Marika 12

Ɛrɛzɛn kɔɔge faafeebii bàtaage

(Macwo 21.33-46; Luka 20.9-18)

Lire kàntugo Yesu à bàtaaga jwo sùpyirʼá. U à jwo: «Nàŋi wà u ná ɛrɛzɛn cikɔɔgɔ yaa, maa ku kwûulo, ɛrɛzɛn lwɔhe maha wwû wyige ŋkemu i ke, maa kuru tùgo, maa ŋkubaga yaa cikɔɔge kàanmucyafooŋi mɛɛ na. Lire kàntugo maa faafee lwɔ́ a yaha kʼe, u ná pire sʼa ku yasɛɛre táali, maa nta a kàre kùlutɔɔnlʼe. 2 Ɲyɛ ɛrɛzɛnŋi yasɛɛre tèekwɔɔnnʼà pa nɔ ke, ka u u u báarapyiŋi wà tun cikɔɔge faafeebilʼá u sà uru nàzhan ɛrɛzɛnŋi shwɔ u a ma. 3 Ŋka uru tùnntunŋʼà nɔ pi na ke, ka pi i u cû maa u bwɔ̀n, maa u cyeŋgayi wuŋi kɔ̀rʼa tùugo. 4 Ka cikɔɔge foo si núrʼa báarapyi shɔnwu tun, ka pi i uru bwɔ̀n ɲùŋke e, maa u cyahala sèlʼe. 5 Ka u u shin tanrewu tun, ka pi i uru cû a bò. Puru ɲwɔhɔ na, u à shinɲyahara tun, ka pi i pìi bwɔ̀n maa pìi bò. 6 U tùnntunmpilʼe, shin niŋkin kanna u mpyi tunmbaa, u jyasege ku mpyi kure, u kyaa mpyi a táan u á sèlʼe. Ka u u ŋkànha a uru tun pi á, maa jwo “Pi sí n‑sílege mii jyaŋi na.” 7 Ŋka jyafooŋʼà nɔ wani ke, ka pi i yi jwo piyʼá na: “Cikɔɔge foo koolyiŋi u ɲyɛ ŋge. Yii a wá, wuu u bò, kɔɔge sí n‑pyi wuu wogo.” 8 Ka pi i u cû maa u bò, maa u wà cikɔɔge kàntugo yyére.

9 Ɲyɛ ɲaha cikɔɔge foo sí n‑pyi yɛ? Nàkaana baa, u sí n‑pa mpii faafeebii bò si u cikɔɔge le piibɛrɛ cye e.

10 Ɲje yʼà sémɛ Kile Jwumpe Semɛŋi i ke, taha yii ɲyɛ a yire kâla mɛ? Yʼà sémɛ

“Bafaanribilʼà cyé kafaage ŋkemu na ke,

kuru kʼà pa mpyi .

11 Kafooŋi Kile u à lire pyi,

lʼà pyi kakyanhala wuu ɲyii na”.»

12 Ɲyɛ Yesu à puru jwumpe jwo amuni ke, ka Yahutuubii ɲùŋufeebii si wá na u caa si u cû, ɲaha na yɛ pi mpyi a cè na u à ŋke bàtaage jwo a wà pire na. Ŋka supyiɲyahara na mpyi wani kuru cyage e, ka pi i fyá tire na, maa Yesu yaha u a kàre.

Pi à Yesu yíbe múnalwɔɔre ŋkanŋi kyaa na

(Macwo 22.15-22; Luka 20.19-26)

13 Lire kàntugo Yahutuubii ɲùŋufeebilʼà pìi ná toŋkuni shiinbii pìi yaha a kàre Yesu yyére, bà pi si mpyi si u ta ɲcû u ɲwɔmɛɛni kurugo mɛ. 14 Ka pire si sà Yesu pyi: «Wuu cyelentuŋi, wuu à li cè na mu ɲyɛ na fyáge sèeŋi tajwuge e mɛ, mu ɲyɛ na fyáge sùpya na mɛ, mu ɲyɛ a sùpya pwɔ́ɔŋɔ sùpya na mɛ, mu na sùpyire kâlali ná sèeŋi i Kile kuni ɲaaraŋkanni na. Lire na, wuu la ɲyɛ si mu yíbe, wuu à yaa wuu a múnalwɔɔre kaan Ɔrɔmu saanbwɔhe á la? 15 Ɲaha mu na sɔ̂nŋi yɛ?» Ŋka Yesu mpyi a cè na pi à fyìnmɛ tò wwomɔ na, maa pi pyi: «Ɲaha na yii na mii pɛre si ɲcû yɛ? Yii wyɛ́rɛbile kan na á, si li wíi.» 16 Ka pi i mpa ná lʼe, ka u u pi yíbe: «Jofoo nàɲja ná u mɛgɛ ku ɲyɛ ŋge wyɛ́rɛŋi na yɛ?» Ka pi i jwo: «Saanbwɔhe Sezari». 17 Ka u u pi pyi: «Yii a Sezari wuŋi kaan Sezari á, yii raa Kile wuŋi kaan Kile á.» Ka puru jwumpe si pi puni pâa.

