Yesu à u cyelempyiibii taanna Kileɲarege pyiŋkanni na
11
Canŋka Yesu mpyi na Kile ɲáare cyage kʼe.
U à kwɔ̀ Kileɲarege na ke,
ka u cyelempyaŋi wà si u pyi:
«Kafooŋi,
wuu taanna Kileɲarege pyiŋkanni na,
bà Yuhana a u cyelempyiibii taanna ku na mɛ.»
2 Ka Yesu si u pyi:
«Yii aha a si raa Kile ɲáare,
yii jwo:
“Tufooŋi,
mu mɛge ku táan.
Ma pyi saanwa sùpyire puni ɲùŋɔ na.
3 Wuu canŋa maha canŋa ɲjyìŋi kan wuu á.
4 Wuu kapegigii yàfa wuu na,
ɲaha na yɛ wuu maha wuu shinɲɛɛbii wogigii puni yàfani pi na.
Ma hà yaaga yaha ku wuu yyaha kɛ̂ɛnŋɛ kapegigilʼá mɛ.”»
5 Ɲyɛ maa núrʼa pi pyi:
«Lʼaha mpyi mu à jwo cevoo na ɲyɛ yii wà á,
ka urufoo si yîrʼa kàre ɲìɲiŋke na uru cevooŋi yyére,
maa sà u bage kúu mà jwo “Na cevoo,
bwúuru ɲùɲyi taanre kan na á,
6 ɲaha na yɛ mii à nàmpɔnŋɔ ta,
yalyire sí naha mii u kan u á mɛ.”
7 Yii na sɔ̂nŋi na uru cevooŋi sí n‑tɛ̀ɛn bage funŋke e si jwo “Ma hà zìi mpa na yyaha fwɔ́hɔrɔ mɛ.
Mii à bage tò a kwɔ̀,
mii ná na pyìibii naha a sínnʼa kwɔ̀,
mii saha naha na sì n-jà n-yîri bwúuru kan mu á mɛ” la?
8 Mii sí yi jwo yii á,
u mɛ́ɛ ká mpyi u ɲyɛ a yîrʼa bwúuruŋi kan mu á yii cempe kurugo mɛ,
u mɛkɛgerea yyaha na,
yaaga maha yaaga mu ɲyɛ na ɲcaa ke,
u sí n‑yîri kuru kan mu á.
9 Mii sí yi jwo yii á,
yii a Kile ɲáare,
u sí yii kan,
yii a ɲcaa,
yii sí n‑ta,
yii a bàrage kúuli,
ku sí múgo yii á.
10 Ɲaha kurugo yɛ shin maha shin u ɲyɛ na Kile ɲáare ke,
Kile sí urufoo kan.
Ŋgemu u ɲyɛ na ɲcaa ke,
urufoo sí n-ta.
Ŋgemu ká a bàrage kúuli ke,
ku sí múgo urufolʼá.
11 Jofoo u ɲyɛ yii shwɔhɔlʼe,
ŋgemu u sí ɲɛɛ wwò kan u pyàŋʼá mà li ta fya u à ɲáare u á yɛ?
12 Lire ɲyɛ mɛ,
mà nɔ́ŋgyaa lwɔ́ a kan u á,
mà li ta ŋkùcere u à ɲáare yɛ?
13 Ɲyɛ yii sùpyiibii pi à pi ke,
cyage e yii maha jà a yacɛnɲyɛ kan yii pyìibilʼá ke,
yii ɲyɛ a cè a jwo na yii Tuŋi u ɲyɛ nìɲyiŋi na ke,
na urʼà bégelʼa tòro yii taan si u Munaani le u ɲáarafeebilʼe mà?»
Pyiŋkanni na Yesu maha jínabii kɔ̀re ke
14 Canŋka Yesu mpyi na jínaŋi wà kɔ̀re na yige nàŋi wʼe,
uru jínaŋi mpyi a nàŋi pyi búbu.
Tèni i jínaŋʼà pa fworo u e ke,
ka uru nàŋi si li ɲwɔ cû na yu.
Sùpyire ti mpyi wani ke,
ka li i pi puni kàkyanhala.
15 Ŋka pìlʼà jwo sùpyire shwɔhɔlʼe,
na jínabii ɲùŋufooŋi Bɛlizebulib u à síŋi kan Yesu á,
u u jínabii kɔ̀re na yige pifeebilʼe.
