Macwo 16

Farizhɛɛnbii ná Sadusiibilʼà jwo na Yesu u kyaa pyi, nde lʼà li cyêe na u à fworo Kile e ke

(Marika 8.11-21; Luka 12.54-56)

Ɲyɛ canŋka ná Sadusiibilʼà file Yesu na, si u pɛrɛ ɲcû, maa u pyi na u kani là pyi ndemu lʼà li cyêe na u à fworo Kile e ke.

[ 2 Ka Yesu si pi pyi: «Yii aha kileŋi yyahe ɲya kʼà ɲáaŋa yàkoŋke, yii maha jwo na zànhe sì n‑pa niɲjaa mɛ. 3 Ɲyɛ̀ge na, yii aha kileŋi yyahe ɲya kʼà wwɔ̀, yii maha jwo na zànhe sí n‑pa niɲjaa. Ɲyɛ yii à jà a cyire karigii puni tèepyiiŋkii cè, ka ɲaha si li ta ɲcyii cyi ɲyɛ na mpyi yii shwɔhɔlʼe numɛ ke, yii ɲyɛ a jà a cyire cè mà yɛ?] 4 Mpii pi à pi, maa kàntugo wà Kile na ke, pire maha ɲcaa si kacyeele ɲya tapyige e. Ŋka nde lʼà pyi Kile tùnntunŋi Zhonasi na ke, lire baare e kakyanhala kyaa saha sì n‑pyi n‑cyêe pi na mɛ.» Ɲyɛ u à puru jwo ke, maa yîri pi taan mà kàre.

5 Lire kàntugo ka Yesu si baŋi jyiilʼa kàre kùmpoge sanŋke na. Pi à sà nɔ ke, ka pi i li kàanmucya mà li ta pi funŋʼà wwɔ̀, pi ɲyɛ a bwúuru lwɔ́ mɛ. 6 Ka Yesu si yi jwo pi á: «Yii a yiye kàanmucaa ná bwúuruŋi yîrigeyirige yaani na.» 7 Ka u cyelempyiibii si pi funɲyi cya puru jwumpe na, maa jwo piye shwɔhɔlʼe: «Bà wuu à pyi wuu ɲyɛ a pa ná bwúuru i mɛ, lire e u à mpe jwo bɛ?»

8 Ɲyɛ Yesu à pa pi kunuŋke ɲwɔhe cè ke, maa jwo: «Yii dániyaŋʼà cyɛ́rɛ dɛ! Ɲaha kurugo bwúuruŋi wuunʼà yii funŋɔ wwòoŋɔ yɛ? 9 Ali numɛ yii yákilibii sàha ŋkwɔ̀ a múgo mà? Canŋke mii à bwúuru ɲùɲyi kaŋkuruŋi tɛ̀gʼa nàmbaa kampwɔhii kaŋkuruŋi (5.000) ɲwɔ cya, ka shàhigii dáŋi ŋgemu si ɲî ɲjyìpaanyi na pi lyìŋkwooni kàntugo ke, yii funŋʼà wwɔ̀ lire na la? 10 Canŋke mii à bwúuru ɲùɲyi baashuunniŋi tɛ̀gʼa nàmbaa kampwɔhii sicyɛɛreŋi (4.000) ɲwɔ cya, ka yii i ŋkwɔ̀ maa saanyi ɲî ɲjyìpaanyi na pi lyìŋkwooni kàntugo ke, taha yii funŋʼà wwɔ̀ lire na mú? 11 Ná yii funŋɔ ɲyɛ a wwɔ̀ lire na mɛ, mii à yii pyi na yii a yiye kàanmucaa Farizhɛɛnbii ná Sadusiibii bwúuruŋi yîrigeyirige yaani na, ka yii i wá na sɔ̂nŋi na bwúuru kyaa mii ɲyɛ na yu ke, ɲaha na yii ɲyɛ a jà a puru jwumpe ɲwɔhɔ cè mà yɛ?»

12 Ɲyɛ ka cyelempyiibii si li cè na bwúuruŋi yîrigeyirige yaani na bà Yesu à jwo pi a piye kàanmucaa mɛ, ŋka Farizhɛɛnbii ná Sadusiibii kàlaŋi kyaa li.

Pyɛri à jwo na Kile Niɲcwɔnrɔŋi u ɲyɛ Yesu

(Marika 8.27-30; Luka 9.18-21)

13 Ɲyɛ Yesu à kàrʼa sà nɔ Sezare Filipi kùluni na ke, maa u yíbe: «Jofoo sùpyire ɲyɛ na sɔ̂nŋi yɛ?» 14 Ka pi i u pyi: «Pìi wá na ŋko na Yuhana Batizelipyiŋi u ɲyɛ mu, pìi sí i ŋko na Kile tùnntunŋi Eli u ɲyɛ mu, pìi sí i ŋko na Kile tùnntunŋi Zheremi u ɲyɛ mu, pìi mú sí i ŋko na sanmpii pi à tòro ke, na uru wà u ɲyɛ mu.» 15 Ka Yesu si pi pyi: «Yii de? Jofoo yii ɲyɛ na mii sɔ̂nŋi yɛ?» 16 Ka Simɔ Pyɛri si jwo: « u ɲyɛ mu, Kileŋi ɲyii wuŋi Jyaŋi.»

