Macwo 24

Yesu à jwo na Kileɲaarebage sí n‑jya

(Marika 13.1-23; Luka 21.5-24)

Ɲyɛ mà Yesu yaha u u si raa fwore Kileɲaarebage e, ka u si file u na maa u pyi na u Kileɲaarebage ɲwɔŋkanni wíi. 2 Ka u u pi pyi: «Ŋke basinaŋke yii ɲyɛ na ɲanʼamɛ ke, sèeŋi na mii sí yi jwo yii á, canŋa na ma, ku puni sí n‑sìi n‑pwɔ̀n n‑cyán, si ku ŋkunuɲyi puni waraga, fo si ku kafaayi láha láha yiye na.»

3 Ɲyɛ ka Yesu sí n‑kàrʼa sà ntɛ̀ɛn Olivye cire ɲaŋke ɲuŋʼi. Ka u cyelempyiibii kanni si file u na, maa u pyi: «Wuu cyelentuŋi, ɲaha tère e cyire karigii sí n‑pyi yɛ? Nde li sí mu tèenuruni ná diɲyɛŋi tèekwooni cyêe wuu na ke, lire jwo wuu á.»

4 Ka Yesu si pi pyi: «Yii a yiye kàanmucaa! Yii àha sùpya yaha u yii wurugo mɛ. 5 Yii li cè na shinɲyahara sí mii mɛge le piye na, si mpa jwo yii á na kyaa lʼà jwo ke, na pire pi ɲyɛ ure. Pi sí raa shinɲyahara ɲwɔ fáanŋi sʼa wuruge. 6 Yii sí raa kàshiyi shɛnrɛ núru yiye táan, sʼa yi shɛnrɛ núru laatɔɔnyi i, lire kà yii funŋɔ pɛn mɛ. Yii li cè na cyire karigii mpyimbaa ɲyɛ mɛ, ŋka lire bà li ɲyɛ diɲyɛŋi tèekwooni mɛ. 7 Supyishiŋi wà sí n‑pa n‑yîri n‑sà n‑cwo wà na, kìni là sí n‑pa n-yîri n‑sà n‑cwo là na. Katibwɔhe ná ɲìŋke ɲcyɛ̀ɛnnɛŋi sí n‑pyi cyeye niɲyahayʼe. 8 Ɲcyii karigii puni na ɲyɛ kanhare tasiige, bà laani maha yîri maa nta a yaa ná li ziŋi i mɛ.

9 Pi sí n‑pa raa yii leni cye e, pi raa yii kyérege, sʼa yii bùu, yii kyaa sí n‑pɛn supyishiŋi punʼá mii mɛge kurugo. 10 Lire sí shinɲyahara pyi ti fworo Kile kuni i, sʼa tiye leni zàmpɛɛnbii cye e, si tiye kyaa pɛn tiyʼá. 11 Kafinivinibii pìi sí n‑pa piye pyi Kile tùnntunmii, si shinɲyahara wurugo. 12 Pege mpèeŋi kurugo, tàange sí n‑pa n‑cyɛ́rɛ shinɲyahara á. 13 Ŋka ŋgemu ká jà a uye waha maa ntɛ̀ɛn Kile kuni i fo mà sà nɔ tɛgɛni na ke, urufoo sí n‑shwɔ.

14 Jwumpe Nintanmpe pʼà yyaha tíi ná e ke, puru sí n‑jwo diɲyɛŋi supyishiŋi punʼá, bà pi si mpyi si sèeŋi lógo mɛ. Lire kàntugo diɲyɛŋi tèekwooni sí n‑ta nɔ.

