Yesu à Kile Saliyaŋi cyelentiibii ná Farizhɛɛnbii cɛ̂ɛgɛ
23
Ɲyɛ supyiɲyahare ti mpyi a taha Yesu fye e ke,
ka u u tire ná u cyelempyiibii pyi:
2 «Kile Saliyaŋi cyelentiibii ná Farizhɛɛnbii ɲyɛ ndemu laage e ke,
lire li ɲyɛ:
na Musa Saliyaŋi yyaha yu sùpyirʼá.
3 Karigii pi ɲyɛ na yu yii á ke,
yii cyire le baragʼe yii raa cyi kurigii ɲaare,
ŋka nde pi yabilimpii ɲyɛ na mpyi ke,
yii àha raa lire pyi mɛ.
Ɲaha kurugo yɛ nde pi maha yu ke,
lire bà pi maha mpyi mɛ.
4 Pi maha Kile Saliyaŋi pyi tuguro sùpyire ɲuŋʼi,
ti sì n‑jà ntemu lwɔ́ mɛ,
pi yabilimpii sí ɲyɛ na ɲɛɛgʼa sùpyire tɛ̀gɛ ti ɲjwòŋi na,
ali nimbilere mɛ.
5 Pi kapyiiŋkii puni ɲyɛ sùpyire ɲyiɲyaga karigii.
Lire kurugo yaayi i pi maha Kile Jwumpe sémɛ maha le a pwɔ pi byahigii ná pi cyeyi na ke,
pi maha yire pyi nitabaaya.
Mà bâra lire na,
pi maha pi vàanntinmbwoyi zhwɔ̀ɔnre tɔɔna.
6 Wà ha pi yyere kataan ɲjyì na,
lire ɲyɛ mɛ pi aha shà Kile Jwumpe kàlambayi i,
bwompe tatɛɛnyi pi maha ɲcaa.
7 Sùpyire tabinniyi i,
pi la maha mpyi sùpyire sʼa pire pêre sʼa pi shɛ́ɛre,
sʼa pi yiri “Cyelentuŋi”.
8 Ŋka yii pi ke,
yii àha ɲɛɛ sùpya u a yii pyi “Cyelentuŋi” mɛ,
ɲaha na yɛ yii mú puni na ɲyɛ cìnmpyii,
Cyelentu niŋkin u ɲyɛ yii á.
9 Yii àha raa sùpyaŋi wà tufiige yiri “Tufooŋi” ɲìŋke na mɛ,
ɲaha na yɛ Tufoo niŋkin u ɲyɛ yii á,
uru u ɲyɛ nìɲyiŋi na.
10 Yii àha sùpyire yaha tʼa yii pyi “Ɲùŋufooŋi” mɛ,
ɲaha na yɛ Ɲùŋufoo niŋkin u ɲyɛ yii á,
uru u ɲyɛ Kile Niɲcwɔnrɔŋi.
11 Ŋgemu u ɲyɛ yii shwɔhɔlʼe shinbwoŋi ke,
urufoo u pyi yii sanmpii báarapyi.
12 Shin maha shin u à uye dùrugo ke,
urufoo sí n‑tîrige,
ŋka shin maha shin u à uye tîrige ke,
urufoo sí n‑dùrugo.
13 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii na Kile Saanre tajyiɲwɔge tùni,
yii sì n‑jyè mɛ,
mpii la ku ɲyɛ si jyè ke,
maa pire tɛgɛlɛ kwɔ̀n.
[
14 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii maha leŋkwucyeebii cyeyaayi shuu pi na ná yii ɲwɔtanyi i.
Yii maha Kile ɲáare na mɔni sùpyire ɲyiɲyage na.
Lire kurugo nde li sí n‑pa yii ta ke,
lire sí n‑waha sèlʼe.]
15 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii maha ɲaare ɲìŋke ná lwɔhe cyeyi puni ɲuŋʼi,
maa sùpyire caa na lèŋi yii Kile kuni i.
Ŋka yii aha wà ta,
nde li sí urufoo pyi u yaa ná nafugombaage ɲjyìŋi i fo tooyi shuunni mà tòro yii yabilimpii taan ke,
lire kuni yii maha le urufoo taan.
16 Yii wuunʼà kɛ̀ɛge!
Ɲaha na yɛ yii fyinmii wuubii pi à sùpyire yyaha cû,
maa ŋko pi á na sùpya ká ŋkâa Kileɲaarebage na,
kuru ŋgwùŋi ɲyɛ fànha urufoo na mɛ,
ŋka wà ha ŋkâa Kileɲaarebage funŋke sɛɛnŋi na,
kuru ŋgwùŋi na ɲyɛ fànha urufoo na.
17 Yii na ɲyɛ funŋɔ baa shiin maa mpyi fyinmii,
sɛɛnŋi u à fànha tò laa,
Kileɲaarebage kʼà sɛɛnŋi le ɲjire e ke,
kuru kʼà fànha tò?
18 Yii à jwo mú na sùpya ká ŋkâa sárayi tawwuge na,
na yafyin sì urufoo ta mɛ,
ŋka sárage yaage kʼà wwûlʼa yaha sárayi tawwuge ɲuŋʼi ke,
na sùpya ká ŋkâa kuru na,
na urufolʼà yaa u kuru kàage wwû.
19 Fyinmii pi pi!
Sárage yaage kʼà fànha tò laa,
sárayi tawwuge ku maha sárage le ɲjire e ke,
kuru ki?
20 Shinŋi u à kâa sárayi tawwuge na ke,
urufoo mú à kâa ku ɲùŋɔ yaayi puni na.
