Bùɲyɛŋi leŋkwucwoŋʼà pyi ke
21
Ɲyɛ Yesu à pa wílʼa nàfuufeebii pìi ɲya pi i ma na pi bùɲyɛŋi leni u yaleŋke e.
2 Leŋkwucwoŋi kanhamafooŋi wà mú mpyi a pa bùɲyɛ pyi ná daashipyara shuunni i.
3 Ka Yesu si u lógofeebii pyi:
«Sèeŋi na mii sí yi jwo yii á,
ŋge leŋkwucwo fòŋɔfooŋʼà bùɲyɛŋi ŋgemu pyi ke,
urʼà fànha tò pi sanmpii puni wuŋi na.
4 Ɲaha na yɛ pi sanmpii punʼà wwû pi cyeyaayi niɲyahayi i,
mà kan Kile á.
Ŋka ŋge leŋkwucwoŋi kanhamafooŋi wi ke,
u ɲùŋɔ wyɛ́rɛŋi puni u à kan Kile á,
canŋke yalyire lwɔɔre mú bá ɲyɛ u á mɛ.»
Yesu à jwo na Kileɲaarebage sí n‑jya
5 Lire kàntugo ka pìi si jwo ná Yesu i Kileɲaarebage kyaa na na kʼà faanra ná kafaayi nisinaɲyi i,
maa sùpyire bùɲyɛ yaayi niŋkanyi tɛ̀gʼa ku wiimɛ táan.
Ka Yesu si pi pyi:
6 «Ŋke basinaŋke yii ɲyɛ na ɲanʼamɛ ke,
canŋa na ma,
ku puni sí n‑sìi n‑pwɔ̀n n‑cyán,
si ku ŋkunuɲyi puni waraga,
fo si ku kafaayi láha láha yiye na.»
7 Ka pi i Yesu pyi:
«Wuu cyelentuŋi,
ɲaha tère e cyire karigii sí n‑pyi yɛ?
Cyi tèepyiini ká nɔ,
ɲaha ku sí li cyêe wuu na yɛ?»
8 Ka Yesu si pi pyi:
«Yii a yiye kàanmucaa!
Yii àha sùpya yaha u yii wurugo mɛ.
Yii li cè na shinɲyahara sí mii mɛge le piye na,
si mpa jwo na Kile Niɲcwɔnrɔŋi kyaa lʼà jwo ke,
na pire pi ɲyɛ ure.
Pi sí n‑pa raa ŋko sùpyirʼá na diɲyɛŋi tèekwoonʼà byanhara.
Ŋka yii àha ntaha pi fye e mɛ.
9 Yii sí n‑pa raa kàshiyi ná ɲyàhaŋguruguŋi kyaa núru,
lire kà yii funŋɔ pɛn mɛ.
Yii li cè na cyire karigii mpyimbaa ɲyɛ mɛ,
ŋka lire bà li ɲyɛ diɲyɛŋi tèekwooni mɛ.
10 Supyishiŋi wà sí n‑pa n‑yîri n‑sà n‑cwo wà na,
kìni là sí n‑pa n-yîri n‑sà n‑cwo là na.
11 Ɲìŋke sí n‑pa raa ɲcyɛ̂ɛnni cyeyi yʼe sʼa kakyaare pyi sèlʼe,
yampimpe ná katege sí n‑pyi cyeyi yʼe,
fyagara yaayi ná kakyanhala kacyeeŋkii yaayi mú sí n‑pa raa ɲaa nìɲyiŋi i.
12 Ŋka mà jwo cyire karigii cyi sìi cyi a mpyi ke,
pi sí raa yii kyérege,
sʼa yii cwôre sʼa ŋkɛ̀ɛge Kile Jwumpe kàlambayi i,
si nta raa yii cɛ̂ɛge sʼa yii tùni kàsuŋi i.
Pi sí raa yii yiri saanbii ná fànhafeebii yyére.
Pi sí raa cyire puni pyi yii na mii mɛge kurugo.
13 Lire sí n‑pyi tère niɲcɛnnɛ yii á yii jà yii a mii kyaa yu pi á.
14 Lire e ke jwumpe yii sí n‑jwo si ntɛ̀gɛ pi ɲùŋɔ bɛ̂ ke,
yii àha puru kani tɛ̀gɛ yiye funŋɔ pɛn mɛ.
15 Ɲaha kurugo yɛ mii yabiliŋi u sí puru tîrige yii funŋʼi,
si yákili niɲcɛnŋɛ kan yii á,
bà yii si mpyi si jwumpe ɲwɔge yaha yii zàmpɛɛnbii na mɛ.
16 Yii sifeebii ná yii sìɲɛɛbii ná yii cìnmpyiibii ná yii ceveebii sí raa yii leni cye e,
pi i yii pìi bò.
17 Yii kyaa sí n‑pɛn sùpyire punʼá mii mɛge kurugo.
18 Ŋka lire ná li wuuni mú i,
ali yii wà ɲùɲjuŋɔ niŋkin sì n‑sìi n‑pînni mɛ.
