Wà ɲyɛ a yaa u wà ɲùŋɔ kyán Kile na mɛ
17
Canŋka Yesu à jwo u cyelempyiibilʼá:
«Karigii cyi maha sùpyaŋi ɲùŋɔ kyán Kile na ke,
cyire mpyimbaa ɲyɛ a sìi mɛ.
Ŋka ŋgemu ká mpyi kaɲuŋɔ maa sùpya ɲùŋɔ kyán Kile na ke,
urufoo wuunʼà kɛ̀ɛge!
2 Li bá sí n‑pwɔ́rɔ urufolʼá pi kafaabwɔhɔ pwɔ u yacige e,
pi i u wà baŋi i,
mà tòro u nde nàŋkobilini là niŋkin ɲùŋɔ kyán.
3 Lire e ke yii a yiye kàanmucaa.
Mu cìnmpworoŋi ká mu mùmpɛnmɛ pyi,
u yyere maa u yɛrɛ.
U aha mu yɛrɛge lógo,
maa toroŋkanni kɛ̂ɛnŋɛ,
mu à yaa mu u yàfa u na lire kani i.
4 Canŋke niŋkinŋi i,
mu cìnmpworoŋi ká mu mùmpɛnmɛ pyi mà sà nta fo tooyo baashuunni,
tɔɔgɔ maha tɔɔgɔ u a sì mpa uye mpìnni kan mu á,
mu à yaa mu u yàfa u na cyire karigii puni i.»
5 Ka Yesu tùnntunmpii si u pyi:
«Kafooŋi,
ɲyɛ lire sanni i ke,
là bâra wuu dániyaŋi na.»
6 Ka Kafooŋi si pi pyi:
«Sèeŋi na mii sí yi jwo yii á,
yii dániyaŋi mɛ́ɛ nʼa mpyi a cyɛ́rɛ mutaridi bile fiige,
yii mpyi na sí n‑jà ŋke cibwɔhe pyi ku kò kuyʼá,
ku u sà ɲcûru baŋi i,
ku mú mpyi na sí lire pyi.»
Báarapyiŋi ɲyɛ a yaa ná ŋkèeŋi wabɛrʼe mɛ
7 Ka Yesu si núrʼa jwo:
«Lʼaha mpyi mu à jwo báarapyi na ɲyɛ yii wà á,
ka u u yîri faa sige e,
lire ɲyɛ mɛ yatɔɔre tanahage e mà pa,
tá urufoo sí ɲɛɛ báarapyiŋi pyi u tílʼa tɛ̀ɛn u u lyî la?
8 Tá urufoo sì báarapyiŋi pyi u vàanɲwɔhɔyi wwû,
u u shwɔhɔ a kan uru u lyî si bya,
lire kàntugo báarapyiŋi si nta a lyî si bya mɛ?
9 Báarapyiŋi mɛ́ɛ ká u tayyerege ɲî,
u ɲyɛ a yaa ná ŋkèeŋi wabɛrʼe mɛ!
10 Amuni li mú ɲyɛ,
báaraŋi Kile à kan yii á ke,
yii aha uru pyi a kwɔ̀,
yii li cè na yii ɲyɛ a yaa ná ŋkèeŋi wabɛrʼe mɛ.
Ɲaha kurugo yɛ nde yii mpyi a yaa yii pyi ke,
lire yii à pyi.»
Yesu à tògofee kɛ cùuŋɔ
11 Ɲyɛ mà Yesu niŋkareŋi yaha Zheruzalɛmu kànhe e,
u mpyi na ŋkɛ̀ɛge Samari kùluni ná Galile wuuni tɛgɛŋkuuŋi i.
12 U à sà byanhara kànhe kà na,
ka tògofee kɛ si wá na u ɲùŋɔ bêni,
maa ntɛ̀ɛn laage e,
13 maa jwo ná u e fànha na:
«Yesu!
Cyelentuŋi!
Ɲùɲaara ta wuu na!»
14 Yesu à pi ɲya ke,
maa pi pyi:
«Yii a sì,
yii sà yiye cyêe Kile sáragawwuubii na.»
Mà pi niŋkaribii yaha,
ka pi i ɲcùuŋɔ.
15 Ɲyɛ pi wà niŋkin a uye ɲya u à cùuŋɔ ke,
maa núru na Kile kêre fànha na,
na ma.
16 U à pa nɔ Yesu na ke,
maa niŋkure sín u taan maa yyahe cyígile ɲìŋke na maa fwù kan u á sèlʼe.
Uru nàŋi na mpyi Samari shin.
17 Ka Yesu si jwumpe lwɔ́ maa jwo:
«Tá shiin kɛ bà mii à cùuŋɔ mɛ?
Taa pi sanmpii baacyɛɛreŋi ɲyɛ ke?
