Saanŋi Yesu à jyè Zheruzalɛmu kànhe e
11
Mà pi yaha pi i byanhare Zheruzalɛmu kànhe na,
pi mpyi a nɔ Olivye cire ɲaŋke ŋkere na,
Bɛtifajye ná Bɛtani kànyi taan.
Ka Yesu si u cyelempyiibii pìi shuunni tun,
2 maa pi pyi:
«Kànhe ku ɲyɛ yii yyaha na ke,
yii a sì kʼe.
Yii aha nɔ wani,
yii sí n‑tíi dùfaanɲjaaga ta kʼà pwɔ,
sùpya sàha ŋkwɔ̀ a dùgo ku na mà ɲya mɛ.
Yii i ku sànha,
yii pa ŋkan na á.
3 Wà ha bú yii yíbe na “Ɲaha na yii ɲyɛ na ku sànre yɛ?”
yii urufoo pyi na “Ku kyaa li ɲyɛ Kafooŋi na.
U aha ŋkwɔ̀ ku na,
ku sí n‑pa.”»
4 Ɲyɛ ka cyelempyiibii mú shuunni si ŋkàrʼa sà dùfaanɲjaage ta kʼà pwɔ pyɛnge ɲwɔge na,
kuni taan.
Ka pi i wá na ku sànre.
5 Sùpyire ti mpyi wani ke,
ka tire tà si cyelempyiibii pyi:
«Hɛn!
Ɲaha yii na mpyi amɛ yɛ?
Ɲaha kurugo yii ɲyɛ na dùfaanŋke sànre yɛ?»
6 Ka cyelempyiibii si pi ɲwɔ shwɔ bà Yesu mpyi a yi jwo pi á mɛ.
Ka tire sùpyire si dùfaanŋke yaha pi cye e na pi a sì ná kʼe.
7 Cyelempyiibilʼà pa ná dùfaanŋke e Yesu yyére ke,
maa pi vàanɲyi yà taha ku na,
ka Yesu si dùgʼa tɛ̀ɛn na ŋkɛ̀ɛge.
8 Ka shinɲyahara si ti vàanntinɲyi yà wwû mà pìli pìli Yesu yyaha na kuni i,
ka niɲyahara si jyè kɛrɛyi i na wyɛɛre kwùun na ɲcyáan kuni ia.
9 Sùpyire ti mpyi Yesu yyaha na,
ná nte ti mpyi u kàntugo ke,
tire puni mpyi na ŋkwúuli na:
«Yabwɔhe!
Ŋgemu u ɲyɛ na ma Kafooŋi Kile mɛge na ke,
Kile u jwó le u áb!
10 Yabwɔhe!
Yabwɔhe!
Saanre ti ɲyɛ na ma ke,
Kile u jwó le tʼá.
Wuu tulyage Dawuda Saanre ti.
Pèente ti taha Kile na nìɲyicyeyi puni i!»
11 Yesu à nɔ Zheruzalɛmu i ke,
maa ŋkàre Kileɲaarebage e.
U à yaayi puni wíi wíi ke,
maa fworʼa kàre Bɛtani kànhe e ná u cyelempyiibii kɛ ná shuunniŋi i,
ɲaha na yɛ numpilage mpyi na wwùu.
Yesu à fizhiye cige láŋa
12 Kuru canŋa nùmpanŋa,
pi niɲjiribii Bɛtani i,
ka katege si Yesu ta.
13 Ka u u fizhiye cige kà ɲya tatɔɔnge e ná wyɛɛre e,
maa file ku na a wíi,
kampyi u sí yasɛrɛ ta ku na.
Ŋka u à nɔ ku ɲwɔhʼi ke,
u ɲyɛ a yasɛrɛ ta kʼe fo wyɛɛre bà mɛc,
ɲaha na yɛ ku tèeseni mpyi sàha ŋkwɔ̀ a nɔ mɛ.
14 Ka Yesu si jwo cigʼá:
«Sùpya saha sì n‑sìi yasɛrɛ ta mu na,
si ɲjyî mɛ.»
Ka u cyelempyiibii si puru jwumpe lógo.
Yesu à cwɔ̀hɔmpii kɔ̀rʼa yige Kileɲaarebage ntàani na
15 Kàntugo,
Yesu ná u cyelempyiibilʼà nɔ Zheruzalɛmu kànhe e,
ka u u ŋkàre Kileɲaarebage ntàani na.
Mpii pi mpyi na pɛrɛmpe ná zhwoŋi pyi wani ke,
maa pire kɔ̀re,
maa wyɛ́rɛfaabii tàbalibii ná sanmpanmpɛrɛbii yatɛɛnɲyi ŋɔɔŋʼa cyán cyán.
16 U ɲyɛ a ɲɛɛ sùpya u à jyè ná yapɛrɛŋi i Kileɲaarebage ntàani na mɛd.
17 Puru ɲwɔhɔ na,
ka u u wá na pi puni kâlali,
marii ŋko:
«“Mii bage sí n‑pa a yiri Kileɲaarebaga supyishiŋi punʼáe.”