16 Pìi la na mpyi si Yesu pɛrɛ ɲcû,
maa jwo na u kani là pyi ndemu li sí li cyêe pire na na u à fworo Kile e ke.
17 Ŋka Yesu mpyi a pi funzɔnŋɔre cè maa yi jwo pi á:
«Kìre maha kìre li ɲyɛ na liye tùnni ke,
lire maha mpa jya.
Pyɛngɛ maha pyɛngɛ shiin ká yîri piye kurugo ke,
kuru maha mpa jya mú.
18 Ná yii na sɔ̂nŋi na jínabii ɲùŋufooŋi Bɛlizebuli fànhe cye kurugo mii ɲyɛ na jínabii kɔ̀re na yige sùpyire e,
ɲyɛ Sitaanniŋi báarapyiibii ká ntáa maa piye tùnni,
pi saanre sì n‑kwɔ̀ mà?
19 Yii aha jwo na mii na jínabii kɔ̀re na yige pifeebilʼe ná Bɛlizebuli fànhe e,
lire sanni i ke,
yii shiinbii pi ɲyɛ na pi kɔ̀re ke,
ná jofoo u fànhe e pire maha pi kɔ̀re yɛ?
Yii shiinbii yabilimpii pi sí jwumpe pyi pu cwo yii ɲuŋʼi.
20 Ŋka mii aha a jínabii kɔ̀re na yige pifeebilʼe ná Kile fànhe e,
lirʼà li cyêe na Kile Saanre à nɔ yii na mà kwɔ̀.
21 Yii li cè na fànhaɲyahagafoo ká kàshikwɔnyaaya lwɔ́ a tɛ̀ɛn u pyɛnge ɲwɔge na marii ku saɲcwɔnŋi sigili,
sùpya sì n‑jà u yaage kà lwɔ́ mɛ.
22 Ŋka wabɛrɛ ká mpa ɲcwo pyɛngefoo na,
ŋgemu u à fànha tò u na,
maa jà u na ke,
pyɛngefoo cyɛge mpyi a taha kàshikwɔnyaayi ɲjemu na ke,
urufoo sí yire shwɔ u na,
si u cyeyaayi cyán zhwɔ u na,
si ntáa.
23 Shinŋi u ɲyɛ u ɲyɛ ná mii i mɛ,
urufoo ɲyɛ mii zàmpɛn,
ŋgemu u ɲyɛ u ɲyɛ na mii tɛ̀re na sùpyire wàa tiye na mɛ,
urufoo na ti ɲùŋɔ kyánge.
24 Jína ká fworo sùpya e,
u maha sà ɲaara síwage yyaha kurugo,
maa tatɛɛngɛ cya.
U aha mpyi u ɲyɛ a kà ta mɛ,
u maha jwo “Mii sí núru raa wà na tayirige e.”
25 Ɲyɛ u aha núrʼa pa urufoo ta baga fiige ŋkemu kʼà pwɔ́ maa ku funŋke bégelʼa ɲwɔ ke,
26 u maha núrʼa kàrʼa sà jínahii baashuunni lwɔ́ a bâra uye na,
mpii pi à pi mà tòro u yabiliŋi na ke,
maha mpa jyè urufolʼe.
Lire ká mpyi,
urufoo pyiŋkanni nivɔnnʼa sì nâara a pi mà tòro niɲjyeeni na.»
Shinŋi wuuni lʼà ɲwɔ ke
27 Ɲyɛ mà Yesu yaha puru jwumpe na,
ka ceeŋi wà si jwumpe lwɔ́ sùpyire shwɔhɔlʼe maa jwo u á:
«Ceeŋi u à mu si maa mu byé ke,
uru wuunʼà ɲwɔ dɛ!»
28 Ka Yesu si ceeŋi pyi:
«Ŋgemu u ɲyɛ na Kile jwumpe núru,
marii pu kurigii ɲaare ke,
urufoo wuunʼà sàa ɲwɔ.»
Yesu tayyéregʼà fànha tò Zhonasi woge na, ŋka sùpyire ɲyɛ a u ɲwɔmɛɛni cû mɛ
29 Sùpyirʼà pa bínni mà Yesu kwûulo ke,
ka u u jwo:
«Nte sùpyirʼà pi.
