Cikwɔɔnre lyìmbwooni bàtaage
22
Ka Yesu si núrʼa bàtaaga jwo pi á,
u à jwo:
2 «Kile Saanre à fworo nde kani kurugo:
saanŋi wà à kataan nimbwoo bégele u jyaŋi cikwɔɔnre tooyʼe.
3 U à bégelʼa kwɔ̀ ke,
mpii pi mpyi a yyere ke,
ka u u u báarapyiibii tun pi sà pire pyi pi a ma,
ka pi i ɲcyé paŋa.
4 Ka u u núrʼa báarapyiibii pìi tun,
maa pire pyi “Yii sà yi jwo shinyyerebilʼá na mii naha a lyìmbwoo yaa,
na mii naha a na nupyahigii cyìi ná yatɔɔre sìnmɛ woore tà bò,
na mii naha a bégelʼa kwɔ̀,
na pi a ma cikwɔɔnre zànnɛɛgʼá.”
5 Ŋka pi wà ɲyɛ a saanŋi yini lwɔ́ a wíi mɛ.
Ka wà bá si yîrʼa kàre u kɛrɛge e,
ka wà si ŋkàre u cwɔ̀hɔntʼá,
6 ka pi sanmpii si saanŋi báarapyiibii cyán a cû,
maa pi kyérege,
maa pi bò.
7 Ka saanŋi lùuni si yîri,
ka u u u kàshikwɔɔnbii yîrige pi à sà pire shinbompii bò,
maa pi kànhe súugo.
8 Ɲyɛ ka u u núrʼa jwo u báarapyiibilʼá “Cikwɔɔnre ɲjyìŋʼà bégele,
ŋka shinyyerebii ná uru ɲjyìŋi mpyi a yaa mɛ.
9 Yii a sì kuɲuɲyi na,
yii aha shin maha shin ɲya ke,
yii uru yyere cikwɔɔnre zànnɛɛge na.”
10 Ka báarapyiibii si yîrʼa kàre kurigii ɲwɔyi na.
Shin maha shin pi à ta wani ke,
maa pire puni yyerʼa pa ntɛ̀gʼa cikwɔɔnre bage ɲî,
shinpii bâra shincɛnmii na.
11 Ka saanŋi si jyè si shinyyerebii wíi,
mà nàŋi wà ta pi shwɔhɔlʼe,
cikwɔnvaanɲyi baa.
12 Ka saanŋi si u pyi “Na cevoo!
Di mu à pyi maa jyè naha mà ta cikwɔnvaanɲyi ɲyɛ mu na mà yɛ?”
Uru nàŋi ɲyɛ a yà ta a jwo mɛ.
13 Ka saanŋi si u báarapyiibii pyi “Yii u tooyi ná u cyeyi pwɔ,
yii i u wà cyíinŋi na numpini i,
wani sùpyire maha myahigii súu marii ŋkyànhigii kùru.”»
14 Yesu à bàtaage jwo a kwɔ̀ ke,
maa núrʼa jwo:
«Yii li cè na Kile à shinɲyahara yyere,
ŋka shinɲyahara ɲyɛ a cwɔɔnrɔ mɛ.»
Pi à Yesu yíbe múnalwɔɔre ŋkanŋi kyaa na
15 Ɲyɛ ka Farizhɛɛnbii si ŋkàrʼa sà piye taanna,
si kànhaŋa cyán Yesu na,
bà pi si mpyi si u ta ɲcû ná u yabiliŋi ɲwɔjwumpe e mɛ.
16 Maa pi cyelempyiibii pìi ná Erɔdi toŋkuni shiinbii pìi tun Yesu áa,
ka pire si sà u pyi:
«Cyelentuŋi!
Wuu à li cè na mu ɲyɛ na fyáge sèeŋi tajwuge e mɛ.
Jwumpe mu sí ɲyɛ na yu mà yyaha tíi ná Kile kuni i ke,
puru na ɲyɛ sèe,
mu ɲyɛ na fyáge sùpya na mɛ,
mu ɲyɛ a sùpya pwɔ́ɔŋɔ sùpya na mɛ.
17 Lire e ke ma taɲyage jwo wuu á:
wuu à yaa wuu a múnalwɔɔre kaan Ɔrɔmu saanbwɔhe Sezari á la?»
18 Ŋka Yesu mpyi a fworo pire cwofeebii cwɔ̀ɔre ɲwɔhɔ na,
ka u u pi pyi:
«Yii pi à fyìnmɛ tò wwomɔ na ke,
ɲaha na yii na mii pɛre si ɲcû yɛ?
19 Wyɛ́rɛŋi yii ɲyɛ na ntɛ̀ge na múnalwɔɔre sârali ke,
yii uru wà cyêe na na wee.»
Ɲyɛ ka pi i uru wyɛ́rɛŋi tɔɔnŋke kà cyêe u na.
20 Ka u u pi pyi:
«Jofoo nàɲja ná u mɛgɛ ku ɲyɛ ŋge wyɛ́rɛŋi na yɛ?»
21 Ka pi i u pyi:
«Saanbwɔhe Sezari.»
Ka Yesu si pi pyi:
«Ɲyɛ yii a Sezari wuŋi kaan Sezari á,
yii raa Kile wuŋi kaan Kile á.»
22 Pi à Yesu ɲwɔshwɔɔre lógo ke,
ka li i pi kàkyanhala,
ka pi i yîri u taan mà kàre.
Sadusiibilʼà Yesu yíbe kwùubii ɲɛ̀ŋi kyaa na
23 Kuru cannuge e,
Sadusiibii pi maha jwo na kwuɲɛnɛ ɲyɛ nùmpanŋa mɛ,
pire pìlʼà file Yesu na maa jwo:
24 «Cyelentuŋi!
