Yesu à u cyelempyiibii tun pi sà a Jwumpe Nintanmpe yu
9
Lire kàntugo ka Yesu si u cyelempyiibii kɛ ná shuunniŋi pyi pi à bínni u taan,
maa síŋi ná fànhe kan pi á,
bà pi si mpyi sʼa jínabii puni kɔ̀re sʼa yige pifeebilʼe,
sʼa yampii cùuŋi mɛ.
2 Lire ɲwɔhɔ na,
u à pi tun pi sà a Kile Saanre kyaa yu sùpyirʼá,
pi raa yampii cùuŋi.
3 U à pi pyi:
«Yii àha ŋkwɔ̀ yaaga lwɔ́ yiye cye e lire kùsheeni na mɛ,
mu à jwo kàbii,
lire ɲyɛ mɛ boro ná bwúuru ná wyɛ́rɛ.
Yii wà hà ŋkwɔ̀ vàanntinŋke kabɛrɛ lwɔ́ mbâra u yacige woge na mɛ.
4 Yii aha ŋkàre kànha maha kànha na,
ka wà si ɲɛɛ yii sunmbage na,
yii tɛ̀ɛn wani fo mà sà yaa ná yii tèekani i.
5 Ŋka kànhe ŋkemu shiin kampyi pi ɲyɛ a ɲɛɛ yii i yii sunmbage tîrige pire yyére mɛ,
yii nivworobii kuru kànhe e,
yii yii tooyi bambaŋi kwòro kwòrʼa wu wani,
lirʼà kajwuu kwɔ̀ kuru kànhe shiin na.»
6 Ɲyɛ ka pi i yîrʼa kàrʼa sà a Jwumpe Nintanmpe yu na mâre kànyi puni i,
maa yampii cùuŋi.
Saanŋi Erɔdi na uye yíbili na Yesu ɲyɛ jofoo yɛ
7 Ɲyɛ Yuhana boŋkwooni kàntugo,
saanŋi Erɔdi à pa Yesu kapyiiŋkii lógo,
ka li i u yákiliŋi wùrugo sèlʼe,
ɲaha na yɛ pìi mpyi na ŋko na Yuhana Batizelipyiŋi u à ɲɛ̀ a fworo kwùŋi i.
8 Pìi sí i ŋko na Kile tùnntunŋi Eli u à núrʼa pa,
pìi mú sí i ŋko na tèecyiini Kile tùnntunŋi wà u à ɲɛ̀ a fworo kwùŋi i.
9 Ka Erɔdi si jwo:
«Mii à pi pyi pi à Yuhana ɲùŋke kwɔ̀n,
jofoo shɛnrɛ mii saha sí ɲyɛ na núru amɛ yɛ?»
Ka u u wá na Yesu caa si u ɲya.
Yesu à shiin kampwɔhii kaŋkuro ɲwɔ cya
10 Ɲyɛ Yesu tùnntunmpilʼà núrʼa pa ke,
maa pi kapyiiŋkii puni jwo u á,
ka u u yîri ná pi e sùpyire sannte taan mà kàre pi mɛge cyage e Bɛtisayida kànhe kàmpanŋke na.
11 Sùpyirʼà pa pi saha cè ke,
maa ŋkàre wani pi fye e.
Ka u u pi cùmu lemɛ ɲwɔ,
maa Kile Saanre kyaa jwo pi á.
Mpii pi mpyi na yà pi e ke,
maa pire cùuŋɔ.
12 Tèni i canŋkʼà pa a ntîri ke,
ka Yesu cyelempyiibii kɛ ná shuunniŋi si file u na maa yi jwo u á na u sùpyire cye yaha,
bà pi si mpyi si sà ɲjyì ná tashwɔnyɔ cya kànyi ná sishwɔnbugure e mɛ,
ɲaha na yɛ sige funŋke e pire ɲyɛ.
13 Ka Yesu si pi pyi:
«Yii yabilimpii pi pi kan pi lyî.»
Ka pi i u pyi:
«Bwúuru ɲùnyɔ kaŋkuro ná fyapyaa shuunni cyi naha wuu á kanna,
fo lʼaha nta wuu yabilimpii sí n‑sà ɲjyì cya mpa ŋkan nte supyiɲyahare punʼá.»
14 Tire sùpyire e,
nàmbaabii kanni mpyi a shiin kampwɔhii kaŋkuro (5.000) kwɔ̀,
ka Yesu si u cyelempyiibii pyi pi à sùpyire tìŋɛ tìŋɛ kuruyo kuruyo,
yire kuruɲyi niŋkin niŋkinŋi puni mpyi a shiin beeshuunni ná kɛ kɛ kwɔ̀.