Ti la na ɲyɛ mii u kakyanhala kani là pyi si ɲcyêe ti na ndemu lʼà li cyêe na mii à fworo Kile e ke.
Ŋka nde lʼà pyi Kile tùnntunŋi Zhonasi na ke,
lire baare e kakyanhala kyaa saha sì n‑pyi n‑cyêe ti na mɛ.
30 Nde lʼà pyi Zhonasi na ke,
lirʼà li cyêe Ninive kànhe shiinbii na na Kile u mpyi a u tun.
Lire pyiŋkanni na,
nde li sí n‑pa Supyaŋi Jyaŋi ta ke,
lire li sí li cyêe nte sùpyire na na Kile u à u tun.
31 Canŋke Kile sí sùpyire puni sâra si ntàanna ná ti kapyiiŋkilʼe ke,
saancwoŋi u mpyi Sheba kìni ɲùŋɔ na ke,
uru sí n‑pa n‑yîri n‑yyére,
si nte sùpyire cɛ̂ɛgɛ,
ɲaha na yɛ uru saancwoŋi mpyi a yîri diɲyɛŋi ɲùŋke kà na,
mà sà saanŋi Solomani yákilifente jwumpe lógo.
Mà li ta wà na ɲyɛ naha,
ŋgemu u yákili u à pêe Solomani wuŋi na ke,
ti sí ɲyɛ a ɲɛnʼa lógo uru ɲwɔ na mɛ.
32 Kuru canŋke,
Ninive shiinbii mú sí n‑pa n‑yîri n‑yyére,
si nte sùpyire cɛ̂ɛgɛ,
ɲaha na yɛ Zhonasi mpyi a sà Kile jwumpe jwo Ninive shiinbilʼá ke,
pi à pi toroŋkanni kɛ̂ɛnŋɛ.
Mà li ta wà na ɲyɛ naha,
ŋgemu u tayyérege kʼà fànha tò Zhonasi woge na ke,
nte sùpyire sí ɲyɛ a ɲɛnʼa ti toroŋkanni kɛ̂ɛnŋɛ mɛ.»
Bɛ̀ɛnmpe sèe wumpe kani
33 Ka Yesu si núrʼa jwo:
«Wà ɲyɛ na fùkina mîni si u le ɲcyígile cere ɲwɔhʼi mɛ.
Ŋka u maha dùrugo yaage kà ɲuŋʼi,
bà u si mpyi sʼa bɛ̀ɛnmpe yige bage jyifeebilʼá mɛ.
34 Sùpyaŋi ɲyiigii cyi ɲyɛ u bɛ̀ɛnmpe.
Ŋgemu u ɲyii cyi à ɲwɔ ke,
urufoo puni maha mpyi bɛ̀ɛnmpe e mú.
Ŋgemu wogigii sí cyi à kɛ̀ɛge ke,
urufoo puni mú maha mpyi numpini i.
35 Lire e ke yii yiye kàanmucya a wíi,
yii bɛ̀ɛnmpe kà bú ŋkwɔ̀ nta numpire mɛ.
36 Yii ɲyiigii ká ɲwɔ sèe sèlʼe,
làmpaŋi bɛ̀ɛnmpe sí yii pyi yii a ɲaa yii a ɲcwúu kuni i.»
Yesu à Farizhɛɛnbii ná Saliyaŋi cyelentiibii cɛ̂ɛgɛ
37 Mà Yesu yaha puru jwumpe na,
ka Farizhɛnŋi wà si sà u yyere na u pa lyî uru yyére,
ka u u ɲɛɛ.
Tèni i pi à ɲjyìŋi kwûulo si raa lyî ke,
38 ka li i Farizhɛnŋi kàkyanhala,
ɲaha na yɛ u à li kàanmucya mà li ɲya na Yesu ɲyɛ a u cyeyi jyè mà tàanna ná Yahutuubii làdaabilʼe,
maa nta na lyî mɛ.
39 Kafooŋi Yesu à li ɲya lʼà Farizhɛnŋi kàkyanhala ke,
maa pi pyi:
«Yii Farizhɛɛnbii pi ke,
yii maha yii yajigiyi kàntuyi jyíi na fíniŋi,
mà li ta yii funɲyʼà ɲî nàŋkaage ná pege karigii na.
