Luka 20

Pi à Yesu yíbe u fànhe tatage kyaa na

(Macwo 21.23-27; Marika 11.27-33)

Canŋka mà Yesu yaha u u sùpyire kâlali maa Jwumpe Nintanmpe yu tʼá Kileɲaarebage ntàani na, ka Kile sáragawwuubii ɲùŋufeebii ná ná Yahutuubii kacwɔnribii si shà u yyére, 2 maa u yíbe: «Ná kuni ndire e mu na ɲcyii karigii pyi yɛ? Jofoo u à kuni kan mu á, mu u a cyi pyi yɛ?»

3 Ka Yesu si pi pyi: «Mii mú sí yii yíbe, 4 jofoo u mpyi a Yuhana tun u pa a sùpyire batizeli yɛ? Kile laa sùpyire?» 5 Ka pi i ŋkàrʼa sà piye taanna maa jwo: «Wuu aha jwo na Kile u mpyi a Yuhana tun, u sí n‑jwo na ɲaha na wuu sí ɲyɛ a ɲɛnʼa dá u na mà yɛ? 6 Wuu sí ká jwo na sùpya u mpyi a u tun, sùpyire sí wuu wà n‑bò ná kafaayi i, ɲaha na yɛ pi punʼà dá na Yuhana na mpyi Kile tùnntunŋɔ.»

7 Pi à piye taanna a kwɔ̀ ke, maa núrʼa kàrʼa sà Yesu pyi: «Shinŋi u mpyi a u tun ke, wuu ɲyɛ a cè mɛ.» 8 Ka Yesu si pi pyi: «Ɲyɛ lʼaha mpyi amuni, ŋge u à kuni kan mii á, mii u a ɲcyii karigii pyi ke, mii mú sì uru cyêe yii na mɛ.»

Ɛrɛzɛn kɔɔge faafeebii bàtaage

(Macwo 21.33-46; Marika 12.1-12)

9 Lire kàntugo ka Yesu si bàtaaga jwo sùpyirʼá. U à jwo: «Nàŋi wà u ná ɛrɛzɛn cikɔɔgɔ yaa, maa faafee lwɔ́ a yaha kʼe, u ná pire sʼa ku yasɛɛre táali piye na, maa nta a kàre kùlutɔɔnlʼe mà sà mɔ wani. 10 Ɲyɛ ɛrɛzɛnŋi yasɛɛre tèekwɔɔnnʼà pa nɔ ke, ka u u u báarapyiŋi wà tun faafeebilʼá u sà uru nàzhan ɛrɛzɛnŋi shwɔ, u a ma. Ŋka uru tùnntunŋʼà nɔ pi na ke, ka pi i u cû maa u bwɔ̀n, maa u cyeŋgaya wuŋi kɔ̀rʼa tùugo.

11 Ka cikɔɔge foo si núrʼa báarapyi shɔnwu tun pi á, ka pi i uru bwɔ̀n maa u cyahala, maa uru cyeŋgaya wuŋi kɔ̀rʼa núruŋɔ mú.

12 Ka u u núrʼa shin tanrewu tun pi á. Ka pi i sà uru cû, maa u bwɔ̀n mà bânnaga, maa u yige cikɔɔge kàntugo.

13 Ɲyɛ ka cikɔɔge foo si ŋkànha a jwo “Ɲaha mii sí n‑pyi numɛ bɛ? Jyaŋi niŋkinŋi u ɲyɛ mii á, ná u kyalʼà táan mii á ke, mii sí uru tun pi á. Shwɔhɔlʼe, pi aha uru ɲya, pi sí n‑sílege uru na.” 14 Ŋka faafeebilʼà cikɔɔge foo jyaŋi ɲya ke, maa wá na yu piyʼá “Cikɔɔge foo koolyiŋi u ɲyɛ ŋge. Yii a wá, wuu u bò, kɔɔge sí n‑ta n‑pyi wuu wogo.” 15 Ɲyɛ u à pa nɔ pi na ke, ka pi i u cû a wà cikɔɔge kàntugo maa u bò.»

Yesu à puru jwo ke, maa sùpyire yíbe: «Ɲaha cikɔɔge foo sí n‑pyi yɛ? 16 Nàkaana baa, u aha mpa, u sí pi puni bò si cikɔɔge kan piibɛrilʼá.»

Ɲyɛ sùpyirʼà puru lógo ke, maa jwo: «Ei! Kile u wuu shwɔ lire shiŋi na dɛ!»