17 Ka Yesu si u pyi: «Zhonasi jyaŋi Simɔ! Mu wuunʼà ɲwɔ. Ɲaha na yɛ sùpya bà u à ŋge sèeŋi cyêe mu na mɛ, mii Tuŋi u ɲyɛ nìɲyiŋi na ke, uru u à u cyêe mu na. 18 Mii sí jwo mu á, mii sí mu mɛge le Pyɛri (kuru ɲwɔhe ku ɲyɛ kafaaga.) Mii sí kuru kafaage tɛ̀gɛ na dánafeebii kuruŋke ɲwɔhɔ cyán, kwùŋi mú bà sì n‑jà yaaga pyi kuru ŋkemu na mɛ. 19 Mii sí tirikyanhigii kan mu á. Mu aha ɲcyé kyaa maha kyaa na ɲìŋke na ke, lire mú sí ɲcyè ta u à pyi lire na nìɲyiŋi na. Mu aha ɲɛɛ kyaa maha kyaa na ɲìŋke na ke, lire mú sí ɲɛɛ ta u à pyi lire na nìɲyiŋi na.» 20 Ɲyɛ ka Yesu si yi jwo a waha cyelempyiibilʼá na pi àha ŋkwɔ̀ yi jwo sùpya á na uru u ɲyɛ Kile Niɲcwɔnrɔŋi mɛ.

Kyaage Yesu sí n‑ta ke, u à kuru kyaa jwo

(Marika 8.31-33; Luka 9.22)

21 Ɲyɛ mà lwɔ́ fo lire tèni na, ka Yesu si wá na u kâlali na fànha ki uru u kàre Zheruzalɛmu kànhe e, si ŋkyaala sèlʼe kacwɔnribii ná Kile sáragawwuubii ɲùŋufeebii ná cye e. Pi sí uru bò, ŋka uru kwùŋi canmpyitanrewuuni, uru sí ɲɛ̀. 22 Ɲyɛ Yesu à puru jwo ke, ka Pyɛri si u fɛ̂ɛn ŋkere na maa u cɛ̂ɛgɛ na: «Ma hà puru jwo mɛ, Kafooŋi! Kile u ma shwɔ lire na, lire fiige kà zìi ma ta mɛ.» 23 Ka Yesu si Pyɛri wíi ná ɲyiŋkeni i maa jwo: «Yîri na taan, Sitaanna wà we! Mu na mii ɲùŋɔ kyánge. Mu ɲyɛ na sɔ̂nŋi Kile ɲyii wuuni na mɛ, fo sùpyire ɲyii wuuni!»

Pyiŋkanni na wuu à yaa wuu taha Supyaŋi Jyaŋi Yesu fye e ke

(Marika 8.34-9.1; Luka 9.23-27)

24 Ɲyɛ ka Yesu si jwo u cyelempyiibilʼá: «Ŋgemu la ká mpyi si ntaha mii fye e ke, urufolʼà yaa u cyé u yabiliŋi ɲyii karigii na, u u ntɛ̀ɛn kyaage taan u u ntaha mii fye e, pi mɛ́ɛ ká mpyi na sí urufoo bò kworokworocige na. 25 Ɲaha na yɛ ŋgemu la ká mpyi si u niɲjaaŋi yaa ɲwɔ ke, urufoo sì nùmpanŋa ta mɛ, ŋka ŋgemu ká kàntugo wà u niɲjaaŋʼá mii kurugo ke, urufoo sí nùmpanŋa ta. 26 Ɲaha li sí ɲwɔ sùpyaŋʼá mà ma ɲyii yaayi puni ta ŋge diɲyɛŋi i niɲjaa, mu nùmpanŋke si sà ŋkɛ̀ɛge yɛ? Sùpya sì n‑jà yafyin tɛ̀gɛ u múnaani ɲùŋɔ wwû nùmpanŋa mɛ. 27 Yii li cè na canŋka, sí núru n‑pa ná u Tuŋi sìnampe ná u mɛ̀lɛkɛɛbilʼe. Kuru canŋke, u sí shin maha shin sâra si ntàanna ná u kapyiiŋkilʼe. 28 Sèeŋi na mii sí yi jwo yii á, yii mpii pi ɲyɛ naha ke, pìi na ɲyɛ yii e, pire sì n‑kwû ná pi ɲyɛ a Supyaŋi Jyaŋi saanra wuŋi nimpaŋi ɲya mà yɛ.»