40 Yii na ɲyɛ sìɲconyɔ!
Kileŋi u à yaage kàntuge yaa ke,
uru mú bà u à ku funŋke yaa mà?
41 Yii nàŋkaage ná pege yaha,
yii raa yii cyeyaayi kaan fòŋɔfeebilʼá.
Lire ká mpyi,
yii sí n‑pyi fyìnmɛ sùpyii.
42 Yii Farizhɛɛnbii pi ke,
yii wuunʼà kɛ̀ɛge!
Ɲaha na yɛ yii maha yii nànayeŋi ná kaɲyɛyi yafwɔhɔfwɔhɔre sannte puni yáhaŋi wwû,
yii sí ɲyɛ na katiigii pyi,
maa Kile kyaa táan yiyʼá mɛ.
Mà li ta lire lʼà yaa li pyi yii kapyiini niɲcyiini,
yii i nta a cyi sanŋkii bâra lire na.
43 Yii Farizhɛɛnbii pi ke,
yii wuunʼà kɛ̀ɛge!
Ɲaha na yɛ yii aha ŋkàre Kile Jwumpe kàlambayi i,
bwompe tatɛɛnyi yii maha ɲcaa.
Sùpyire tabinniyi i yii la maha mpyi sùpyire sʼa yii pêre sʼa yii shɛ́ɛre.
44 Yii wuunʼà kɛ̀ɛge!
Yii na ɲyɛ mu à jwo fanɲjyeye,
sùpyire maha ɲaare na ntùuli ɲjemu ɲuŋʼi piye pàama ke.»
45 Mà Yesu yaha puru jwumpe na,
ka Kile Saliyaŋi cyelentuŋi wà si jwo:
«Cyelentuŋi,
mpe jwumpe saha ɲyɛ Farizhɛɛnbii kanni wumɔ mà dɛ!
Mu na wuu cyere mú dɛ!»
46 Ka Yesu si u pyi:
«Yii Kile Saliyaŋi cyelentiibii wuunʼà kɛ̀ɛge mú,
ɲaha na yɛ yii à Kile Saliyaŋi pyi tuguro sùpyire ɲuŋʼi,
pi sì n‑jà ntemu lwɔ́ mɛ.
Yii yabilimpii mú sí ɲyɛ na ɲɛɛgʼa pi tɛ̀gɛ ti ɲjwòŋi na,
ali nimbilere mɛ.
47 Yii wuunʼà kɛ̀ɛge!
Ɲaha na yɛ yii tulyeyʼà Kile tùnntunmpii mpiimu bò tèecyiini i ke,
yii à pire kwɔ̀nhigii yaa na faanre.
48 Lire lʼà li cyêe na kapegigii yii tulyeyʼà pyi ke,
na cyirʼà bɛ̂ yii á,
ɲaha na yɛ pirʼà Kile tùnntunmpii bò.
Ŋka yii pi ke,
yii na pi kwɔ̀nhigii faanre.
49 Kile à tɛ̀ɛn u yákilifente e maa jwo “Mii sí raa na tùnntunmpii pìi tunni pi á,
pi sí pìi bò si pi sanmpii kyérege.”
50 Lire kurugo Kile tùnntunmpii pi à bò mà lwɔ́ fo tèecyiini i ke,
Kile sí n‑pa yii ná yii tulyeyi cɛ̂ɛgɛ pire kyaa na,
51 mà lwɔ́ Abɛli mbòŋi na,
fo mà sà nɔ Kile tùnntunŋi Zakari mbòŋi na,
Zakari pi à bò Kileɲaarebage sèecyage ná sárayi tawwuge shwɔhɔlʼe ke.
Sèeŋi na mii sí yi jwo yii á,
Kile sí yii ná yii tulyeyi cɛ̂ɛgɛ tire boore puni kurugo.
52 Yii Kile Saliyaŋi cyelentiibii,
yii wuunʼà kɛ̀ɛge!
Ɲaha kurugo yɛ kuni li maha sùpyire pyi tʼà Kile jwumpe cè ke,
yii à para pi yaha lire kuni i.
Yii yabilimpii ɲyɛ na lire kuni ɲaare mɛ,
mpii la ku ɲyɛ sʼa li ɲaare ke,
maa pire tɛgɛlɛ kwɔ̀n.»