17 Ka Yesu si pi wíi wíi maa jwo: «Yʼà sémɛ Kile Jwumpe Semɛŋi i na:

“Bafaanribilʼà cyé kafaage ŋkemu na ke,

kuru kʼà pa mpyi .”

Di puru jwumpe ɲwɔhe ɲyɛ yɛ?

18 Ɲyɛ shin maha shin u à cwo kuru kafaage ɲuŋʼi ke, urufoo sí n‑kyɛɛgɛ n‑kyɛɛgɛ, kuru kafaage sí ká ɲcwo shin maha shin ɲuŋʼi ke, ku sí urufoo cwɔ̀nhɔnɔ.»

19 Ɲyɛ Yesu à puru jwumpe jwo amuni ke, ka Kile sáragawwuubii ɲùŋufeebii ná si wá na ɲcaa si cye taha u na, si u cû lire tèenuuni i, ɲaha na yɛ pi mpyi a cè a jwo na u à ŋke bàtaage jwo a wà pire na. Ŋka pi mpyi na fyáge sùpyire na. 20 Ɲyɛ ka pi i wá na Yesu kàanmucaa, maa cwòfeebii pìi yaha pi à kàrʼa sà piye pyi sèeshiin si kànhaŋa cyán u na, si nta u cû u ɲwɔjwumpe kurugo, si u le Ɔrɔmu shiinbii fànhafooŋi u ɲyɛ kuru cyage e ke, uru cye e.

Pi à Yesu yíbe múnalwɔɔre ŋkanŋi kyaa na

(Macwo 22.15-22; Marika 12.13-17)

21 Ɲyɛ pire cwòfeebilʼà sà nɔ Yesu yyére ke, maa jwo: «Wuu cyelentuŋi, wuu à li cè na mu jwumpe ná mu kàlaŋʼà tíi, mu ɲyɛ na fyáge sùpya na ma kàlaŋi tapyige e mɛ. Jwumpe mu sí ɲyɛ na yu mà yyaha tíi ná Kile kuni i ke, puru na ɲyɛ sèe. 22 Wuu sí mu yíbe, wuu à yaa wuu a múnalwɔɔre kaan Ɔrɔmu Saanbwɔhe á la?»

23 Ka Yesu si ntílʼa li cè pi e, na cwòfee pi ɲyɛ pi pi, maa pi pyi: 24 «Yii wyɛ́rɛbile cyêe na na wee.» Pi à là cyêe u na ke, ka u u pi pyi: «Jofoo nàɲja ná u mɛgɛ ku ɲyɛ ŋge wyɛ́rɛŋi na yɛ?» Ka pi i jwo: «Saanbwɔhe Sezari.» 25 Ka Yesu si pi pyi: «Ɲyɛ yii a Sezari wuŋi kaan Sezari á, yii raa Kile wuŋi kaan Kile á.»

26 Ɲyɛ pire cwòfeebii ɲyɛ a jà a jwumɔ niŋkin ta Yesu ɲwɔ na sùpyire ɲyii na, mpe pu sí n‑pa ná lʼe pi jà a u cû mɛ. Yesu ɲwɔshwɔɔre mpyi a pi tɛgɛlɛ ta fo pi à fyâha fyi.

Sadusiibilʼà Yesu yíbe kwùubii ɲɛ̀ŋi kyaa na

(Macwo 22.23-33; Marika 12.18-27)

27 Ɲyɛ pi maha jwo na kwuɲɛnɛ ɲyɛ nùmpanŋa mɛ, pire pìlʼà file Yesu na maa jwo: 28 «Wuu cyelentuŋi, Kile tùnntunŋi à mpe jwumpe sémɛ wuu i na “Nɔ̀ ká ceewe lèŋɛ, maa ŋkwû, mà u ta u ɲyɛ a pyà ta u na mɛ, u cɔɔnŋʼà yaa u ceeŋi lèŋɛ zànbangara na, u u pyìi si u na, u yyahafooŋi niŋkwuŋi mɛge na.”

