Macwo Jwumpe Nintanmpe Jwuŋkanni
Mpe yii à yaa yii cè mà jwo yii jyè sémɛŋi funŋɔ jwumpe e ke
Yesu cyelempyaŋi Macwo pi maha u pyi Levi ke, uru u à ŋge sémɛŋi sémɛ, múnalwɔɔre shwofoo u mpyi u wi. Ŋka mà jwo u pyi Yesu cyelempya ke, u à múnalwɔɔre shwoshwo báaraŋi yaha. Yesu kareŋkwooni kàntugo nìɲyiŋi na, Macwo à Yesu kapyiiŋkii sémɛ, si li cyêe sùpyaŋi shiŋi u ɲyɛ Yesu ke, si li cyêe mú na Shwofooŋi kyaa Kile mpyi a jwo na u sí n‑pa ke, uru u ɲyɛ Yesu.
Yyee niɲyahagii funŋʼi Yahutuubii mpyi na Kile Niɲcwɔnrɔŋi pi Shwofooŋi mpaŋi sigili. Kile tùnntunmpilʼà jwo uru Shwofooŋi mpaŋi kyaa na. Macwo sémɛŋʼà li cyêe na pyàŋi u à si Bɛtilɛhɛmu kànhe e, ná u mɛge ɲyɛ Yesu ke, uru u ɲyɛ uru Shwofooŋi. Karigii cyi à li cyêe na Yesu u ɲyɛ uru Shwofooŋi ke, Macwo sémɛŋʼà cyire puni kyaa jwo. Jwumpe Kile tùnntunmpilʼà jwo fo tèemɔni i ke, Macwo à núru puru pà kurugo maa li cyêe na nde Yesu mpyi na mpyi ke, Kile tùnntumpilʼà jwo lire kyaa na mà jwo u pa ke.
Macwo mú à li cyêe na Yesu u ɲyɛ Yahutuubii saanŋi ŋgemu u à Kile Saanre ɲwɔ cû ɲìŋke na ke. Mpii pi à taha u fye e ke, pyiŋkanni na Kile Saanre sùpyaŋʼà yaa u pyi ke, u maha pire kâlali lire na. Ti ɲyɛ saanre sannte fiige mɛ. Kile Saanre sùpyaŋʼà yaa u Kile kyaa táan uyʼá u tòro wyɛ́rɛŋi na, nde u la ɲyɛ sùpyire sannte tʼa mpyi urʼá ke, u raa lire pyi tʼá (7.12) u u u zàmpɛɛnbii kyaa táan uyʼá mú (6.44).
Ɲyɛ sùpyirʼà Yesu bò, ŋka Kile à u ɲɛ̀. Lire kàntugo Yesu à uye cyêe u cyelempyiibii na, maa pi pyi na pi a Jwumpe Nintanmpe yu ɲìŋke supyishiŋi punʼá.
Mà jwo Yesu u si ke, Kile mpyi a jwo na u mɛge sí n‑pyi: «Emanuwɛli». Kuru mɛge ɲwɔhe ku ɲyɛ: «Kile na ɲyɛ ná wuu e» (1.23). Yesu cye kurugo, Kile à pa sùpyire shwɔhɔlʼe. Mpe jwumpe pʼà tɛ̀gʼa sémɛŋi ɲùŋɔ kuu na: «Mii na ɲyɛ ná yii e canŋa maha canŋa fo si sà nɔ diɲyɛŋi tèekwooni na» (28.20).