15 Ɲyɛ ka pi i sùpyire puni tìŋɛ tìŋɛ,
bà Yesu mpyi a yi jwo mɛ.
16 Ka Yesu si yire bwúuru ɲùɲyi kaŋkuruŋi ná cyire fyapyaagii shuunniŋi lwɔ́,
maa yyahe yîrige nìɲyiŋi i,
maa fwù kan Kile á yi kyaa na,
maa yi kwɔ̀n kwɔ̀n a kan u cyelempyiibilʼá,
pi kan sùpyirʼá.
17 Sùpyire puni ti mpyi wani ke,
tire punʼà lyî a tìn.
Ka pi i shàhii kɛ ná shuunni ɲî ɲjyìpaanyi na.
Pyɛri à jwo na Kile Niɲcwɔnrɔŋi u ɲyɛ Yesu
18 Ɲyɛ lire kàntugo,
mà Yesu ná u cyelempyiibii yaha,
u à yîri pi taan,
maa sà Kile ɲáare.
U à kwɔ̀ ke,
maa núrʼa pa,
maa pi yíbe:
«Sùpyire na mii sɔ̂nŋi jofoo yɛ?»
19 Ka pi i u pyi:
«Pìi wá na ŋko na Yuhana Batizelipyiŋi u ɲyɛ mu,
pìi sí i ŋko na Kile tùnntunŋi Eli u ɲyɛ mu,
pìi mú sí i ŋko na Kile tùnntunmpii pi à tòro ke,
na uru wà u à ɲɛ̀ a fworo kwùŋi i.»
20 Ka Yesu si pi pyi:
«Yii de?
Jofoo yii ɲyɛ na mii sɔ̂nŋi yɛ?»
Ka Pyɛri si u pyi:
«Kile Niɲcwɔnrɔŋi u ɲyɛ mu.»
21 Ka Yesu si yi jwo a waha pi á na pi àha ŋkwɔ̀ yire jwo sùpya á mɛ.
22 Maa núrʼa jwo:
«Lʼà pyi fànha kyaa Supyaŋi Jyaŋi u kyaala sèlʼe.
Yahutuubii kacwɔnribii ná Kile sáragawwuubii ɲùŋufeebii ná Kile Saliyaŋi cyelentiibii sí n‑cyé u na,
si u bò.
Ŋka u kwùŋi canmpyitanrewuuni,
u sí ɲɛ̀.»
Pyiŋkanni na wuu à yaa wuu taha Supyaŋi Jyaŋi Yesu fye e ke
23 Lire kàntugo ka Yesu si yi jwo u lógofeebii punʼá:
«Ŋgemu la ká mpyi si ntaha mii fye e ke,
urufolʼà yaa u cyé u yabiliŋi ɲyii karigii na,
u u ntɛ̀ɛn kyaage taan u u ntaha mii fye e canŋa maha canŋa,
pi mɛ́ɛ ká mpyi na sí urufoo bò kworokworocige na.
24 Ɲaha na yɛ ŋgemu la ká mpyi si u niɲjaaŋi yaa ɲwɔ ke,
urufoo sì nùmpanŋa ta mɛ,
ŋka ŋgemu ká kàntugo wà u niɲjaaŋʼá mii kurugo ke,
urufoo sí nùmpanŋa ta.
25 Ɲaha li sí ɲwɔ sùpyaŋʼá mà ma ɲyii yaayi puni ta ŋge diɲyɛŋi i niɲjaa,
mu nùmpanŋke si sà ŋkɛ̀ɛge yɛ?
26 Lire kurugo ŋgemu u na ɲcyíge Supyaŋi Jyaŋi ná u jwumpe na ke,
u aha bú mpa ná u sìnampe ná u Tuŋi wumpe ná Kile mɛ̀lɛkɛɛbii wumpe e canŋke ŋkemu i ke,
u sí n‑cyé urufoo na.
27 Sèeŋi na mii sí yi jwo yii á,
pìi na ɲyɛ yii e,
pi sì n‑kwû ná pi ɲyɛ a Kile Saanre ɲya mà yɛ!»
Yesu yyahe pyiŋkannʼà kɛ̂ɛnŋɛ
28 Ɲyɛ canmpyaa baataanre fiigʼà tòro puru jwumpe jwuŋkwooni kàntugo ke,
ka Yesu si ŋkàre ná Pyɛri ná Yuhana ná Yakuba e ɲaŋke kà na,
si sà Kile ɲáare.
29 Mà Yesu yaha Kileɲarege na,
u yyahe pyiŋkannʼà kɛ̂ɛnŋɛ,
ka u vàanɲyi si fíniŋɛ weewee fo na ɲî.
