Marika 9

Sèeŋi na mii sí yi jwo yii á, yii mpii pi ɲyɛ naha ke, pìi na ɲyɛ yii e, pire sì n‑kwû ná pi ɲyɛ a ɲya, ti i ma ná síŋi puni i mà yɛ.»

Yesu pyiŋkannʼà kɛ̂ɛnŋɛ

(Macwo 17.1-13; Luka 9.28-36)

2 Canmpyaa baani kàntugo, ka Yesu si Pyɛri ná Yakuba ná Yuhana lwɔ́, maa ŋkàre ná pire kanni i ɲaŋke kà nintɔɔngɔ ɲuŋʼi. Mà pi yaha wani, Yesu pyiŋkannʼà pa ŋkɛ̂ɛnŋɛ pi ɲyii na. 3 Ka u vàanɲyi si mpâlʼa fíniŋɛ fo na ɲî. Yi mpyi a fíniŋɛ fíniŋiŋkanni ndemu na ke, sùpya ɲyɛ ɲìŋke na ŋgemu u sì n‑jà yaaga pyi ku fíniŋɛ amuni mɛ. 4 Kuru tanuge e, ka tèecyiini ná si mpa Yesu mú taanre ɲyii na, mà pa a yu ná u e. 5 Ka Pyɛri si Yesu pyi: «Wuu cyelentuŋi, wuu à pa naha ke, lʼà ɲwɔ sèlʼe. Wuu yaha wuu u vùnyɔ taanre kwòro, niŋkin sí n‑pyi mu wogo, niŋkin sí n‑pyi Musa wogo, niŋkin sí n‑pyi Eli wogo.» 6 Pyɛri à puru jwumpe jwo uye ɲùŋɔ kurugo, ɲaha na yɛ u ná u shɛ̀rɛfeebii shuunniŋi mpyi a fyá a tòro. 7 Mà pi yaha puru na, ɲahaŋa à tîge mà pi tò, ka mɛjwuu si fworo kuru ɲahaŋke e: «Mii Jyaŋi u ɲyɛ ŋge, u kanʼà waha mii na sèlʼe. Yii a núru u ɲwɔ na.» 8 Ka Yesu cyelempyiibii si mpâlʼa wíi wílʼa maha, pi saha ɲyɛ a sùpya ɲya mɛ, fo Yesu kanni.

9 Mà pi yaha pi i ntîri ɲaŋke na, ka Yesu si yi jwo a waha pi á na nde pi à ɲya ke, na pi àha ŋkwɔ̀ li jwo sùpya á mɛ, fo ká ɲɛ̀ a fworo kwùŋi i. 10 Ka u cyelempyiibii si puru jwumpe yaha piye funŋʼi, ŋka pi mpyi na piye yíbili: «Mà ɲɛ̀ a fworo kwùŋi i ɲwɔhe ku ɲyɛ ɲaha yɛ?»

11 Ɲyɛ ka cyelempyiibii si u pyi: «Ko sʼà jwo na Kile tùnntunŋi Eli u à yaa u fyânha a pa yyaha na.» 12 Ka u u pi pyi: «Sèe wi, Eli à yaa u fyânha a pa si karigii puni kurigii tíi. Ŋka li mú à sémɛ Kile Jwumpe Semɛŋi i na “Supyaŋi Jyaŋi à yaa u kyaala sèlʼe, sùpyire kuro mú sì mpyi u e mɛ.” Yii à sɔ̂nŋɔ lire na la? 13 Mii sí yi jwo yii á, Eli à pa a kwɔ̀, pi à u pyi pi ɲyii pyiŋkanni na, bà lʼà sémɛ u kyaa na Kile Jwumpe Semɛŋi i mɛ.»

Yesu à pyàŋi wà jína kɔ̀rʼa yige u e

(Macwo 17.14-21; Luka 9.37-43a)

14 Tèni i Yesu ná u taanreŋʼà nɔ pi sanmpii cyage e ke, pi à sà shinɲyahara ta tʼà pi kwûulo, pìi mpyi a nàkaana ta ná pi e. 15 Sùpyirʼà pa Yesu ɲya ke, lʼà pâa pi puni i sèlʼe. Ka pi i fê a kàre u fye e maa u shɛ́ɛre. 16 Ka Yesu si u cyelempyiibii yíbe: «Ɲaha shi na yii ná pire na yiye kyáali yɛ?»

