Karigii cyi ɲyɛ na wuu ɲwɔ́re Kile yyahe taan ke
15
Ɲyɛ canŋka Farizhɛɛnbii pìi ná Kile Saliyaŋi cyelentiibii pìlʼà yîri Zheruzalɛmu kànhe e mà pa Yesu yyére,
maa u yíbe:
2 «Ɲaha na mu cyelempyiibii ɲyɛ na wuu tulyeyi làdaabii karigii leni ɲjire e mà yɛ?
Ɲaha na pi aha a si raa lyî,
pi ɲyɛ na pi cyeyi jyíi mà tàanna ná pire làdaabilʼe mà yɛa?»
3 Ka Yesu si pi pyi:
«Ɲaha na yii à kàntugo wà Kile toŋʼá,
maa ntaha làdaabii fye e yɛ?
4 Yii li cè na Kile à jwo “Ma tuŋi ná ma nuŋi pêeb.
Ŋgemu ká jwumpimɛ jwo a wà u tuŋi,
lire ɲyɛ mɛ u nuŋi na ke,
urufoo sí n‑bòc.”
5 Ŋka yii pi ke,
yii maha yi yu sùpyirʼá na “Wà ha jà a jwo u sifeebilʼá na yaayi uru mpyi a yaa u tɛ̀gʼa pi tɛ̀gɛ ke,
na urʼà yire kan Kile á mà kwɔ̀,
6 na urufoo mɛ́ɛ ká mpyi u ɲyɛ na yaaga kaan u sifeebilʼá sahaŋki mɛ,
na tapege ɲyɛ yire e mɛ.”
Mà tàanna ná lire e,
yii à kàntugo wà Kile jwumpʼá,
maa ntaha yii làdaabii fye e.
7 Yii pi à fyìnmɛ tò wwomɔ na ke!
Kile tùnntunŋi Ezayi mpyi a jwumpe mpemu jwo yii kyaa na ke,
purʼà sàa pyi sèe.
U mpyi a jwo na
8 “Kile à jwo ‘Nte sùpyire na mii pêre ɲwɔyi i kanna,
mà li ta pi zòompii laagʼà tɔɔn mii na.
9 Pi na mii pêre tawage e,
ɲaha na yɛ kàlaŋi pi ɲyɛ na ŋkaan ke,
urʼà lwɔ́ a pwɔ sùpyire làdaabii kanni nad.ʼ”»
10 Puru ɲwɔhɔ na,
Yesu à sùpyire yyere maa jwo tʼá:
«Yii niŋgyigigii pɛrɛ,
yii raa núru sèlʼe.
11 Yaaga maha yaaga ku ɲyɛ na jyè sùpyaŋi ɲwɔge e ke,
kuru kà ɲyɛ na jà a u ɲwɔ́hɔ mɛ.
Ŋka ɲje yi ɲyɛ na fwore sùpyaŋi ɲwɔge e ke,
yire yi maha jà a u ɲwɔ́hɔ.»
12 Ɲyɛ Yesu à puru jwo ke,
ka u cyelempyiibii si file u na maa jwo:
«Mu ɲyɛ a cè na mu jwumpʼà waha Farizhɛɛnbii na mà?»
13 Ka Yesu si pi pyi:
«Cige maha cige ku ɲyɛ ku ɲyɛ a cɛnmɛ mii Tuŋi nìɲyi wuŋi cye kurugo mɛ,
yire puni sí n‑kò n‑wà.
14 Yii Farizhɛɛnbii yaha wani,
fyinmii pi à fyinmii yyaha cû.
Fyin ká u fyinɲɛɛ kàbii cû,
pi mú shuunniŋi sí n‑tîge wyige kʼe.»
15 Ka Pyɛri si jwo:
«Puru jwumpe ɲwɔhe jwo wuu á.»
16 Ka Yesu si pi pyi:
«Yii yabilimpii,
ali numɛ yákilitan ɲyɛ yii á mà?
Mpe mii na yu ke,
yii ɲyɛ na puru núru mà?
17 Yii ɲyɛ a li cè na yaaga maha yaaga ku maha jyè sùpyaŋi ɲwɔge e ke,
na u yaceni i kuru maha ŋkàre,
u aha shà yaare e,
kʼa sì fworo mà?
18 Ŋka ɲje yi ɲyɛ na fwore sùpyaŋi ɲwɔge e ke,
u zòŋi i yire maha fwore,
yire mú sí yi maha u ɲwɔ́hɔ Kile á.
19 Yii li cè na sùpyaŋi zòŋi i sɔ̀nŋɔpeere maha fwore,
mu à jwo:
supyibuuni ná jacwɔɔre ná silege baa karigii ná nàŋkaage ná kafinare ná jwoore.
20 Cyire karigii cyi maha sùpyaŋi ɲwɔ́re Kile á.
Lire baare e mà yalyige lyî cyeyi ɲjyìmbaa,
lire ɲyɛ na jìnʼa sùpya ɲwɔ́hɔ mɛ.»