15 Ɲyɛ yapege kʼà sàa pɛn Kile á, ná Kile tùnntunŋi Daniyɛli à ku kyaa jwo ke, yii aha kuru ɲya Kileɲaarebage sèecyage e tèni ndemu i ke, ŋgemu ká mpe jwumpe lógo ke, urufoo u yyaha le u u pu ɲwɔhe cya a cè! 16 Ɲyɛ lire tèni ká nɔ mà shin maha shin ta Zhude kùluni i ke, pirefee pi a fî pi a wá ɲaɲyi kàmpanŋke na. 17 Lʼaha ŋgemu ta u bage kàtanŋke ɲuŋʼi ke, urufoo kà núru ntîge si yaaga lwɔ́ bage e mɛ, u u ntílʼa tîge u a fî. 18 Lʼaha ŋgemu ta kɛrɛge e ke, urufoo kà núru raa ma pyɛngɛ si mpa u vàanntinmbwɔhe lwɔ́ mɛ. 19 Cyire canmpyaagii sí n‑waha lahigiifee ná pyìnɛɛbii na sèlʼe. 20 Yii a Kile ɲáare, bà yii canveŋke si mpyi kʼàha mbɛ̂ ná wyeere tèni i, lire ɲyɛ mɛ ná e mɛ. 21 Yire canɲyi sí n‑waha sèlʼe. Mà lwɔ́ diɲyɛ tasiige e, mà pa bwɔ̀n niɲjaa na, uru ŋgahaŋi fiige saha mpyi a ɲya mɛ, fo mà sà diɲyɛ kwɔ̀, uru ŋgahaŋi fiige sàha mú sì n‑pyi mɛ. 22 Kàmpyi Kafooŋi Kile mpyi a uru ŋgahaŋi tèni bere mɛ, sùpya mpyi na sì n‑shwɔ mɛ. Ŋka u à u tèni bere u niɲcwɔnribii kurugo, bà pire si mpyi si shwɔ mɛ.

23 Ɲyɛ shin ká jwo yii á na Kile Niɲcwɔnrɔŋi na wá naha, lire ɲyɛ mɛ u wá mɛŋi i, yii àha ndá urufoo na mɛ. 24 Ɲaha kurugo yɛ kafinivinibii pìi sí n‑yîri na pire pi ɲyɛ Kile Niɲcwɔnrɔŋi, pìi sí raa ŋko na pire na ɲyɛ Kile tùnntunmii. Pi sí raa kacyeeŋkii cyêre, sʼa kakyanhala karigii pyi, bà pi si mpyi, kampyi pi sí n‑jà, sʼa Kile niɲcwɔnribii mú bá wuruge mɛ. 25 Yii lógo! Mii à ɲcyii karigii jwo yii á, mà jwo cyi tèni li nɔ ke.»

Yesu sí núru n‑yîri nìɲyiŋi na si mpa

(Marika 13.24-27; Luka 21.25-28)

26 Ka Yesu si núrʼa jwo: «Ɲyɛ wà ha jwo yii á na na wá síwage e, yii àha ŋkàre wani mɛ. Wà ha yii pyi na u na wá bage kʼe, yii àha ndá yire na mɛ. 27 Bà sùpyire puni maha kileɲini ɲya lʼà yîri diɲyɛŋi ɲùŋke kà na, maha sà fworo ɲùŋke sanŋke na mɛ, amuni sí ɲya u cannuruge. 28 Cyage e yakwugo ɲyɛ ke, wani cinmpunɲyi ɲyɛ na bínnini.

29 Cyire canmpyaagii yyefuge ká ntòro,

“Canŋa ɲyiini sí n‑tíi n‑pyi numpire,

yiŋke sàha mú sì raa bɛ̀ɛnmɛ yige mɛ.

Wɔrigii sí raa n‑cwu,

yire kakyanhala yaayi yi ɲyɛ nìɲyiŋi na ke,

yire sí n‑cúnŋɔ n‑cúnŋɔ n‑yîri yi tatɛɛnyi i.”

30 Ɲyɛ lire tèni i, fyèŋi sí n‑ta ɲya nìɲyiŋi na, ɲìŋke supyishiŋi puni sí raa mɛɛ súu, pi puni sí u nimpaŋi ɲya ɲahaɲyi i ná fànhe ná sìnampe nimbwompe e. 31 Lire kàntugo mpurubwɔhɔ mɛɛ sí n‑fworo fànha na, u sí u mɛ̀lɛkɛɛbii tun diɲyɛŋi kàmpanɲyi sicyɛɛreŋi puni na, pi i Kile niɲcwɔnribii wà piye na, mà lwɔ́ diɲyɛŋi ɲùŋke kà na mà sà nɔ ku sanŋke na.»

Yii a kacyeeŋkii kàanmucaa

(Marika 13.28-31; Luka 21.29-33)

32 Ka Yesu si núrʼa jwo: «Yii kàanmucya a wíi kɛ! Kʼaha ŋkéɲyɛ nivɔnyɔ yige, maa fûn tèni ndemu i ke, yii maha jwo na nùŋgwɔhʼà byanhara. 33 Lire pyiŋkanni na, yii aha mpa cyire karigii puni ɲya cyi i mpyi, yii i ntɛ̀ɛn ná lʼe na tènʼà byanhara, li bá a nɔ. 34 Sèeŋi na mii sí yi jwo yii á, mpii pi à dá mii na ke, pire sí cyire karigii ɲya tapyige e. 35 Nìɲyiŋi ná ɲìŋke sí n‑pa n‑tòro, ŋka mii jwumpe sí n‑kwôro fo tèekwombaa.»