19 Lire kurugo yii yiye waha yii i ntɛ̀ɛn Kile kuni i.
Lire ká mpyi,
yii sí n‑shwɔ.
20 Ɲyɛ yii aha mpa zàmpɛɛnbii ɲya pi à Zheruzalɛmu kànhe kwûulo ná pi kàshicyeyi i tèni ndemu i ke,
yii i ntɛ̀ɛn ná lʼe ku tèejyaanʼà byanhara.
21 Lire tèni ká nɔ,
mà shin maha shin ta Zhude kùluni i ke,
pirefee pi a fî,
pi a wá ɲaɲyi kàmpanŋke na.
Lʼaha mpiimu ta Zheruzalɛmu yabiliŋi i ke,
pirefee pi fê a fworo kànhe e.
Lʼaha mpiimu ta sige e ke,
pire kà núru piye ta raa ma kànhe e mɛ.
22 Ɲaha kurugo yɛ cyire canmpyaagilʼe,
Kile sí Zheruzalɛmu shiinbii sâra si ntàanna ná pi kapyiiŋkilʼe.
Lire mpyiŋi cye kurugo jwumpe Kile tùnntunmpilʼà sémɛ ke,
puru sí n‑fûnŋɔ.
23 Cyire canmpyaagii sí n‑waha lahigiifee ná pyìnɛɛbii na sèlʼe.
Yii li cè,
Kile lùuni sí n‑yîri kìni sùpyire taan sèlʼe,
yyefugo nimbwɔhɔ ku sí n‑pyi kìni i.
24 Pi zàmpɛɛnbii sí n‑pa niɲyahara bò pi e ná kàshikwɔnŋwɔɔyi i,
si pi niɲyahamii cû ŋkàre bilere na diɲyɛ yyaha kurugo.
Supyishiŋi sanŋi sí n‑pa Zheruzalɛmu jya,
si fànha cyán ku na,
fo sí n‑pa nɔ Kile ɲyii tèni na.
Yesu sí núru n‑yîri nìɲyiŋi na si mpa
25 Lire kàntugo kakyanhala kacyeeŋkii sí n‑pa raa n‑pyi canŋa ɲyiini ná yiŋke ná wɔrigilʼe.
Suumpe lùbwɔhe sí n‑pa raa fuuli raa yîri sʼa tùnmpe pyi sèlʼe.
Puru tùnmpe sí supyishiŋi puni pyi u a fyáge sèlʼe.
26 Kawaani li sí n‑pa diɲyɛŋi ná u funŋɔyaayi ta ke,
lire funmpɛɛnre sí pìi bò.
Yii li cè nìɲyiŋi yaayi sí n‑pa n‑cúnŋɔ n‑cúnŋɔ n‑yîri yi tatɛɛnyi i.
27 Ɲyɛ lire tèni i,
pi sí Supyaŋi Jyaŋi nimpaŋi ɲya ɲahaɲyi i,
ná sífente ná sìnampe tɛgɛlɛ baa wumpe e.
28 Yii aha cyire karigii ɲya cyi à sìi na mpyi tèni ndemu i ke,
yii i yii ɲùɲyi yîrige,
yii i yyahayi le nìɲyiŋi i,
ɲaha na yɛ tèni i Kile sí yii shwɔ ke,
lire tènʼà byanhara.»
Yii a kacyeeŋkii kàanmucaa
29 Ɲyɛ ka Yesu si yyecyeenɛ pyi na:
«Yii fizhiye cige ná cire sannte puni kàanmucya a wíi kɛ!
30 Yii aha mpa ti ɲya ti i fûnni,
yii maha ntɛ̀ɛn ná lʼe na nùŋgwɔhʼà byanhara.
31 Lire pyiŋkanni na,
yii aha mpa cyire karigii ɲya cyi i mpyi,
yii i ntɛ̀ɛn ná lʼe na Kile Saanre tènʼà byanhara.
32 Sèeŋi na mii sí yi jwo yii á,
mpii pi à dá mii na ke,
pire sí cyire karigii ɲya tapyige ea.
33 Nìɲyiŋi ná ɲìŋke sí n‑pa n‑tòro,
ŋka mii jwumpe sí n‑kwôro fo tèekwombaa.
34 Yii a yiye kàanmucaa!
Yii àha yii sɔ̀nŋɔre taha lyìmbwooni ná sinmbyaani ná ŋge diɲyɛŋi yaayi ɲcyaŋi na fo mii cannuruge ku pa n‑pâa yii e mɛ.
Bà fyaŋi maha mpâlʼa uye ɲya cwoŋi i mɛ,
35 amuni mii cannuruge sí n‑pâa diɲyɛŋi sùpyire puni i.
36 Lire e yii àha sàa le mɛ,
yii kwôro Kileɲarege na tèrigii puni i,
bà yii si mpyi si fànha ta,
si shwɔ kawaagii nimpaaŋkii na,
si jà ɲjyére Supyaŋi Jyaŋi yyahe taan mɛ.»