Sadusiibilʼà Yesu yíbe kwùubii ɲɛ̀ŋi kyaa na

(Macwo 22.23-33; Luka 20.27-40)

18 Ɲyɛ pi maha jwo na kwuɲɛnɛ ɲyɛ nùmpanŋa mɛ, pire pìlʼà file Yesu na maa u yíbe: 19 «Wuu cyelentuŋi, Kile tùnntunŋi à mpe jwumpe sémɛ wuu i na “Nɔ̀ ká ceewe lèŋɛ, maa ŋkwû, mà u ta u ɲyɛ a pyà ta ceeŋi na mɛ, u cɔɔnŋʼà yaa u ceeŋi lèŋɛ zànbangara na, u u pyìi si u na, u yyahafooŋi niŋkwuŋi mɛge na.” 20 Ɲyɛ sìɲɛɛ baashuunni na mpyi wani, pi puni niɲjyeŋi mpyi a ceewe lèŋɛ maa ŋkwû, u ɲyɛ a pyà ta u na mɛ. 21 Ka sìɲɛɛŋi shɔnwuŋi si ceeŋi lwɔ́ maa ŋkwû, u ɲyɛ a pyà ta u na mɛ. Ka tanrewuŋi wuuni si mpyi amuni. 22 Ka pire nàmbaabii baashuunniŋi puni si ceeŋi lèŋɛ mà taha taha piye na, ŋka pi wà ɲyɛ a pyà ta u na mɛ. Pire puni kàntugo, ka ceeŋi mú si mpa ŋkwû. 23 Ɲyɛ ná pire nàmbaa baashuunniŋi puni sʼà uru ceeŋi lèŋʼa círi, kwùubii ɲɛ̀ŋi ká bú nta sèe, pi aha bú ɲɛ̀ canŋke ŋkemu i ke, pi ŋgirʼá, ceeŋi sí n‑kan yɛ?»

24 Ka Yesu si pi pyi: «Yii à wurugo sùpyire ɲɛ̀ŋi kyaa na, lirʼà ta yii ɲyɛ a Kile Jwumpe Semɛŋi yyaha cè, si nta ɲjyére Kile sífente na mɛ. 25 Yii li cè, Kile yyére, sùpyire ká ɲɛ̀ a fworo kwùŋi i, nɔ̀ sì ceewe lèŋɛ mɛ, ceewe mú sì n‑kan nɔ̀ á mɛ. Ti sí n‑pyi fiige.

26 Ɲje Kile tùnntunŋi Musa à sémɛ kwuɲɛni kyaa na ke, yii ɲyɛ a yire kâla mà? Kuru cyage e, lʼà sémɛ na Kile à jwo ná Musa e tahe nage woge taan na “Mii u ɲyɛ , ná Ishaka, ná Yakuba u Kileŋi.”

27 Ɲyɛ puru jwumpʼà li cyêe na pire mpii ɲyii wuu pi ɲyɛ wani Kile yyére. Sùpyire ɲyii woore ti maha Kile pêre, kwùubii kyaa bà mɛ. Yii na sɔ̂nŋi na sùpyire sì ɲɛ̀ n‑fworo kwùŋi i mɛ, kuru cyage e yii à sàa wurugo.»

Kile Saliyaŋi kabilini lʼà fànha tò cyi sanŋkii na ke

(Macwo 22.34-40; Luka 10.25-28)

28 Kile Saliyaŋi cyelentuŋi wà à Yesu ná nte sùpyire jwumpe lógo, maa li ɲya na Yesu à pi ɲwɔ shwɔ a ɲwɔ ke, ka u u file Yesu na, maa u yíbe: «Saliyaŋi kabilini ndi lʼà fànha tò cyi sanŋkii na yɛ?» 29 Ka Yesu si u pyi: «Kile Saliyaŋi kabilini niɲcyiini li ɲyɛ “ shiinbii, yii lógo, wuu Kafooŋi Kile kanni u ɲyɛ Kafooŋi. 30 Ma Kafooŋi Kile kyaa táan mayʼá, ná ma zòmbilini puni ná ma múnaani puni ná ma sɔ̀nŋɔre puni ná ma fànhe puni i.” 31 Shɔnwuuni li ɲyɛ “Ma supyiɲɛɛŋi kyaa táan mayʼá bà mu kyalʼà táan mayʼá mɛ.” Kile Saliyaŋi kapyaagii puni i, là ɲyɛ a pêlʼa cyire shuunniŋi kwɔ̀ mɛ.»

