Yesu à jínahii niɲyahamii kɔ̀rʼa yige nàŋi wʼe
5
Ɲyɛ ka Yesu ná u cyelempyiibii si nɔ baŋi kùŋke na,
wani Gadara shiinbii ɲyɛ.
2 Yesu à tîgʼa fworo bakwɔɔge e ke,
ka jínacyanŋi wà si ntílʼa fworo fanɲyi ia,
maa mpa u ɲùŋɔ bɛ̂.
3 Uru nàŋi mpyi na shùun fanɲyi i.
Sùpya sàha mpyi na sì n‑jà u pwɔ mɛ,
u mpyi maha u yapwoyi puni kwùun,
ali yɔ̀rɔyi.
4 Tooyi niɲyahayʼe,
pi mpyi maha u cwôre,
marii u tooyi ná u cyeyi pwu ná yɔ̀rɔyʼe.
Ŋka u mpyi maha yire puni kyɛɛge.
Sùpyire puni fànhʼà pa ɲcyɛ́rɛ u e,
maa u ɲya,
maa u yaha wani.
5 Pìlaga bâra canŋa na,
nàŋi mpyi maha ɲaare fanɲyi i,
marii dùru ɲaɲyi ɲuŋʼi,
marii ŋkwúuli,
marii uye kúuli na fwóroge kafaayi na.
6 Mà u yaha puru na,
u à tɛ̀ɛn tatɔɔnge e maa Yesu ɲya,
maa fê a pa niŋkure sín u taan.
7 Maa jwo fànha na:
«Yesu,
Kileŋi nìɲyi wuŋi Jyaŋi,
ɲaha shi ku ɲyɛ wuu ná mu shwɔhɔlʼe yɛ?
Mii na mu ɲáare,
Kile kurugo,
ma hà kawaa pyi na na mà dɛ!»
8 U à puru jwo,
ɲaha kurugo yɛ Yesu mpyi a jínaŋi pyi na u fworo u e.
9 Ka Yesu si nàŋi yíbe u mɛge na,
ka u u jwo:
«Mii mɛge ɲyɛ Shinɲyahara,
ɲaha na yɛ wuu à ɲyaha.»
10 Ɲyɛ ka jínacyanŋi si Yesu ɲáare fànha na na u àha pire kɔ̀re ɲjige lire kùluni i mɛ.
11 Ɲyɛ lirʼà caakurumbwɔhɔ ta ku u lyî ɲaŋke kà numpɛngɛ na wani.
12 Ka jínabii si Yesu ɲáare sèlʼe,
na u pire yaha pire pi sà jyè kuru caakuruŋke e.
13 Ka u u ɲɛɛ.
Ka pi i fworo nàŋi i maa sà jyè caabilʼe.
Lirʼà pyi ke,
ka caabii si sùrugʼa yîri ɲaŋke numpɛnge na mà cwo cwo baŋi i.
Pi mpyi a caalii kampwɔhii shuunni (2.000) kwɔ̀,
ka pi puni si ŋkwôro lwɔhe e.
14 Ka caabii kàanmucyafeebii si fê a kàrʼa sà a yi yu kànhe ná sishwɔnbugure puni i.
Ka sùpyire si mpa lire kani wíi.
15 Pi à nɔ Yesu na ke,
ka pi i nàŋi ɲya,
ŋge e jínabii mpyi ke,
u à tɛ̀ɛn u taan.
Vàanɲyi na mpyi u na,
u mpyi a tɛ̀ɛn tanuge e,
ka pi i fyá.
16 Nde lʼà jínacyanŋi ná caabii ta ke,
mpiimu pi à lire ɲya ke,
ka pire si sà a li yu na ntùuli sùpyirʼá,
fworoŋkanni na jínabilʼà fworo nàŋi i maa jyè caabilʼe ke.
17 Sùpyirʼà puru jwumpe lógo ke,
ka pi i wá na Yesu ɲáare sèlʼe na u fworo pire kùluni i.
18 Yesu niɲjyiŋi bakwɔɔge e,
nàŋi i jínabii mpyi ke,
ka uru si u ɲáare sèlʼe sʼa ŋkɛ̀ɛge ná u e.
19 Ŋka Yesu ɲyɛ a ɲɛɛ mɛ,
maa jwo:
«Núru,
ma a sì pyɛngɛ,
kabwooni Kafooŋi Kile ɲùɲaare wuŋʼà pyi mu á ke,
ma a sà lire yyaha jwo ma pyɛngɛ shiinbilʼá.»
20 Ka nàŋi si ŋkàre,
nde Yesu à pyi u á ke,
mà sà a yire yu na mâre Dekapoli kùluni i.
Lirʼà sùpyire puni kàkyanhala.
Yesu à ceeŋi wà cùuŋɔ, maa Zharusi pworoŋi buwuŋi ɲɛ̀
21 Yesu à núrʼa baŋi jyiilʼa kɛ̂ɛnŋɛ kùŋke sanŋke na ná bakwɔɔge e.
U à fworo ke,
ka shinɲyahara si mpa u kwûulo.