Kile tùnntunŋi Musa à jwo “Nɔ̀ ká ceewe lèŋɛ maa ŋkwû mà ta u ɲyɛ a pyà si u na mɛ,
u cɔɔnŋʼà yaa u ceeŋi lèŋɛ zànbangara na,
u u pyìi si u na,
u yyahafooŋi niŋkwuŋi mɛge na.”
25 Ɲyɛ sìɲɛɛ baashuunni na mpyi naha wuu yyére.
Pi puni niɲjyeŋʼà ceewe lèŋɛ maa ŋkwû,
u ɲyɛ a pyà ta u na mɛ.
Ŋgemu u à taha u na ke,
ka uru si ceeŋi lèŋɛ.
26 Ka uru mú si mpa ŋkwû,
u ɲyɛ a pyà ta u na mɛ.
Ka tanrewuŋi wuuni mú si mpyi amuni fo mà sà ŋkwɔ̀ pi baashuunniŋi na.
27 Pire puni kàntugo,
ka ceeŋi mú si mpa ŋkwû.
28 Ɲyɛ ná pire nàmbaa baashuunniŋi puni sʼà uru ceeŋi lèŋʼa círi,
kwùubii ɲɛ̀ŋi ká bú nta sèe,
pi aha bú ɲɛ̀ canŋke ŋkemu i ke,
pi ŋgirʼá ceeŋi sí n‑kan yɛ?»
29 Ka Yesu si pi pyi:
«Yii à wurugo,
lirʼà ta yii ɲyɛ a Kile Jwumpe Semɛŋi yyahe cè,
si nta ɲjyére Kile sífente na mɛ.
30 Yii li cè,
Kile yyére,
sùpyire ká ɲɛ̀ a fworo kwùŋi i,
nɔ̀ sì ceewe lèŋɛ mɛ,
ceewe mú sì n‑kan nɔ̀ á mɛ.
Ti sí n‑pyi Kile mɛ̀lɛkɛɛbii fiige.
31 Ɲje yʼà sémɛ Kile Jwumpe Semɛŋi i kwuɲɛni kyaa na ke,
yii ɲyɛ a yire kâla mà?
Kile à jwo
32 “Mii u ɲyɛ Ibirayima ná Ishaka ná Yakuba u Kileŋib.”
Ɲyɛ puru jwumpʼà li cyêe na pire mpii ɲyii wuu pi ɲyɛ wani Kile yyére.
Sùpyire ɲyii woore ti maha Kile pêre,
kwùubii kyaa bà mɛ.»
33 Sùpyire ti mpyi na núru Yesu ɲwɔ na ke,
u kàlaŋʼà pire puni kàkyanhala.
Kile Saliyaŋi kabilini lʼà fànha tò cyi sanŋkii na ke
34 Ɲyɛ Farizhɛɛnbilʼà pa lógo na Yesu à jwumpe cyán Sadusiibii na ke,
ka pi i ŋkàrʼa sà bínni Yesu taan.
35 Kile Saliyaŋi cyelentuŋi wà na mpyi pi e,
ka uru la si mpyi si Yesu pɛrɛ ɲcû maa u yíbe:
36 «Cyelentuŋi!
Saliyaŋi kabilini ndi lʼà fànha tò cyi sanŋkii na yɛ?»
37 Ka Yesu si u pyi:
«“Ma Kafooŋi Kile kyaa táan mayʼá ná ma zòmbilini ná ma múnaani ná ma sɔ̀nŋɔre puni ic.”
38 Saliyaŋi kabilini niɲcyiini li ɲyɛ lire,
lire lʼà fànha tò cyi sanŋkii puni na.
39 Shɔnwuuni lʼà taha lire na ke,
lire tayyéregʼà pêe niɲcyiini fiige.
Lire li ɲyɛ “ma supyiɲɛɛŋi kyaa táan mayʼá bà mu kyalʼà táan mayʼá mɛd.”
40 Kile Saliyaŋi kapyaagii sanŋkii puni ná Kile tùnntunmpii jwumpʼà lwɔ́ a pwɔ ɲcyii kapyaagii shuunniŋi na.»
Kile Niɲcwɔnrɔŋi ɲyɛ Dawuda Tuluge Shin kanna mɛ
41 Mà Farizhɛɛnbii nimbinnibii yaha,
Yesu à pi yíbe.
42 U à jwo:
«Kile Niɲcwɔnrɔŋi kyaa lʼà jwo ke,
ɲaha yii ɲyɛ na sɔ̂nŋi mà yyaha tíi ná u e yɛ?
Jofoo tùluge e u sí n‑fworo yɛ?»
Ka pi i Yesu pyi:
«Dawuda Tuluge Shin wi.»
43 Ka Yesu si pi pyi:
«Mà Kile Munaani yaha lʼà Dawuda yyaha cû,
ɲaha kurugo u à u yyere uru Kafooŋi yɛ?
44 Yii li cè na Dawuda à jwo
“Kafooŋi Kile à jwo mii Kafooŋi á
‘Ta ma a pa ntɛ̀ɛn na kàniŋɛ cyɛge na,
fo mii aha mu zàmpɛɛnbii le
mu tooyi ɲwɔhʼie.ʼ”
45 Ná Dawuda na Kile Niɲcwɔnrɔŋi yiri “Kafooŋi” lirʼà li cyêe na Dawuda Tuluge Shin kanna bà mɛ,
u Kafoo mú wi,
sèe bàlʼà?»
46 Pi wà ɲyɛ a jà a Yesu ɲwɔ shwɔ mɛ.
Mà láha kuru canŋke na,
wà saha ɲyɛ a ɲɛnʼa u yíbe mɛ.