32 Ka uru Kile Saliyaŋi cyelentuŋi si Yesu pyi: «Wuu cyelentuŋi, mu à sèe jwo, Kile ɲyɛ niŋkin, wà saha ɲyɛ a bâra u na mɛ. 33 Bà mu à jwo, ma Kafooŋi Kile kyaa táan mayʼá, ná ma zòmbilini puni ná ma yákiliŋi puni ná ma fànhe puni i, maa ma supyiɲɛɛŋi kyaa taan mayʼá bà mu kyalʼà táan mayʼá mɛ, lirʼà pwɔ́rɔ nizogoyi ná sárayi kuuyi sanɲyi na.»

34 Yesu à li ɲya na Kile Saliyaŋi cyelentuŋʼà uru ɲwɔ shwɔ ná yákilifente e ke, ka u u u pyi: «Mu laage ɲyɛ a tɔɔn na mɛ.» Lire kàntugo wà saha ɲyɛ a ɲɛnʼa Yesu yíbe mɛ.

Kile Niɲcwɔnrɔŋi ɲyɛ Dawuda Tuluge Shin kanna mɛ

(Macwo 22.41-46; Luka 20.41-44)

35 Mà Yesu yaha u u sùpyire kâlali Kileɲaarebage e, u à pi yíbe: « maha jwo na na ɲyɛ Tuluge Shin. Ɲaha yii na sɔ̂nŋi purʼe bɛ? 36 Jwumpe Dawuda à jwo mà yaha lʼà u yyaha cû ke, yii sɔ̂nŋɔ puru na. U à jwo:

“Kafooŋi Kile à jwo mii Kafooŋi á,

‘Ta ma a pa ntɛ̀ɛn na na,

fo mii aha mu zàmpɛɛnbii le

mu tooyi ɲwɔhʼi.ʼ”

37 Ná Dawuda na Kile Niɲcwɔnrɔŋi yiri “Kafooŋi” lirʼà li cyêe na Dawuda Tuluge Shin kanna bà mɛ, u Kafoo mú wi, sèe bàlʼà?»

Shinɲyahare ti mpyi wani na núru Yesu ɲwɔ na ke, puru jwumpe mpyi a táan tʼá sèlʼe.

Yesu à Kile Saliyaŋi cyelentiibii cɛ̂ɛgɛ

(Macwo 23.1-36; Luka 20.45-47)

38 Mà Yesu yaha u u sùpyire kâlali, u à yi jwo tʼá: «Yii a yiye kàanmucaa na, pi maha vàanntinmbwoyi leni na ɲaare. Sùpyire tabinniyi i, pi la maha mpyi pi raa pire pêre sʼa pire shɛ́ɛre. 39 Pi aha shà Kile Jwumpe kàlambayi i, lire ɲyɛ mɛ wà ha pi yyere kataan ɲjyì na, bwompe tatɛɛnyi pi maha ɲcaa. 40 Mà bâra lire na, pi maha leŋkwucyeebii cyeyaayi puni shuu pi na ná pi ɲwɔtanyi i. Pi maha Kile ɲáare na mɔni sùpyire ɲyiɲyage na. Lire kurugo nde li sí n‑pa pi ta ke, lire sí n‑waha sèlʼe.»

Bùɲyɛŋi leŋkwucwoŋʼà pyi ke

(Luka 21.1-4)

41 Kileɲaarebage e, Yesu mpyi a tɛ̀nnʼa yyaha kan bùɲyɛŋi yaleŋkʼá, maa shinɲyahara wyɛ́rɛŋi leŋkanni wíi. Nàfuufeebii niɲyahara mpyi na wyɛ́rɛŋi niɲyahawa leni. 42 Leŋkwucwoŋi kanhamafooŋi wà mú mpyi a pa bùɲyɛ pyi, ná daashipyara shuunni i. 43 Ka Yesu si u yyere, maa yi jwo pi á: «Sèeŋi na mii sí yi jwo yii á, ŋge leŋkwucwo fòŋɔfooŋʼà bùɲyɛŋi ŋgemu pyi ke, urʼà fànha tò pi sanmpii puni wuŋi na. 44 Ɲaha na yɛ pi sanmpii punʼà wwû pi cyeyaayi niɲyahayi i, mà kan Kile á. Ŋka ŋge leŋkwucwoŋi kanhamafooŋi wi ke, u ɲùŋɔ wyɛ́rɛŋi puni u à kan Kile á, canŋke yalyire lwɔɔre mú bá ɲyɛ u á mɛ.»