30 Lire tèenuuni i,
ka nàmbaa shuunni si mpa jwo ná u e.
Pire pi mpyi tèecyiini Kile tùnntunmpii MusaEli.
31 Pi mpyi a pa ná sìnampe e.
Pyiŋkanni na Yesu mpyi na sí n‑kàre n‑sà u báaraŋi fûnŋɔ si ŋkwû Zheruzalɛmu kànhe e ke,
maa lire jwo u á.
32 Lire tèni mpyi a ŋɔɔmpe ta Pyɛri ná u shɛ̀rɛfeebii na sèlʼe.
Ŋɔɔmpʼà pa láha pi na ke,
ka pi i pire nàmbaabii shuunniŋi niɲjyerebii ɲya ná Yesu i u sìnampe e.
33 Tèni i pire nàmbaabii mpyi na yîri Yesu taan ke,
ka Pyɛri si jwo u á:
«Wuu cyelentuŋi,
wuu à pa naha ke,
lirʼà ɲwɔ sèlʼe.
Wuu vùnyɔ taanre kwòro,
niŋkin sí n‑pyi mu wogo,
niŋkin sí n‑pyi Musa wogo,
niŋkin sí n‑pyi Eli wogo.»
Pyɛri mpyi a puru jwumpe jwo uye ɲùŋɔ kurugo.
34 Mà Pyɛri yaha puru jwumpe na,
ka ɲahaŋa si mpa pi tò.
Mà ɲahaŋke yaha ku u pi tùni,
ka pi i fyá.
35 Ka mɛjwuu si fworo kuru ɲahaŋke e na:
«Mii Jyaŋi u ɲyɛ ŋge,
mii à u cwɔɔnrɔ.
Yii a núru u ɲwɔ na.»
36 Lire mɛjwuuni fworoŋkwooni kàntugo,
Yesu baare e,
cyelempyiibii saha ɲyɛ a wà ɲya mɛ.
Nde pi à ɲya ke,
ka pi i lire yaha piye funŋʼi,
pi ɲyɛ a yaaga jwo wà á lire tèni i mɛ.
Yesu à pyàŋi wà jína kɔ̀rʼa yige u e
37 Kuru canŋa nùmpanŋa,
Yesu ná u cyelempyiibii nintigibii ɲaŋke na,
ka supyikurumbwɔhɔ sí sà u ɲùŋɔ bɛ̂.
38 Tire sùpyire shwɔhɔlʼe,
ka nàŋi wà si jwo fànha na:
«Cyelentuŋi,
mii na mu ɲáare,
maa na jyaŋi kàanmucya.
Uru niŋkinŋi u ɲyɛ mii á.
39 Jínaŋi wà u ɲyɛ u e,
u aha yîri u kurugo,
u maha ŋkwúuli,
jínaŋi maha u cúnŋɔ cúnŋɔ fànha na,
u ɲwɔge maha bàafwɔhe yige,
u maha u kànha sèlʼe,
maa nta a fworo u e.
40 Mii à mu cyelempyiibii ɲáare pi jínaŋi kɔ̀rʼa yige u e,
ŋka pi ɲyɛ a jà mɛ.»
41 Ka Yesu si jwumpe lwɔ́ maa jwo:
«Ei!
Yii dánabaa sùpyiibii nimpiibii,
fo ɲaha tère e mii sí n‑kwôro ná yii e yɛ?
Mii sí yii kapyiiŋkii kwú naye e sà nɔ fo ɲaha tère na yɛ?
Ta ma ná ma jyaŋi i naha.»
42 Ɲyɛ mà pi yaha pi i filili ná pyàŋi i Yesu na,
ka jínaŋi si pyàŋi cúnŋɔ cúnŋɔ fànha na maa u cyán ɲìŋke na.
Ɲyɛ ka Yesu si fànha cyán jínaŋi na,
maa u pyi u à fworo pyàŋi i,
maa u kan u tuŋʼá.
43 Sùpyire ti mpyi wani ke,
Kile sífente mpyi a pire puni kàkyanhala.
Yesu à jwo u kwùŋi kyaa na sahaŋki
Karigii Yesu mpyi a pyi ke,
cyire mpyi a sùpyire puni kàkyanhala.
Mà pi yaha purʼe,
ka u u yi jwo u cyelempyiibilʼá:
44 «Yii mpe jwumpe lógʼa tàra,
li saha sì mɔ mɛ,
pi sí Supyaŋi Jyaŋi le cye e,
pi i pi ɲyii wuuni pyi u na.»