17 Ka wà si Yesu pyi tire sùpyire shwɔhɔlʼe: «Cyelentuŋi, mii à pa ná na jyaŋi i mu yyére. Jínaŋi wà u ɲyɛ u e, urʼà u pyi búbu. 18 Uru jínaŋi ká yîri ná u e cyaga maha cyagʼe ke, u maha u cyán ɲìŋke na, u maha ŋkyànhigii kùru, u ɲwɔge mú maha ŋkânŋi, fo u maha mpa shiile. Mii à mu cyelempyiibii ɲáare pi jínaŋi kɔ̀rʼa yige u e, pi ɲyɛ a jà mɛ.» 19 Ka Yesu si jwo: «Ei! Yii dánabaa sùpyiibii nimpiibii, fo ɲaha tère e mii sí n‑kwôro ná yii e yɛ? Mii sí yii kapyiiŋkii kwú naye e sà nɔ fo ɲaha tère na yɛ? Yii a ma ná pyàŋi i na á.»

20 Ka pi i mpa ná u e. Tèni i jínaŋʼà Yesu ɲya ke, ka u u pyàŋi cyán na kúu ŋkúu ɲìŋke na, maa u ɲwɔge pyi ku u ŋkânŋi. 21 Ka Yesu si pyàŋi tuŋi yíbe: «Fo ɲaha tère e jínaŋʼà jyè u e yɛ?» Ka tufooŋi si u pyi: «Mà lwɔ́ fo u nimbilere wuŋi na. 22 Tèni lʼe, jínaŋi maha u cyán nage e, tèni lʼe maa u cyán lwɔhe e si nta u bò. Kampyi mu sí n‑jà cyaga pyi, wuu ɲùɲaare ta, maa wuu tɛ̀gɛ.» 23 Ka Yesu si u pyi: «Mu à jwo kampyi mii sí n‑jà cyaga pyi. Ŋka mu aha jà a dá mii na, karigii puni sí n‑jà n‑pyi mu á.» 24 Ka pyàŋi tuŋi si ntílʼa jwo fànha na: «Mii à dá, ŋka na tɛ̀gɛ, ɲaha na yɛ mii dániyaŋi fànhʼà cyɛ́rɛ.»

25 Yesu à sùpyire ɲya tʼà lwɔ́ a tò u na ke, ka u u fànha cyán jínaŋi na, maa u pyi: «Jínaŋi, mu u na jyè sùpyire e marii pi pyi búbuu ná ɲùɲcunnii ke, fworo ŋge pyàŋi i, ma sàha núru ɲjyè u e mɛ.» 26 Ka jínaŋi si kwuugo wà, maa pyàŋi cúnŋɔ cúnŋɔ fànha na, maa fworo u e. Pyàŋʼà pyi mu à jwo u à kwû, fo shinɲyahara à jwo u à kwû. 27 Ka Yesu si u cû cyɛge na a yîrige, ka pyàŋi si yyére.

28 Yesu à jyè bage e ke, ka u cyelempyiibii si u ŋwɔhʼa yíbe: «Ɲaha na wuu ɲyɛ a jà a ŋge jínaŋi kɔ̀rʼa yige pyàŋi i mà yɛ?» 29 Ka Yesu si pi pyi: «Kileɲarege kanni ku ɲyɛ na jìnʼa ŋge jínaŋi shiŋi kɔ̀rʼa yige sùpya e.»

Yesu à u kwùŋi ná u ɲɛ̀ŋi kyaa jwo sahaŋki

(Macwo 17.22-23; Luka 9.43b-45)

30 Yesu ná u niŋkaribilʼà Galile kùluni jyiile, ŋka u la ɲyɛ a mpyi sùpya si li cè mɛ, 31 ɲaha na yɛ u mpyi na u cyelempyiibii kâlali, marii yu pi á: «Pi sí n‑pa le sùpyire cye e pi bò, ŋka u kwùŋi canmpyitanrewuuni, u sí ɲɛ̀.» 32 Pi ɲyɛ a pyi a puru jwumpe ɲwɔhe cè mɛ, fyagare sʼà pi sige pi ɲyɛ a jà a u yíbe mɛ.

Sùpyaŋi u ɲyɛ ɲùŋufoo Kile yyére ke

(Macwo 18.1-5; Luka 9.46-48)

33 Ka Yesu ná u si nɔ Kapɛrɛnamu kànhe e. Tèni i pi a jyè bage e ke, ka u u pi yíbe: «Ɲaha nàkaana yii mpyi a ta kuni na yɛ?» 34 Ka pi i fyâha, ɲaha na yɛ nàkaante ɲùŋke ku mpyi na pire puni i, jofoo u ɲyɛ ɲùŋufooŋi yɛ. 35 Ka Yesu si ntɛ̀ɛn, maa pi shiin kɛ ná shuunniŋi yyere, maa yi jwo pi á: «Ŋgemu la ká mpyi si mpyi ɲùŋufoo ke, urufolʼà yaa u uye pyi kàntugo yyére wuŋi, u raa báare pi sanmpilʼá.»