Supyishiŋi sanŋi cwoŋi wà à dá Yesu na
21 Ka Yesu si yîri wani mà kàre Tiri ná Sidɔn kànyi kàmpanŋke na.
22 Mà pi yaha wani,
Kana shiinbii cwoŋie wà à pa Yesu á,
maa jwo fànha na:
«Kafooŋi!
Dawuda Tuluge Shinŋi!
Ɲùɲaara ta na na,
maa sà na pworoŋi kàanmucya.
Jínaŋi wà u wá a u tɛɛnmɛ pɛn.»
23 Yesu ɲyɛ a ɲɛnʼa u ɲwɔ shwɔ mɛ.
Ka cyelempyiibii si jwo Yesu á:
«Ŋge ceeŋi cye yaha,
ɲaha na yɛ u na ŋkwúuli wuu ɲwɔhʼi.»
24 Ka Yesu si pi pyi:
«Izirayɛli shiinbii kanni mɛɛ na Kile à mii tun,
pire mpiimu pi ɲyɛ mpàa nimpinnimii fiige ke.»
25 Ŋka lire ná li wuuni mú i,
ceeŋʼà pa niŋkure sín Yesu taan maa jwo:
«Kafooŋi!
Cye le na á.»
26 Ka Yesu si jwo:
«Mà nàŋkopyire yalyire lwɔ́ a wà pwunmpyirʼáf,
lire ɲyɛ a ɲwɔ mɛ.»
27 Ka ceeŋi si jwo:
«Kafooŋi,
yire ɲyɛ sèe,
ŋka pyɛngefoo ká a lyî,
ɲjyìpaanre ti maha ɲcwo ɲìŋke na ke,
pwunmpyire maha tire lyî.»
28 Ɲyɛ ceeŋʼà yire jwo ke,
ka Yesu si jwo:
«Ceewe,
ŋka mu naha a dá mii na dɛ!
Nde mu à cya mii á ke,
lire sí n‑pyi mu á.»
Ɲyɛ ka u pworoŋi si ntílʼa cùuŋɔ.
Yesu à shiin kampwɔhii sicyɛɛre ɲwɔ cya
29 Ɲyɛ lire kàntugo Yesu à yîri kuru cyage e maa ŋkàre Galile baŋi ɲwɔge na,
maa dùgʼa tɛ̀ɛn ɲaŋke kà ɲuŋʼi.
30 Ka supyikurumbwɔhɔ si mpa u á.
Kuru supyikuruŋke e,
pìi mpyi a pa ná dìshiyifelʼe,
pìi sʼà pa ná fyinmilʼe,
pìi sí ɲyɛ ná yatanŋkɛgɛyɛfelʼe,
pìi sí ɲyɛ ná búbulʼe,
pìi sí ɲyɛ ná yampii shi niɲyahamilʼe.
Pi mpyi na ma ná pire yampilʼe Yesu á,
ka u u pi cùuŋɔ.
31 Li mpyi a sùpyire bilibili mà búbuubii ɲya pi à jà na yu,
yatanŋkɛgɛyifeebii sí i ɲcùuŋi,
dìshiyifeebii sí i ɲaare,
fyinmpii sí i ɲaa,
lire kurugo pi à Izirayɛli shiinbii u Kileŋi kêe.
32 Ɲyɛ ka Yesu si u cyelempyiibii yyere maa jwo:
«Ŋke supyikuruŋke ɲùɲaare naha mii na,
ɲaha na yɛ pi canŋke taanre woge ku ɲyɛ naha mii taan,
yalyire ɲyɛ pi á mɛ.
Mii la ɲyɛ si pi cye yaha ɲjyìmbaa mɛ,
lire baare e katege sí pi fànha kwɔ̀ kuni na.»
33 Ka cyelempyiibii si jwo:
«Di wuu si n‑jà ɲjyì ta naha ŋke síwage e,
si ntɛ̀gɛ ŋke supyikuruŋke fiige ɲwɔ cya yɛ?»
34 Ka Yesu si pi pyi:
«Bwúuru ɲùnyɔ jùuli yi wá yii ɲuŋʼi yɛ?»
Ka pi i jwo:
«Bwúuru ɲùnyɔ baashuunni ná fyapyire ti naha wuu ɲuŋʼi.»
35 Ka u u sùpyire pyi tʼà tɛ̀ɛn ɲìŋke na,
36 maa bwúuru ɲùɲyi baashuunniŋi ná tire fyapyire lwɔ́,
maa fwù kan Kile á yi kyaa na,
maa yi kwɔ̀n kwɔ̀n mà kan u cyelempyiibilʼá,
ka pire si yi táa ti na.
37 Kuru supyikuruŋke punʼà lyî a tìn,
ka pi i ŋkwɔ̀ maa saanya baashuunni ɲî ɲjyìpaanyi na.
38 Pire lyìlyibilʼe,
nàmbaabii kanni mpyi kampwɔhii sicyɛɛre (4.000) cyeebii ná nàŋkopyire ɲyɛ a tɔ̀rɔ mɛ.
39 Ɲyɛ lire ɲwɔhɔ na,
u à ta a sùpyire cye yaha,
maa jyè bakwɔɔge kʼe,
mà kàre Magadan kùluni i.