Yire yʼà sémɛ Kile Jwumpe Semɛŋi i.
Ŋka yii pi ke,
yii à ku kɛ̂ɛnŋʼa pyi “nàŋkaalii tabinnigaf”.»
18 Kile sáragawwuubii ɲùŋufeebii ná Kile Saliyaŋi cyelentiibilʼà puru lógo ke,
ka pi i wá na Yesu boŋkanni caa.
Pi mpyi na fyáge u na,
ɲaha na yɛ u kàlaŋi mpyi a tatɛɛngɛ wwû shinɲyaharʼe.
19 Yàkoŋkʼà nɔ ke,
ka Yesu ná u cyelempyiibii si fworo kànhe e.
Yesu à jwo dániyaŋi ná Kileɲarege ná kapegigii yàfaŋi kyaa na
20 Kuru canŋke nùmpanŋa ɲyɛ̀ge na,
pi nintorobilʼà fizhiye cige ɲya kʼà waha fo ndìre e.
21 Ka Pyɛri funŋɔ si ɲcwo Yesu jwumpe niɲjwumpe na,
maa u pyi:
«Wuu cyelentuŋi,
wíi,
fizhiye cige mu à láŋa taɲjaa ke,
ku naha a waha.»
22 Ka Yesu si u pyi:
«Yii dá Kile na.
23 Sèeŋi na mii sí yi jwo yii á,
sùpya ká dá Kile na ná u zòmbilini puni i,
urufoo ká jwo na ŋke ɲaŋke ku yîri ku tatɛɛnge e,
ku sà ɲcwo baŋi i,
urufoo ká nta u à dá li na,
nde u à jwo ke,
lire sí n‑pyi.
24 Lire kurugo mii sí yi jwo yii á,
yii aha Kile ɲáare yaaga maha yaaga kurugo ke,
yii dá li na na yii à kuru yaage ta a kwɔ̀,
lire ká mpyi,
Kile sí kuru yaage kan yii á.
25 Ŋka yii aha yîrʼa yyére na Kile ɲáare,
ka li i ntîge yii funŋʼi na yii à tîge shin na,
yii tire tìgire kwɔ̀,
bà yii Tuŋi u ɲyɛ nìɲyiŋi na ke,
uru mú sí n‑pyi si yii kapegigii yàfa yii na mɛ. [
26 Ɲaha na yɛ yii aha mpyi yii ɲyɛ na yiye shwɔ̀hɔlɔ wogigii yàfani yiye na mɛ,
yii Tuŋi Kile u ɲyɛ nìɲyiŋi na ke,
uru sì n‑pa yii kapegigii yàfa yii na mú mɛ.]»
Pi à Yesu yíbe u fànhe tatage kyaa na
27 Yesu ná u cyelempyiibilʼà núrʼa kàre Zheruzalɛmu kànhe e,
maa sà jyè Kileɲaarebage e.
Yesu niɲaraŋi ku funŋke e,
Kile sáragawwuubii ɲùŋufeebii ná Kile Saliyaŋi cyelentiibii ná Yahutuubii kacwɔnribilʼà kàre u yyére.
28 Maa u yíbe:
«Ná kuni ndire e mu na ɲcyii karigii pyi yɛ?
Jofoo u à kuni kan mu á,
mu u a cyi pyi yɛ?»
29 Ka Yesu si pi pyi:
«Mii mú sí yii yíbe kyaa niŋkin na,
yii aha mii ɲwɔ shwɔ,
lire tèni i ŋge u à kuni kan mii á mii u a ɲcyii karigii pyi ke,
mii sí urufoo cyêe yii na.
30 Mii à jwo yo,
jofoo u mpyi a Yuhana Batizelipyiŋi tun u pa a sùpyire batizeli yɛ?
Kile wi laa,
sùpyire ti?
Yii na ɲwɔ shwɔ!»
31 Ɲyɛ ka pi i ŋkàrʼa sà piye taanna maa jwo:
«Wuu aha jwo na Kile u mpyi a Yuhana tun,
u sí n‑jwo na ɲaha na wuu sí ɲyɛ a ɲɛnʼa dá u na mà yɛ?
32 Ŋka wuu mú sì n‑jà n‑jwo na sùpya u à u tun mà dɛ!»
Pi mpyi a fyá sùpyire na,
ɲaha na yɛ tire sùpyire puni mpyi na sɔ̂nŋi na Yuhana na mpyi a sìi Kile tùnntunŋɔ.
33 Pi à piye taanna a kwɔ̀ ke,
maa núrʼa kàrʼa sà Yesu pyi:
«Shinŋi u mpyi a u tun ke,
wuu ɲyɛ a cè mɛ.»
Ka Yesu si pi pyi:
«Ɲyɛ lʼaha mpyi amuni,
ŋge u à kuni kan mii á,
mii u a ɲcyii karigii pyi ke,
mii mú sì uru cyêe yii na mɛ.»