18 Ŋge nàŋi u ɲyɛ u ɲyɛ Yahutu mɛ,
uru kanni baare e,
sùpya ɲyɛ a ta mpii shiin kɛŋi i,
si núru n‑pa fwù kan Kile á mà?»
19 Maa yi jwo nàŋʼá:
«Yîri ma a sì,
mu dániyaŋʼà mu cùuŋɔ.»
Yii bégele yii a Yesu cannuruge sigili
20 Ɲyɛ lire kàntugo,
ka Farizhɛɛnbii si Yesu yíbe Kile Saanre tèesiini kyaa na,
ka u u pi pyi:
«Kile Saanre sí n-pyi,
ŋka ti sì n‑pyi yawiige,
21 sùpyire sí raa ŋkemu cyêre piye na sʼa ŋko “Yii wíi,
ti te naha!”
lire ɲyɛ mɛ “Ti te mɛŋi i!”
mɛ.
Yii li cè na Kile Saanre ɲyɛ yii shwɔhɔlʼe.»
22 Maa jwo u cyelempyiibilʼá:
«Tèni là na ma,
canŋke Supyaŋi Jyaŋi à yaa u pa ke,
yii la sí n-sìi n-pyi kuru canŋke ku wyɛ̀rʼa nɔ,
ŋka ku sì nɔ lire tèni i mɛ.
23 Sùpyire sí n‑pa raa ŋko “U naha naha!”
lire ɲyɛ mɛ “U wá mɛ yyére!”
Ŋka yii àha ntaha pi ɲwɔhʼi,
si ŋkàre wani mɛ.
24 Bà sùpyire puni maha kileɲini ɲya lʼà yîri diɲyɛŋi ɲùŋke kà na,
maha sà fworo ɲùŋke sanŋke na mɛ,
amuni Supyaŋi Jyaŋi sí ɲya u cannuruge.
25 Ŋka mà jwo kuru canŋke ku nɔ ke,
u à yaa u kyaala sèlʼe,
sùpyire niɲyahara sí u cyé.
26 Ɲyɛ Supyaŋi Jyaŋi tèenuruni ká byanhara,
karigii cyi mpyi na mpyi Nuhu tìiŋi i ke,
cyire shiŋi sí raa n‑pyi.
27 Nuhu tìiŋi i,
sùpyire mpyi na lyî,
marii byii,
maa cyeebii lèŋi,
marii pi pyìibii kaan nàmbaya na,
fo mà sà nɔ canŋke Nuhu a jyè bakwɔɔge e,
ka lùbwooni si sùpyire sannte puni shi bò ke.
28 Ɲyɛ amuni Loti tèni i sùpyire mú mpyi.
Pi mpyi na lyî,
maa byii,
marii zhwoŋi ná pɛrɛmpe pyi,
maa cire cɛnmi,
maa bayi faanre.
29 Ŋka canŋke Loti à fworo Sɔdɔmu kànhe e ke,
ka nage ná ŋkìrigiŋi si fworo nìɲyiŋi na zànpya fiige,
mà wu kànhe sùpyire na,
maa pi shi bò,
30 ɲyɛ canŋke Supyaŋi Jyaŋi sí núru uye cyêe sùpyire na ke,
amuni kuru canŋke sí n‑pâa pi e.
31 Kuru canŋke ká nɔ,
mà ŋgemu ta u bage kàtanŋke ɲuŋʼi ke,
urufoo kà núru ntîge si yaaga lwɔ́ bage e mɛ,
u tílʼa tîge u a fî.
Lʼaha mpyi mà ŋgemu ta kɛrɛge e ke,
urufoo kà núru raa ma pyɛngɛ mɛ.
32 Nde lʼà Loti cwoŋi ta ke,
yii sɔ̂nŋɔ lire na kɛ!
33 Shinŋi u ɲyɛ na li caa u niɲjaaŋi si ɲwɔ ke,
urufoo nùmpanŋke sí n‑kɛ̀ɛge.
Ŋka shinŋi u à u niɲjaaŋi kɛ̀ɛge mii kurugo ke,
urufoo sí nùmpanŋa ta.
34 Mii sí yi jwo yii á,
lire tèni ká bɛ̂ ná numpilage e,
mà shiin shuunni ta pi à sínni yasinniŋɛ niŋkin na,
wà sí n‑lwɔ́ si u sanŋi yaha.
35 Lʼaha cyee shuunni ta pi i sùma súu siɲcyan,
wà sí n‑lwɔ́ si u sanŋi yaha. [
36 Lʼaha mpyi mà nàmbaa shuunni ta kɛrɛge e,
wà niŋkin sí n‑lwɔ́ si u sanŋi yaha.]»
37 Ɲyɛ ka cyelempyiibii si Yesu yíbe:
«Kafooŋi,
taa lire sí n‑pyi ke?»
Ka u u pi pyi:
«Cyage e yakwugo ɲyɛ ke,
wani cinmpunɲyi ɲyɛ na bínnini.»