Yesu à lwɔhɔ kɛ̂ɛnŋʼa pyi ɛrɛzɛn sinmɛ
2
Ɲyɛ canmpyaa shuunnʼà tòro,
ka pi i wá na cikwɔnrɔ pyi Kana kànhe e,
Galile kùluni i.
Yesu nuŋi na mpyi wani tire cikwɔɔnre cyage e.
2 Yesu ná u cyelempyiibii mpyi a yyere wani.
3 Ɲyɛ mà pi yaha cikwɔɔnre múguroŋi na,
ka ɛrɛzɛn sinmpe si mpa ŋkùuŋɔ.
Ka Yesu nuŋi si yi jwo u á:
«Pi sinmpʼà kwɔ̀.»
4 Ka Yesu si u pyi:
«Nufooŋi,
mii à mu ɲáare,
ma hà ma ɲwɔge le na karigilʼe mɛ.
Tèni sàha ŋkwɔ̀ a nɔ mii á mɛ.»
5 Ɲyɛ ka u nuŋi si yi jwo báarapyiibilʼá:
«U aha mpa kyaa maha kyaa jwo yii á ke,
yii i lire pyi.»
6 Lirʼà cwoyo baani ta wani.
Yahutuubii mpyi maha piye jyíi na fíniŋɛ ná yire cwoyi lwɔhe e,
mà tàanna ná pi Kile kuni i.
Lwɔhe litirii ŋkuu (100) fiige mpyi maha jyè yire cwoyi niŋkin niŋkinŋi i.
7 Ka Yesu si báarapyiibii pyi:
«Yii ɲje cwoyi ɲî ɲî lwɔhe na.»
Ka pi i yi ɲî fo mà nɔ yi ɲwɔyi na.
8 Lire kàntugo ka Yesu si pi pyi:
«Yii kà kwó numɛ,
yii sà ŋkan cikwɔɔnre ɲjyìŋi táafooŋʼá.»
Ka pi i sà kà kan u á.
9 Ka ɲjyìŋi táafooŋi si lwɔhe bya a wíi,
mà ku ta ɛrɛzɛn sinmɛ,
u sí ɲyɛ a pu tayirige cè mɛ.
Ŋka báarapyiibii pi mpyi a lwɔhe kwó ke,
pire mpyi a pu tayirige cè.
Ka u u ntílʼa cifɔnŋi pooŋi yyere,
10 maa yi jwo u á:
«Sùpyire puni maha fyânha a ɛrɛzɛn sinmpe nintanmpe kan pu byafeebilʼá,
pi aha niɲyahama bya,
mpe pu ɲyɛ pu ɲyɛ a táan amuni mɛ,
puru maha nta a kan pi á.
Ŋka mu wi ke,
ɛrɛzɛn sinmpe nintanmpe mu à yaha kàntugo!»
11 Ɲyɛ lire lʼà pyi kyaa niɲcyiile,
mà li cyêe na Yesu na ɲyɛ kakyanhala sùpya.
Lirʼà pyi Kana kànhe e,
Galile kùluni i.
Lire pyiŋkanni na,
Yesu à u sífente cyêe sùpyire na,
ka u cyelempyiibii si dá u na.
12 Lire kàntugo Yesu ná u nuŋi ná u cìnmpyiibii ná u cyelempyiibilʼà kàre Kapɛrɛnamu kànhe e.
Pi ɲyɛ a mɔ wani mɛ.
Yesu à cwɔ̀hɔmpii kɔ̀rʼa yige Kileɲaarebage ntàani na
13 Ɲyɛ Yahutuubii bilereŋkwoŋi kataanni mpyi a byanhara.
Ka Yesu si ŋkàre Zheruzalɛmu kànhe e,
14 mà sà sùpyire ta ti i nìiyɛ ná mpàa ná kùmpanhii pɛ́rɛli Kileɲaarebage ntàani na,
wyɛ́rɛfaabii nintɛɛnbii na mpyi wani múa.
15 Ka u u mɛɛrɛ pyi kàsoro mà tɛ̀gʼa pi puni kɔ̀rʼa yige Kileɲaarebage ntàani na,
maa pi mpàabii ná pi nìiyi kɔ̀rɔ,
maa wyɛ́rɛfaabii wyɛ́rɛŋi lwɔ́ a wu,
maa pi tàbalibii ŋɔɔŋʼa cyán cyán.
16 Maa jwo sanmpanmpɛrɛbilʼá:
«Yii ɲje yaayi lwɔ́ a yige naha,
yii àha na Tuŋi bage kɛ̂ɛnŋɛ mpyi yapɛrɛmbaga mɛ.»
17 Yesu à lire pyi ke,
ka u cyelempyiibii funŋɔ si ɲcwo li na na lʼà sémɛ Kile Jwumpe Semɛŋi i na:
«Mu bage kani na mii súuge naŋkyaan fiigeb.»
18 Ka Yahutuubii ɲùŋufeebii si Yesu yíbe:
«Kakyanhala kani ndi mu sí n‑pyi n‑cyêe wuu na,
wuu u ɲcè na ɲcyii karigii puni mpyiŋi kunʼà kan mu á yɛ?»
19 Ka Yesu si pi pyi:
«Yii ŋke Kileɲaarebage jya,
mii sí ku núruŋɔ n‑faanra canmpyaa taanre funŋʼi!»
20 Ka pi i jwo:
«Ei!
Pi à yyee beeshuunni ná baani pyi ŋke Kileɲaarebage vaanraŋi na.
Jofoo niŋkin u ɲyɛ mu,
si ŋkwɔ̀ mpa ku faanra ŋkwɔ̀ canmpyaa taanre funŋʼi yɛ?»
21 Ŋka Kileɲaarebage kani Yesu à jwo ke,
u yabiliŋi cyeere kyaa u mpyi na yu.
22 Ɲyɛ Yesu à pa ɲɛ̀ a fworo kwùŋi i ke,
ka li i ntîge u cyelempyiibii funŋʼi na Yesu mpyi a ŋke cyage jwo.
Ka pi i dá Kile Jwumpe Semɛŋi ná Yesu ɲwɔjwumpe na.
23 Tèni i Yesu mpyi Zheruzalɛmu i Yahutuubii bilereŋkwoŋi kataanni na ke,
shinɲyahara à u kakyanhala karigii ɲya,
ka cyire si pi pyi pi à dá u na.
24 Yesu mpyi a pi puni zòompii cè,
lire kurugo u mpyi a dá pi na mɛ.
25 U à shin maha shin funŋɔ kani cè,
lire kurugo ɲùŋɔ sàha mpyi sùpya u à u supyiɲɛɛŋi yu u á mɛ.