29 Ɲyɛ sìɲɛɛ baashuunni na mpyi wani, pi puni niɲjyeŋi mpyi a ceewe lèŋɛ maa ŋkwû, u ɲyɛ a pyà ta u na mɛ, 30 ka sìɲɛɛŋi shɔnwuŋi si ceeŋi lwɔ́ maa ŋkwû mà u yaha pyàtambaa. 31 Ka tanrewuŋi wuuni mú si mpyi amuni fo mà sà ŋkwɔ̀ pi baashuunniŋi na. Pire sìɲɛɛbii punʼà uru ceeŋi niŋkinŋi lèŋʼa círi, maa ŋkwû, pi wà ɲyɛ a pyà ta u na mɛ. 32 Pire puni kàntugo, ka ceeŋi mú si mpa ŋkwû. 33 Ɲyɛ ná pire nàmbaa baashuunniŋi puni sʼà uru ceeŋi lèŋʼa círi, kwùubii ɲɛ̀ŋi ká bú nta sèe, pi aha bú ɲɛ̀ canŋke ŋkemu i ke, pi ŋgirʼá ceeŋi sí n‑kan yɛ?»

34 Ka Yesu si pi pyi: «Ŋge diɲyɛŋi i, nàmbaabii na cyeebii lèŋi, cyeebii sí i nàmbayi jyè, 35 ŋka sùpyire tʼà yaa ná diɲyɛŋi nimpaŋi i, ná Kile sí ti ɲɛ̀ n‑yige kwùŋi i ke, tire e, nàmbaabii sì cyee lèŋɛ mɛ, cyeebii mú sì nàmbaya jyè mɛ. 36 Pi sí n‑kwôro shì na fo tèekwombaa, si mpyi Kile mɛ̀lɛkɛɛbii fiige. Ná Kile sʼà pi ɲɛ̀ a yige kwùŋi i lirʼà li cyêe na pi à pyi Kile pyìi.

37 Kile tùnntunŋi Musa sémɛŋi mú à yi fíniŋʼa jwo wuu á na kwùubii maha ɲɛ̀ni. Tèni i Kafooŋi Kile à jwo ná Musa e tahe nage woge taan ke, u à jwo “Mii u ɲyɛ ná Ishaka ná Yakuba u Kileŋi.” 38 Ɲyɛ puru jwumpʼà li cyêe na pire mpii ɲyii wuu pi ɲyɛ wani Kile yyére. Sùpyire ɲyii woore ti maha Kile pêre, kwùubii kyaa bà mɛ. Kile yyére, sùpyire puni ɲyii wuu pi ɲyɛ.»

39 U à puru jwo ke, ka pìi si file u na, maa jwo: «Cyelentuŋi, mu naha a jwumpe cè dɛ!» 40 Lire kàntugo wà saha ɲyɛ a ɲɛnʼa Yesu yíbe mɛ.

Kile Niɲcwɔnrɔŋi ɲyɛ Dawuda Tuluge Shin kanna mɛ

(Macwo 22.41-46; Marika 12.35-37)

41 Ɲyɛ ka Yesu si jwumpe lwɔ́, maa jwo: «Mpii pi maha jwo na na ɲyɛ Tuluge Shin ke, ɲaha yii na sɔ̂nŋi purʼe bɛ? 42 Jwumpe Dawuda à jwo Zaburu sémɛŋi i ke, yii sɔ̂nŋɔ puru na mú. U à jwo:

“Kafooŋi Kile à jwo mii Kafooŋi á,

‘Ta ma a pa ntɛ̀ɛn na na,

43 fo mii aha mu zàmpɛɛnbii le

mu tooyi ɲwɔhʼi.ʼ”

44 Ná Dawuda na Kile Niɲcwɔnrɔŋi yiri “Kafooŋi” lirʼà li cyêe na Dawuda Tuluge Shin kanna bà mɛ, u Kafoo mú wi, sèe bàlʼà?»

Yesu à Kile Saliyaŋi cyelentiibii faha

(Macwo 23.1-36; Marika 12.38-40)

45 Mà sùpyire yaha ti i núru Yesu ɲwɔ na, u à yi jwo u cyelempyiibilʼá: 46 «Yii a yiye kàanmucaa, yii àha ŋkwɔ̀ mpyi fiige mɛ. Mà vàanntinmbwoyi le na ɲaare, lire lʼà táan pi á. Sùpyire tabinniyi i, pi la maha mpyi pi a pire pêre pi raa pire shɛ́ɛre. Pi aha shà Kile Jwumpe kàlambayi i, lire ɲyɛ mɛ wà ha pi yyere kataan ɲjyì na, bwompe tatɛɛnyi pi maha ɲcaa. 47 Mà bâra lire na, pi maha leŋkwucyeebii cyeyaayi puni shuu pi na ná pi ɲwɔtanyi i. Pi maha Kile ɲáare na mɔni, sùpyire ɲyiɲyage na. Lire kurugo nde li sí n‑pa pi ta ke, lire sí n‑waha sèlʼe.»