Yesu à cyeŋkwugofoo cùuŋɔ canŋɔŋke
3
Canŋka Yesu à núrʼa jyè Kile Jwumpe kàlambage e,
mà sà nàŋi wà ta wani ná cyeŋkwuge e.
2 Ka pi i wá na u kàanmucaa,
kampyi u sí uru nàŋi cùuŋɔ canŋɔŋke e,
si nta tìgire cyán u na.
3 Ka u u jwo cyeŋkwugefooŋʼá na u yîrʼa yyére sùpyire shwɔhɔlʼe,
pi raa u ɲaa,
4 maa pi yíbe:
«Mà tàanna ná Kile Saliyaŋi i,
kacɛnni mpyiŋi u à ɲwɔ canŋɔŋke e laa,
kapiini mpyiŋi?
Mà sùpya múnaa shwɔ laa,
mà sùpya múnaa wwûa?»
Ka pi puni si fyâha.
5 Ka Yesu si ɲyiŋkeni le pi e,
maa yyahe tanha pi na,
u à li ta pi ɲyɛ a cyeŋkwugefoo ɲùɲaare ta mɛ.
Maa jwo cyeŋkwugefolʼá:
«Ma cyɛge sànhana.»
U à ku sànhana ke,
ka ku u ɲcùuŋɔ.
6 Ɲyɛ Farizhɛɛnbii pi mpyi wani ke,
ka pire si fworo Kile Jwumpe kàlambage e,
maa ntílʼa kàrʼa sà wwɔ̀ ná Erɔdi toŋkuni shiinbilʼe Yesu boŋkanni kyaa na.
Shinɲyahara la ɲyɛ si Yesu ɲya
7 Ka Yesu ná u cyelempyiibii si fworʼa kàre Galile baŋi kàmpanŋke na.
Supyikuruŋɔ nimbwɔhɔ mpyi a taha u fye e.
Tire sùpyire mpyi a yîri Galile kùluni ná Zhude wuuni
8 ná Zheruzalɛmu kànhe ná Iduma kùluni ná Zhurudɛn baŋi kàntugo yyére kùluni ná Tiri ná Sidɔn kànyi na.
U kapyiiŋkii kyaa sùpyire mpyi na núru,
maa ntaha u fye e.
9-10 U mpyi na shinɲyahara cùuŋi,
lire e yampii puni la mpyi si bwɔ̀n u na.
Ka u u li ɲáare u cyelempyiibilʼá na pi bakwɔɔge kà bégelʼa yaha urʼá,
uru ká bú ŋkwɔ̀ a jà laaga wwû sùpyire na,
tʼàha bú uru fɛnrɛ mɛ.
11 Jínacyaan nʼa mpyi a u ɲya,
pi mpyi maha ɲcwo u fere e,
maa ŋkwúulo,
maa jwo:
«Kile Jyaŋi u ɲyɛ mu!»
12 Ŋka Yesu mpyi maha yi jwo a waha pi á na pi àha sùpya yaha u yi cè mɛ.
Yesu tùnntunmpii kɛ ná shuunniŋi ɲcwɔɔnrɔŋi kani
13 Lire kàntugo ka Yesu si dùgo ɲaŋke kà na.
Mpii kyaa li ɲyɛ u na ke,
maa pire yyerʼa yige pi sanmpii shwɔhɔlʼe,
ka pire si n‑kàre u fye e.
14 Shiin kɛ ná shuunni u à cwɔɔnrʼa pyi u tùnntunmpii pi i mpyi ná u e tèrigii puni i,
u sʼa pi tunni pi raa Kile jwumpe yu,
15 maa fànhe kan pi á,
pi jà pi a jínabii kɔ̀re pi a yige pifeebilʼe.