Kile kanni u à Supyaŋi Jyaŋi Yesu tèenuruni cè

(Marika 13.32-37; Luka 17.26-30, 34-36)

36-37 Ka Yesu si núrʼa jwo: «Nde li ɲyɛ nùruŋi ke, shin niŋkin ɲyɛ a sìi ŋgemu u à u tèenuruni ná u cannuruge cè mɛ. Ali ná Jyafooŋi ɲyɛ a kuru canŋke cè mɛ. Tufooŋi Kile kanni u à ku cè. Karigii cyi mpyi na mpyi Nuhu tìiŋi i ke, cyire shiŋi sí raa n‑pyi. 38 Nuhu tìiŋi i, mà jwo lùbwooni li pa ke, sùpyire mpyi na lyî marii byii, cyeebii mpyi na ŋkaan nàmbaabilʼá, nàmbaabii sí i cyeebii lèŋi fo mà sà nɔ canŋke Nuhu à jyè bakwɔɔge e ke, 39 pi mpyi na sɔ̂nŋi yafyin na mɛ, ka lùbwooni si mpa pi puni shi bò. Ɲyɛ amuni Supyaŋi Jyaŋi tèenuruni mú sí n‑pa n‑pyi.

40 Ɲyɛ lire tèni ká shiin shuunni ta kɛrɛge e, wà sí n‑lwɔ́ si u sanŋi yaha. 41 Lʼaha cyee shuunni ta pi i sùmaŋi tirili tirage na, wà sí n‑lwɔ́ si u sanŋi yaha.

42 Lire e ke yii bégele tèrigii puni i, ɲaha na yɛ yii ɲyɛ a yii Kafooŋi cannuruge cè mɛ. 43 Yii lógo! Kàmpyi bage foo mpyi maha nàŋkaaŋi tèepani cè numpilage e, u mpyi maha sì ɲɛɛ zínni ŋɔ́ɔ si u yaha u kakyaare pyi mɛ. 44 Lire kurugo yii mú à yaa yii bégelʼa kwôro, ɲaha na yɛ canŋke ku ɲyɛ yii ɲyɛ a tɛ̀ɛn ná kʼe mɛ, kurʼe Supyaŋi Jyaŋi sí n‑pa.

45 Ɲyɛ báarapyiŋi na ɲùŋufooŋʼà dá pi sanmpii shwɔhɔlʼe, u yákiliŋi mú sʼà pêe ke, uru báarapyiŋi shiŋi ɲùŋufooŋi maha yaha u u pyɛnge karigii cwɔɔnre, maa ɲjyìŋi kaan báarapyiibii sanmpilʼá u tèekanlʼe. 46 Lire e báarapyi maha báarapyi ɲùŋufoo, u à pa u ta u u báaraŋi niɲcɛnŋi pyi amuni ke, uru wuuni sí ɲwɔ. 47 Sèeŋi na mii sí yi jwo yii á, uru báarapyiŋi ɲùŋufooŋi sí u pyɛnge karigii puni ɲùŋufente le u cye e. 48 Ŋka báarapyiibii kacwɔnrɔŋi ŋgemu ká mpyi shinpi maa sɔ̂nŋi uye funŋʼi na uru ɲùŋufooŋi sí mɔ lire kùluni i, 49 maa wá na u báarapyiɲɛɛbii bwùun, maa uye yaha ɲjyìŋi ná sinmbyaani laage e ná sinmbyampiyi i ke, 50 canŋke ku ɲyɛ uru báarapyiŋi ɲyɛ a tɛ̀ɛn ná kʼe mɛ, ná tèni li ɲyɛ u ɲyɛ a sɔ̂nŋɔ ná lʼe mɛ, u ɲùŋufooŋi sí n‑pâa n‑pa. 51 U sí uru báarapyiŋi kyérege sèe sèlʼe, mpii pi à fyìnmɛ tò wwomɔ na ke, si u ná pire sàraŋi pyi niŋkin. Wani u sí raa mɛɛ súu sʼa ŋkyànhigii kùru.»