21 Shinŋi u à kâa Kileɲaarebage na ke,
urufolʼà kâa Kileɲaarebage ná ku fooŋi Kile na.
22 Shinŋi u à kâa nìɲyiŋi na ke,
urufolʼà kâa Kile saanre yatɛɛnŋke ná ku tɛɛnfooŋi Kile na.
23 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii maha yii nànayeŋi ná kaɲyɛyi yafwɔhɔfwɔhɔre sannte puni yáhaŋi wwû,
mà li ta karigii cyi à fànha tò Saliyaŋi kapyaagii puni na ke,
yii à cyire fɛ̂nnʼa yaha ŋkere na.
Cyire cyi ɲyɛ:
ntìiŋi ná ɲùɲaare ná ɲwɔmɛɛfente.
Cyire yii sí mpyi a yaa yii a mpyi,
yii i cyi sanŋkii bâra cyire na.
24 Fyinmii pi pi!
Yii à sùpyire yyaha cû mà li ta yii yabilimpii ɲyɛ na ɲaa mɛ.
Yii maha yii lùbyage fyiinnɛ si sisɔnŋi wwû kʼe,
mà li ta yii na ɲwɔhɔyi jwoore kʼeb!
25 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii maha yii yajigiyi kàntuyi jyíi na fíniŋi,
mà li ta yi funɲyʼà ɲî nàŋkaage ná sɔ̀nŋɔpeere na.
26 Yii Farizhɛɛnbii,
yii na ɲyɛ fyinmii!
Yajigiyi funɲyi yii à yaa yii fyânha a jyé,
lire ká mpyi,
kàntugo yyéreŋi mú maha fíniŋɛ.
27 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii na ɲyɛ mu à jwo fanɲjyeye,
pi à ɲjemu fíniŋɛ ke,
mu aha yi kàntuge wíi,
mu a sì yi lemɛ ta pʼà ɲwɔ,
yi funŋke sʼà ɲî kaciiyi ná kàkyayi nac.
28 Amuni yii ɲyɛ,
yii maha yiye pyi mu à jwo yii à tíi sùpyire sannte ɲyii na,
mà li ta yii à fyìnmɛ tò wwomɔ na,
yii funɲyi sʼà ɲî pege na.
29 Yii Kile Saliyaŋi cyelentiibii ná Farizhɛɛnbii,
yii pi à fyìnmɛ tò wwomɔ na ke,
yii wuunʼà kɛ̀ɛge!
Ɲaha na yɛ yii maha Kile tùnntunmpii kwɔ̀nhigii yaa na faanre,
sùpyire tʼà tíi ke,
maa kacɛnŋkuure yaa tire kwɔ̀nhigii na,
30 maa ŋko “Kampyi wuu mpyi wuu tulyeyi tìiŋi i,
wuu mpyi na sì ɲɛɛ n‑bâra pi na si Kile tùnntunmpii bò mɛ.”
31 Lire pyiŋkanni na,
yii yabilimpilʼà li cyêe na mpii pi à Kile tùnntunmpii bò ke,
yii mú à pi pire fiige.
32 Ɲyɛ sòŋke yii tulyeyʼà lyêele ke,
yii yyaha le yii i ku fàlʼa nɔ ku tɛgɛni na!
33 Wwòpiyi yà ye!
Yii màcwɔn tùlugo sùpyiibii!
Di yii sí n‑jà n‑shwɔ n‑jwo nùmpanŋa nage na yɛ?
34 Lire e ke yii lógo,
mii sí raa Kile tùnntunmpii pìi ná yákilifeebii pìi ná Kile Saliyaŋi cyelentiibii pìi tunni yii á.
Yii sí n‑bò pi e,
si pìi kwòro cige na,
si pìi bwɔ̀n Kile Jwumpe kàlambayi i,
si pìi kyérege kànyi yyaha kurugo.
35 Lire e Kile sí n‑tîge yii na pire shintiibii puni mbòŋi i:
Abɛli u à tíi ke,
mà lwɔ́ uru tèeboni na,
fo mà sà nɔ Baraki jyaŋi Zakari mbòŋi na,
Zakari pi à bò Kileɲaarebage sèecyage ná sárayi tawwuge shwɔhɔlʼe ke.
36 Sèeŋi na mii sí yi jwo yii á,
Kile sí yii ná yii tulyeyi cɛ̂ɛgɛ tire boore puni kurugo.»
Yesu à jwo Zheruzalɛmu kànhe kyaa na
37 Ka Yesu si núrʼa jwo:
«Ei!
Zheruzalɛmu shiinbii,
yii Zheruzalɛmu kànhe shiinbii,
yii pi maha Kile tùnntunmpii bùu,
maa Kile jwumpe jwufeebii wàa ná kafaayʼi maha bùu ke,
yʼà tooyo niɲyahaya kwɔ̀ mii la mpyi si yii bínni yiye e sʼa yii kàanmucaa,
bà ŋkùnuŋi maha u pyìre bínni tiye e,
maa bûru ti ɲuŋʼi mɛ.
Ŋka yii ɲyɛ a ɲɛɛ lire e mɛ.
38 Ku ke numɛ!
Kile sí cye wwû yii kànhe taan si yii yaha yiye kanna na.
39 Yii li cè,
mà lwɔ́ numɛ na,
yii ɲyiini saha sì n‑tɛ̀gɛ mii na mɛ,
fo canŋke yii sí n‑pa raa ŋko “Ŋgemu u ɲyɛ na ma Kafooŋi Kile mɛge na ke,
Kile u jwó le urʼád.”»