16 Shiin kɛ ná shuunniŋi u à cwɔɔnrɔ ke,
pire mɛyi yi ɲyɛ:
Simɔ ná Yesu à u mɛge le Pyɛri ke,
17 ná Zebede jyaabii Yakuba ná Yuhana,
Yesu mpyi maha pire yiri Bwonɛrizhe,
lire ɲwɔhe ku ɲyɛ pi fànhʼà ɲyaha kiletinni fiige,
18 ná Andire ná Filipi ná Baritelemi ná Macwo ná Tomasi ná Alife jyaŋi Yakuba ná Taadib ná Simɔ,
pi maha mpyi Zelɔtic ke,
19 ná Zhudasi Isikariyoti,
ŋge u sí n‑pa Yesu le cye e ke.
Pyiŋkanni na Yesu maha jínabii kɔ̀re ke
20 Lire kàntugo Yesu ná u cyelempyiibilʼà núrʼa pa pyɛngɛ,
ka shinɲyahara si núrʼa pa pi ɲwɔ tò sahaŋki ná pi funmpɛn karigilʼe,
fo mà u ná u cyelempyiibii pyi pi ɲyɛ a talyige ta mɛ.
21 Yesu cìnmpyiibilʼà u kapyiiŋkii kyaa lógo ke,
maa wá na sɔ̂nŋi na u ɲùmbwuunʼà kɛ̀ɛgɛ,
maa shà zà u cû.
22 Kile Saliyaŋi cyelentiibii pi à yîri Zheruzalɛmu kànhe e ke,
ka pire si wá na ŋko na jínabii ɲùŋufooŋi Bɛlizebuli u ɲyɛ Yesu i,
na ná uru fànhe e u na jínabii kɔ̀re na yige pifeebilʼe.
23 Ɲyɛ ka Yesu si pi yyere,
maa bàtaaya jwo pi á.
U à jwo:
«Sitaanniŋi sí n‑jà uye kɔ̀rɔ la?
24 Kìre maha kìre li ɲyɛ na liye tùnni ke,
lire kìni fànhe maha ŋkwɔ̀.
25 Pyɛngɛ maha pyɛngɛ shiin ká yîri piye kurugo ke,
kuru pyɛnge fànhe maha ɲcyɛ́rɛ.
26 Sitaanniŋi ká a u báarapyiibii kɔ̀re,
u na uye tùnni.
Lire ká mpyi,
u fànhe sí n‑cyɛ́rɛ si mpa ŋkwɔ̀.
27 Wà sì n‑jà n‑jyè fànhaɲyahagafoo bage e si u yaayi lwɔ́,
ná u ɲyɛ a bage foo pwɔ a cyán maa nta a jyè mà yɛ.
Urufoo ká jà a u pwɔ a cyán,
lire e u maha jà a bage yaayi pyi u ɲɛɛmpe.
28 Sèeŋi na mii sí yi jwo yii á,
sùpyire kapegigii ná ti Kile mɛkɛɛgɛ karigii puni sí yàfa ti na,
29 ŋka ŋgemu ká Kile Munaani mɛge kɛ̀ɛge ke,
lire sì n‑sìi yàfa urufoo na mɛ,
urufoo sí lire kapiini tugure lwɔ́ fo tèekwombaa.»
30 Yesu à yire jwo amuni,
ɲaha na yɛ pi mpyi na ŋko na jínaŋi wà u ɲyɛ u e.
Mpii pi ɲyɛ Yesu nuŋi ná Yesu cìnmpyiibii ke
31 Mà Yesu yaha kuru cyage e,
u nuŋi ná u cìnmpyiibilʼà pa yyére cyíinŋi na,
maa wà tun u u yyere.
32 Shinɲyahara mpyi a tɛ̀nnʼa u kwûulo,
ka pi i mpa yi jwo u á:
«Mu nuŋi ná mu cìnmpyiibii naha cyíinŋi na,
pi naha na mu kyaa pyi.»
33 Ka u u pi pyi:
«Mpire pi ɲyɛ mii nuŋi ná mii cìnmpyiibii yɛ?»
34 Ka u u ɲyiigii yîrigʼa le sùpyire e,
maa jwo:
«Mpii nintɛɛnbii pi ɲyɛ mii nuŋi ná mii cìnmpyiibii.
35 Yii li cè,
ŋge u ɲyɛ na Kile ɲyii wuuni pyi ke,
uru u ɲyɛ mii cìnmpworoŋi ná mii nuŋi.»