Ɲɛɛnuguŋi bàtaage
4
Puru ɲwɔhɔ na,
Yesu à kàre Galile baŋi ɲwɔge na,
ka shinɲyahara si mpa bínni u taan,
ka u u wá na ti kâlali sahaŋki.
Sùpyirʼà pa ɲyaha sèlʼe ke,
li ɲyɛ a pa ɲwɔ mɛ,
ka u u jyè a tɛ̀ɛn bakwɔɔge kʼe lwɔhe ɲuŋʼi.
Ka ti i yyére kùmpoge na,
2 ka u u ti kâla karigii niɲyahagii na ná bàtaayʼi.
U à jwo:
3 «Yii a núru,
ɲɛɛnuguŋi wà u ná fworʼa kàre ɲɛɛmɛ tanuguge e.
4 Mà u yaha u u sùmapyaŋi wàa fini fiige,
sùmashiŋi wà à cwo kuni ɲwɔge na,
ka saɲcyɛɛnre si mpa uru jò.
5 Ka wà tacwugo si mpa bɛ̂ ná kafaafoge e,
pworo niɲyahara mpyi kuru cyage e mɛ.
Ka uru si fyîn wahawaha,
ɲaha na yɛ u mpyi a jyè ɲìŋke e sèlʼe mɛ.
6 Ɲyɛ canŋkʼà pa fworo ke,
ka yifyinre si fàan maa waha,
ndìre kuuŋi na.
7 Ka wà tacwugo si mpa bɛ̂ ŋgurotaha na,
ka ŋgure si uru cû,
u ɲyɛ a jà a yasɛɛre pyi mɛ.
8 Ŋka wà tacwugʼà pa bɛ̂ ɲìŋke tacɛnŋke na,
maa fyîn maa yîri fwɔfwɔ.
Sùmacire tà à sùmapyaŋi se mà nɔ ŋkuu ŋkuu (100) na,
tà mpyi beetaanre taanre (60) tà mpyi beɲjaaga ná kɛ kɛ.
9 Ŋgemu la ká mpyi si karii yyaha cè ke,
urufoo u u niŋgyigigii cyán sèlʼe.»
10 Yesu à puru jwumpe jwo a kwɔ̀ ke,
ka u ná u cyelempyiibii kɛ ná shuunniŋi ná shiin niŋkin niŋkin si yîri sùpyire sannte taan.
Ka pire si sà a u yíbili u bàtaayi ɲwɔhe na.
11 Ka u u pi pyi:
«Kani lʼà yyaha tíi ná Kile Saanre e ná lʼà ŋwɔhɔ ke,
yii á lire ɲcèŋʼà kan.
Ŋka mpe jwumpe puni ɲwɔhʼà ŋwɔhɔ sùpyire sannte na.
12 Lire kurugo
“pi na Kile kapyiiŋkii wíi maa ɲcyé cyi ɲyaga,
pi na Kile jwumpe núru maa ɲcyé pu lógogo,
ɲaha na yɛ nde pi la ɲyɛ si zìi vyìinnɛ ke,
lire li ɲyɛ,
mà núrʼa sà piye kan Kile á,
bà pi kapegigii si mpyi si yàfa pi na mɛa.”»
13 Ka Yesu si yi jwo pi á sahaŋki:
«Yii aha mpyi yii ɲyɛ a ŋke bàtaage yyahe cè mɛ,
di yii sí yi sanɲyi yyahe cè n‑jwo yɛ?
14 Ɲɛɛnuguŋi u ɲyɛ Kile jwumpe jwufooŋi.
15 Kuni ɲwɔge na sùmashiŋi tacwugʼà pa bɛ̂ ke,
kuru ku ɲyɛ mu à jwo sùpyire tʼà Kile jwumpe lógo,
kuru tanuge e,
ka Sitaanniŋi si pu wwû pi funŋʼi ke.
16 Kafaafoge ɲuŋʼi sùmashiŋi tacwugʼà pa bɛ̂ ke,
kuru ku ɲyɛ mu à jwo sùpyire tʼà Kile jwumpe lógo,
maa ntílʼa ɲɛɛ pu na ná funntange e ke.
17 Ŋka pu ɲyɛ a jà a ndìre le tʼe mɛ,
tire ɲwɔmɛɛni kɛ̀ngɛmɛ ɲyɛ a pɛn mɛ.
Kawaa,
lire ɲyɛ mɛ yyefugo ká ti ta Kile jwumpe kurugo,
ti maha fworo Kile kuni i.
18 Ŋgure shwɔhɔlʼe sùmashiŋi tacwugʼà pa bɛ̂ ke,
kuru ku ɲyɛ mu à jwo sùpyire tʼà Kile jwumpe lógo,
19 ka diɲyɛŋi karigii funmpɛɛnre ná nàfuuŋi lage ná yaayi shiŋi puni lage si ti ta,
ka tire sɔ̀nŋɔre si pu cwɔ̂nrɔ,
pu ɲyɛ a jà a yasɛrɛ pyi mɛ.
20 Ɲìŋke niɲcɛnŋke na sùmashiŋi tacwugʼà pa bɛ̂ ke,
kuru ku ɲyɛ mu à jwo sùpyire tʼà Kile jwumpe lógo maa ɲɛɛ pu na ke,
tire sùpyire ti maha Kile ɲyii wuuni pyi.
Tire sùpyire na ɲyɛ sùmaseŋɛ fiige,
sùmacire tà à sùmaŋi se mà nɔ beɲjaaga ná kɛ kɛ na,
tà à yasɛɛre pyi mà nɔ beetaanre taanre (60) na,
tà à yasɛɛre pyi mà nɔ ŋkuu ŋkuu (100) na.»
