyàŋi buwuŋi cû cyɛge na, ka u u yîri. 26 Ka lire kani si ɲcaala lire kùluni puni i.

Yesu à fyinmii shuunni ná búbu cùuŋɔ

27 Yesu à fworo wani na ŋkɛ̀ɛge ke, ka fyinmii shuunni si ntaha u fye e maa wá na yu fànha na: « Tuluge Shinŋi, ɲùɲaara ta wuu na!» 28 U à sà jyè pyɛnge e ke, ka pire fyinmpii si file u na. Ka u u pi pyi: «Yii à dá na mii sí n‑jà yii cùuŋɔ la?» Ka pi i jwo: «Ɔɔn, mu sí n‑jà, kàfooŋi.» 29 Ka u u bwɔ̀n pi ɲyiigii na maa jwo: «Li sí n‑pyi yii á mà tàanna ná yii dániyaŋi i.» 30 Ka pi i ntíi na ɲaa. Ka u u yi jwo a waha pi á na pi a piye kàanmucaa, pi àha wà yaha u li cè mɛ. 31 Ŋka pi à yîri wani ke, pi à kàrʼa sà a lire kani yu lire kùluni puni i.

32 Ɲyɛ pirʼà yîri Yesu taan ke, ka pìi si mpa ná búbu e. Jínaŋi wà u mpyi u e. 33 Yesu à jínaŋi kɔ̀rʼa yige ke, ka búbuŋi si ntíi na yu. Supyiɲyahare ti mpyi wani ke, ka lire si tire kàkyanhala, ka ti i wá na ŋko: «Wuu sàha ŋkwɔ̀ a nde kani fiige ɲya Izirayɛli kìni i mɛ!» 34 Ŋka Farizhɛɛnbilʼà jwo na jínabii ɲùŋufooŋi fànhe cye kurugo, Yesu ɲyɛ na jínabii kɔ̀re na yige pifeebilʼe.

Sùmakɔɔgʼà pêe, ŋka sùmakwɔɔnbilʼà cyɛ́rɛ

35 Ɲyɛ Yesu mpyi na ɲaare na mâre kànbwoyi ná kànpyɛɛre puni na. U mpyi na sùpyire kâlali Kile Jwumpe kàlambayi i, maa Jwumpe Nintanmpe yu mà yyaha tíi ná e, maa yampii puni ná cwɔ̀hɔmɔfeebii puni cùuŋi. 36 U à supyiɲyahare ɲya ke, ka pi ɲùɲaare si u ta sèlʼe, ɲaha na yɛ ti mpyi a kànha maa ɲcwɔ̂nrɔ, mu à jwo mpàa pi ɲyɛ piye ɲùŋɔ kurugo. 37 Ka Yesu si jwo u cyelempyiibilʼá: «Sùmakɔɔgʼà pêe, ŋka sùmakwɔɔnbilʼà cyɛ́rɛ. 38 Lire e ke yii kɛrɛge foo ɲáare, u u pìi bâra sùmakwɔɔnbii na.»