45 Ŋka cyelempyiibii ɲyɛ a mpyi a puru jwumpe yyaha cè mɛ,
ɲaha na yɛ pu ɲwɔhe mpyi a ŋwɔhɔ pi na,
pi mú sí mpyi na fyáge si u yíbe pu ɲwɔhe na.
Sùpyaŋi u ɲyɛ ɲùŋufoo Kile yyére ke
46 Ɲyɛ ka nàkaana si mpa yîri cyelempyiibii ná piye shwɔhɔlʼe,
tire ɲùŋke ku mpyi na pire puni i jofoo u ɲyɛ ɲùŋufooŋi yɛ.
47 Yesu à pa tire nàkaante ɲùŋke cè ke,
maa pyàŋi wà lwɔ́ a yaha uye taan,
48 maa jwo cyelempyiibilʼá:
«Shin maha shin u à ŋge pyàŋi cùmu lemɛ ɲwɔ mii kurugo ke,
urufoo mú à mii cùmu lemɛ ɲwɔ.
Ŋgemu ká mii cùmu lemɛ ɲwɔ ke,
urufoo mú à mii tunvooŋi cùmu lemɛ ɲwɔ.
Ɲyɛ ŋgemu u à uye pyi yii puni kàntugo yyére wuŋi ke,
uru u ɲyɛ yii puni ɲùŋufooŋi.»
Ŋgemu ká mpyi u ɲyɛ wuu zàmpɛn mɛ, uru na ɲyɛ ná wuu e
49 Ɲyɛ ka Yuhana si jwo Yesu á:
«Cyelentuŋi,
wuu à nàŋi wà ɲya u u jínabii kɔ̀re na yige sùpyire e ná mu mɛge e,
ka wuu u u sige li na,
ɲaha na yɛ wuu wà bà mɛ.»
50 Ka Yesu si u pyi:
«Yii àha u sige li na mɛ,
ɲaha na yɛ ŋgemu u ɲyɛ u ɲyɛ wuu zàmpɛn mɛ,
urufoo na ɲyɛ ná wuu e.»
51 Ɲyɛ tèni i Yesu tèefworonʼà pa byanhara ŋge diɲyɛŋi i,
sʼa ŋkɛ̀ɛge nìɲyiŋi na ke,
ka u u sàa li lwɔ́ uye funŋʼi si ŋkàre Zheruzalɛmu kànhe e,
52 maa tùnntunmii tùugo uye yyaha na,
ka pire si ŋkàrʼa sà nɔ Samari kànhe kà na,
maa sunmbage tatirige cya Yesu mɛɛ na kuru kànhe shiinbilʼá.
53 Ŋka kuru kànhe shiinbii ɲyɛ a ɲɛɛ mɛ,
ɲaha na yɛ Zheruzalɛmu i u mpyi na ŋkɛ̀ɛge.
54 Tèni i u cyelempyiibii pìi shuunni Yakuba ná Yuhana à pa yire lógo ke,
maa jwo:
«Kafooŋi,
mu sí wuu yaha wuu nage yige nìɲyiŋi na wuu tîrige pi ɲuŋʼi wuu u pi shi bò mà?»
55 Ka Yesu si yyaha kɛ̂ɛnŋʼa le pi e maa pi faha sèlʼea.
56 Lire kàntugo ka pi i ntòrʼa kàre kànhe kabɛrɛ na.
Mpii la ku ɲyɛ si ntaha Yesu fye e ke
57 Mà pi niŋkaribii yaha,
ka nàŋi wà si Yesu pyi:
«Kafooŋi,
mii sí n‑taha mu fye e ma tasheyi puni i.»
58 Ka u u u pyi:
«Wyigii na ɲyɛ sigepwuunbilʼá,
shèere mú sí ɲyɛ saɲcyɛɛnrʼá.
Ŋka tashwɔngɔ ɲyɛ Supyaŋi Jyaŋi á mɛ.»
59 Maa wabɛrɛ pyi:
«Taha na fye e.»
Ka uru si jwo:
«Kafooŋi,
yyére,
mii aha na tuŋi tò,
mii sí n‑ta n‑pa n‑taha mu fye e.»
60 Ka Yesu si u pyi:
«Kwùubii yaha pi a piye tùni,
ŋka mu wi ke,
ta sì maa sà a Kile Saanre kyaa yu.»
61 Ka wabɛrɛ si jwo:
«Kafooŋi,
mii la ɲyɛ si ntaha mu fye e,
ŋka na yaha si sà yi jwo na pyɛngɛ shiinbilʼá fɔlɔ.»
62 Ka Yesu si u pyi:
«Shin maha shin u à nùtuuge cû nùfaaŋi na,
maa wíi kàntugo ke,
urufoo ɲyɛ a yaa ná Kile Saanre e mɛ.»