36 Ka Yesu si pyàŋi wà cû a pa pi shwɔhɔlʼe, maa u lwɔ́, maa yi jwo pi á na: 37 «Shin maha shin u à ɲɛnʼa ŋge pyàŋi fiige cùmu lemɛ ɲwɔ mii kurugo ke, urufolʼà mii cùmɔ lemɛ ɲwɔ mú. Shin maha shin sí u à mii cùmɔ lemɛ ɲwɔ ke, urufoo mú à mii tunvooŋi cùmɔ lemɛ ɲwɔ.»

Ŋgemu ká mpyi u ɲyɛ wuu zàmpɛn mɛ, uru na ɲyɛ ná wuu e

(Luka 9.49-50)

38 Ka Yuhana si yi jwo Yesu á: «Cyelentuŋi, wuu à nàŋi wà ɲya u u jínabii kɔ̀re na yige sùpyire e ná mu mɛge e, ka wuu u u sige li na, ɲaha na yɛ wuu wà bà mɛ.» 39 Ka Yesu si u pyi: «Yii àha u sige li na mɛ, sùpya sì n‑jà raa kakyanhala pyi ná mii mɛge e, si ntíi núru mii mɛge kɛ̀ɛge ntaha lire na mɛ. 40 Ŋgemu u ɲyɛ u ɲyɛ wuu zàmpɛn mɛ, urufoo na ɲyɛ ná wuu e. 41 Amuni li mú ɲyɛ shin maha shin u à fùnɲcwokwuɲyaga lwɔhɔ kan yii á mà lire ɲùŋke pyi na yii na ɲyɛ wuu ke, sèeŋi na mii sí yi jwo yii á, urufoo sí n‑sìi lire tɔ̀ɔnŋi ta.»

Karigii cyi maha sùpyaŋi yaha kapiini na ke, u à yaa u láha cyire na

(Macwo 18.6-9; Luka 17.1-2)

42 Ka Yesu si núrʼa pi pyi: «Nte nàŋkopyire tʼà dá mii na mà kwɔ̀ ke, shin maha shin ká lire là niŋkin ɲùŋɔ kyán, lʼà pwɔ́rɔ urufolʼá pi kafaabwɔhɔ pwɔ u yacige e, pi i u wà baŋi i. 43 Mu cyɛge kà niŋkin ká a si mu pyi mu u kapii pyi, ku kwɔ̀n a wà, maa jyè ná ku sanŋke e shìŋi niŋkwombaaŋi i. Lirʼà pwɔ́rɔ mu á, mu ná ma cyeyi shuunniŋi u jyè nafugombaage e. [ 44 “Fyɛɛnre ti maha sùpyire kyaare lyî kuru cyage e ke, tire ɲyɛ na ŋkwûu mɛ, kuru cyage nage mú ɲyɛ na fùru mɛ.”] 45 Mu tɔɔge kà niŋkin ká a si mu pyi mu u kapii pyi, ku kwɔ̀n a wà, maa jyè shìŋi niŋkwombaaŋi i ná tɔɔgɔ niŋkin i. Lirʼà pwɔ́rɔ mu á, mu ná ma tooyi shuunniŋi u jyè nafugombaage e. [ 46 “Fyɛɛnre ti maha sùpyire kyaare lyî kuru cyage e ke, tire ɲyɛ na ŋkwûu mɛ, kuru cyage nage mú ɲyɛ na fùru mɛ.”] 47 Mu ɲyiini là ká a si mu pyi mu u kapii pyi, li wwûlʼa wà, mu ɲyii niŋkin wuŋi u jyè e. Lirʼà pwɔ́rɔ mu á, mu ná ma ɲyiigii shuunniŋi u jyè nafugombaage e. 48 “Fyɛɛnre ti maha sùpyire kyaare lyî kuru cyage e ke, tire ɲyɛ na ŋkwûu mɛ, kuru cyage nage mú ɲyɛ na fùru mɛ.”

49-50 Kyaage kʼà ɲáaŋa nage fiige ke, kuru kyaage Kile sí n‑tɛ̀gɛ u shiinbii toroŋkanni kɛ̂ɛnŋɛ. Suumpʼà táan, suumpe tìpoompe ká fworo pʼe, ɲaha ku sí n‑jà pu pyi pu táan sahaŋki yɛ? Yii pyi suumɔ niɲcɛnmɛ, yyeɲiŋke ku pyi yii shwɔhɔlʼe.»