Mà u yaha kuru cyage e,
22 ka Kile Jwumpe kàlambage ɲùŋufooŋi wà si nɔ wani,
u mɛge mpyi Zharusi.
U à Yesu ɲya ke,
maa niŋkure sín u taan,
23 maa u ɲáare sèlʼe:
«Maye sanŋi yaha,
mii pworoŋi wá na kuro caa,
pa ma cyeyi taha u na,
bà u si mpyi si ɲcùuŋɔ mɛ.»
24 Ka Yesu si yîrʼa kàre ná u e,
ka shinɲyahara si ntaha u fye e fo na u fwòoŋi.
25 Tire sùpyire shwɔhɔlʼe ceeŋi wà mpyi wani,
yyee kɛ ná shuunni funŋʼi,
lùwuliŋkwombaayi mpyi u na.
26 U mpyi a kànha wempyiini taan,
u cyeyaare mpyi a kwɔ̀,
u à shà wempyii niɲyahamii yyére,
ŋka pà ɲyɛ a sàa fworo yampe e mɛ,
fo pu na nâare.
27 U à Yesu kyaa lógo ke,
ka u u mpa sùpyire shwɔhɔlʼe Yesu kàntugo yyére,
maa bwɔ̀n u vàanɲyi na.
28 U mpyi na yu uye funŋʼi:
«Mii aha bú jà a bwɔ̀n u vàanɲyi na,
mii sí n‑cùuŋɔ.»
29 U à bwɔ̀n Yesu vàanɲyi na ke,
ka lùwuliŋkwombaayi si ntílʼa kwɔ̀,
ka u u li cè uye e na urʼà cùuŋɔ.
30 Ka Yesu si ntílʼa li cè uye e na fànhe kà à fworo urʼe,
maa yyaha kɛ̂ɛnŋʼa le sùpyire e,
maa jwo:
«Jofoo u à bwɔ̀n mii vàanɲyi na yɛ?»
31 Ka u cyelempyiibii si u pyi:
«Mu ɲyii na ɲyɛ nte sùpyire puni na,
tʼà mu fɛnrɛ kàmpanɲyi puni na,
maa núru na yíbili na jo u à bwɔ̀n mu na yɛ?»
32 Lire ná li wuuni mú i,
ka Yesu si wá na wíi na mâre sùpyire shwɔhɔlʼe,
ŋge u à bwɔ̀n u na ke,
si uru cè.
33 Ceeŋi u mpyi a bwɔ̀n u na ke,
urʼà fyá fo na ɲcyɛ̂ɛnni,
nde lʼà u ta ke,
u à lire cè,
ka u u mpa niŋkure sín Yesu yyaha na,
maa sèeŋi puni jwo u á.
34 Ka Yesu si u pyi:
«Na pworo,
mu dániyaŋʼà mu shwɔ mpe yampe na,
ta sì yyeɲiŋke ná fɛrɛmpe e.»
35 Mà u yaha puru jwumpe na,
pìlʼà yîri ɲùŋufooŋi Zharusi pyɛnge e mà pa yi jwo Zharusi á:
«Kile wuuni na wá à nɔ mu pworoŋi na.
Ma hà núru cyelentuŋi yaha u uye kànha u a ma mɛ.»
36 Ŋka Yesu ɲyɛ a puru jwumpe lwɔ́ a wíi mɛ,
maa yi jwo nàŋʼá:
«Ma hà raa fyáge mɛ,
dá mii na kanna.»
37 Ka pi i yîri na ŋkɛ̀ɛge Kile Jwumpe kàlambage ɲùŋufooŋi yyére.
Yesu ɲyɛ a ɲɛɛ sùpyaŋi wabɛrɛ u kuni bínni ná urʼe mɛ,
fo Pyɛri ná Yakuba ná u cìnmpworonaŋi Yuhana.
38 Pi à nɔ ɲùŋufooŋi pyɛnge e ke,
ka Yesu si shinɲyahara ɲya ti i ɲyàha na wùruge tiye e,
marii myahigii súu marii kwuuyi wàa.
39 U à jyè ke,
ka u u pi pyi:
«Ɲaha kurugo yii na tùpyaagii wàa marii myahigii súu yɛ?
Pyàŋi ɲyɛ a kwû mɛ,
u na ŋwúuni!»
40 Ka pi i wá na ɲcyàhali u na.
Ka u u pi yige ntàani na.
Bage e pyàŋi mpyi a sínni ke,
ka u u jyè wani ná pyàŋi sifeebii ná u cyelempyiibii taanreŋi i.
41 Maa pyàŋi buwuŋi cû u cyɛge na,
maa yi jwo u á pi shɛɛnre e:
«Talita kumi!»
Lire ɲwɔhe ku ɲyɛ:
«Mii pworoŋi,
ta núru,
yîri!»
42 Kuru cyage mujye e,
ka pùcwoŋi si yîri na ɲaare,
u mpyi yyee kɛ ná shuunni.
Ka lire si sàa pi puni kàkyanhala.
43 Ka Yesu si yi jwo a waha pi á na pi àha ŋkwɔ̀ wà yaha u nde kani cè mɛ,
maa pi pyi na pi ɲjyì kan u á.