Kile jwumpe na ɲyɛ fùkina fiige
21 Ka Yesu si núrʼa jwo pi á:
«Wà ɲyɛ na fùkina mîni si u le ɲcyígile yaaga ɲwɔhʼi mɛ,
ŋka u maha dùrugo yaage kà ɲuŋʼi.
22 Yii li cè,
kyaa maha kyaa lʼà ŋwɔhɔ ke,
cyire puni sí n‑pa raa ɲaa.
Kyaa maha kyaa lʼà yaa numpini i ke,
lire là mú sì n‑kwôro ɲcèmbaa mɛ.
23 Ŋgemu la ká mpyi si karii yyaha cè ke,
urufoo u u niŋgyigigii cyán sèlʼe.»
24 Maa núrʼà jwo pi á:
«Kile jwumpe yii na núru ke,
yii pu yaha yiye funŋʼi,
ɲaha na yɛ Kile sí yii kan n‑tàanna ná yii lógoŋkanni i.
Puru ɲwɔhɔ na,
u sí n‑pa tà bâra yii niɲcente na.
25 Lire tèni i,
shin maha shin u na ɲcaa si Kile jwumpe yyahe cè ke,
Kile sí là taha uru u niɲcempe na.
Ŋka shin maha shin u ɲyɛ u ɲyɛ na pu núru mɛ,
nimbileni u à cè ke,
lire sí n‑pînni.»
Kile Saanre na ɲyɛ sùmapya fiige
26 Ka Yesu si núrʼa jwo:
«Kile Saanre à fworo nde kani kurugo:
nàŋi wà u maha sùmashi nûru u kɛrɛge e.
27 Uru nàŋʼà ŋɔ́ɔ numpilage e yo,
u ɲyɛ ɲyii na canŋke e yo,
sùmapyaŋi sí n‑fyîn,
sùmacire sí raa lyɛge.
Ŋka nàŋi sì pà cè lire pyiŋkanni i mɛ.
28 Ɲìŋke maha sùmaŋi pyi u à fyîn,
sùmacige ku maha fyânha a fworo,
lire kàntugo sùmaɲcyahaŋkʼa sì nta a fworo sùmacige na,
kàsanrage na sùmapyaŋi maha mpa fworo sùmaɲcyahaŋke na.
29 Sùmapyaŋi ká lyɛ a nɔ u tɛgɛni na,
nàŋi maha ntílʼa kɔ̀ɔnŋaŋi lwɔ́ na u kwùun,
ɲaha na yɛ sùmakwɔngigii tènʼà nɔ.»
Kile Saanre maha sìi nimbilere maa mpêre
30 Ka Yesu si núrʼa jwo:
«Ná ɲaha shi i mii sí n‑jà Kile Saanre tàanna yɛ?
Ti ɲyɛ mu à jwo ɲaha bɛ?
31 Ti na ɲyɛ mu à jwo mutaridi cige yasɛrɛ,
nàŋi wà à sà ntemu nûgo u cikɔɔge e ke.
Kuru cige pyàŋʼà yîlege cire sannte puni wuŋi na.
32 Ŋka u aha nûgo,
u maha fyîn,
maa yîri maha ntòro kaɲyɛge yawyɛɛre puni taan.
Ku maha ŋkéɲyi yige,
yire maha mpêe fo saɲcyɛɛnre maha ti shèere yaa yi mbyìmpe e.»
33 Ɲyɛ yire bàtaayi shiŋi niɲyahaya Yesu mpyi maha yu sùpyirʼá mà tàanna ná ti yi ceŋkanni i.
34 Puru jwumpe shiŋi baare e,
u mpyi na pabɛrɛ yu ná tʼe mɛ.
Ŋka u ná u cyelempyiibii kanni ká mpyi tèni ndemu i ke,
u mpyi maha pu puni ɲwɔhe yu pi á.
Yesu à kafeebwɔhe yyéeŋɛ baŋi ɲuŋʼi
35 Kuru canŋke yàkoŋke,
ka Yesu si jwo u cyelempyiibilʼá:
«Wuu a sì baŋi kùŋke na.»
36 Ka pi i sùpyire cye yaha,
maa ŋkàre ná Yesu i baŋi ɲuŋʼi,
bakwooyi yabɛrɛ mpyi pi ɲwɔhʼi.
37 Ka kafeebwɔhɔ si yîri na fwu,
ka lwɔhe si wá na ɲcyânre na jyè bakwɔɔge e fo na ŋko si ku ɲî.
38 Yesu mpyi bakwɔɔge kàntugo yyére mà ɲùŋke taha ɲùntahaga na,
na ŋwúuni.
Ka pi i u ɲɛ̀ maa jwo:
«Cyelentuŋi,
wuu na ŋko si ŋkwôro lwɔhe e,
lire ɲyɛ a mu funŋɔ pɛn mà?»
39 U à ɲɛ̀ ke,
maa yîrʼa fànha cyán kafɛɛge na,
maa lwɔhe pyi ku tɛ̀ɛn.
Ka kafɛɛge si yyére,
ka lwɔhe si ntɛ̀ɛn siu!
40 Lire kàntugo ka Yesu si pi pyi:
«Ɲaha na yii na fyáge amɛ yɛ?
Ɲaha na yii sàha ŋkwɔ̀ a dá mii na mà yɛ?»
41 Ka u cyelempyiibii si fyá sèlʼe,
marii yi yu piyʼá:
«Jofoo u ɲyɛ ŋge nàŋi fo ka kafɛɛge ná lwɔhe si ntɛ̀ɛn u wuuni taan yɛ?»