Karigii cyi ɲyɛ na wuu ɲwɔ́re Kile yyahe taan ke
7
Kile Saliyaŋi cyelentiibii pìi mpyi a yîri Zheruzalɛmu kànhe e,
ka pi ná Farizhɛɛnbii si sà bínni Yesu taan.
2 Maa li kàanmucya mà li ɲya na u cyelempyiibii mpyi na lyî ná cyeyi niɲwɔhɔyi i Kile yyahe taan,
ɲaha na yɛ pi ɲyɛ a yi jyè mà tàanna ná Yahutuubii làdaabilʼe mɛ.
3 Farizhɛɛnbii ná Yahutuubii sanmpii nʼa mpyi na sí raa lyî,
pi mpyi maha cyeyi yalʼa jyè a fíniŋɛ Kile yyahe taan mà tàanna ná pi tulyeyi làdaabilʼe.
4 Lire pyiŋkanni na,
pi nʼa mpyi a yîri caange na,
pi mpyi maha wìli maha piye fíniŋɛ Kile yyahe taan mà tàanna ná làdaabilʼe,
maa nta a lyî.
Làdaabii pìi saha na mpyi yaayi ɲjyìŋi kyaa na,
mu à jwo:
fùnɲcwoyi ná pwoore cwɔhigii ná dàɲyɛŋi yaayi ná yatɛɛnɲyi.
5 Ka Farizhɛɛnbii ná Kile Saliyaŋi cyelentiibii si Yesu yíbe:
«Ɲaha na mu cyelempyiibii ɲyɛ na wuu tulyeyi làdaabiia kurigii ɲaare mà yɛ?
Ɲaha na pi ɲyɛ na cyeyi jyíi mà tàanna ná làdaabilʼe maa nta na lyî mà yɛb?»
6 Ka Yesu si pi pyi:
«Yii pi à fyìnmɛ tò wwomɔ na ke!
Kile tùnntunŋi Ezayi mpyi a jwumpe mpemu jwo yii kyaa na ke,
purʼà sàa pyi sèe.
Lʼà sémɛ Ezayi sémɛŋi i na Kile à jwo:
“Nte sùpyire na mii pêre ɲwɔyi i kanna,
mà li ta pi zòompii laagʼà tɔɔn mii na.
7 Pi na mii pêre tawage e,
ɲaha na yɛ kàlaŋi pi ɲyɛ na ŋkaan ke,
urʼà lwɔ́ a pwɔ sùpyire làdaabii karigii nac.”»
8 Ka Yesu si núrʼa yi jwo pi á:
«Yii à cyé Kile toŋi na,
maa ntaha sùpyire làdaabii fye e.
9 Yii na sɔ̂nŋi na yii tànga na ɲyɛ mà cyé Kile toŋi na,
maa ntaha yii yabilimpii làdaabii fye e.
10 Kile tùnntunŋi Musa à jwo na “Ma tuŋi ná ma nuŋi pêe,
ŋgemu ká jwumpimɛ jwo a wà u tuŋi,
lire ɲyɛ mɛ u nuŋi na ke,
urufoo sí n‑bòd.”
11-12 Ŋka yii pi ke,
yii na sùpyire kâlali ŋge làdaŋi na,
u mɛge ɲyɛ Kɔrɔban.
Sùpya ká jwo na uru nàfuuŋi na ɲyɛ Kɔrɔban,
lire ɲwɔhe ku ɲyɛ na urʼà u kan Kile á,
na fànhe saha ɲyɛ uru na u u sifeebii tɛ̀gɛ mɛ.
13 Lire pyiŋkanni na,
yii làdaabii kurugo,
Kile jwumpʼà pyi kaɲwɔɔ baa sùpyire ɲyii na,
ŋka lire kanni bà mɛ,
yii na cyire ɲcyii karigii shiŋi niɲyahagii pyi.»
14 Puru ɲwɔhɔ na,
Yesu à núrʼa sùpyire yyere,
maa yi jwo tʼá:
«Yii puni,
yii niŋgyigigii múgo,
yii i na jwumpe lógo,
yii i pu yyaha cè sèlʼe.
15 Yaayi yi na jyìi sùpyaŋi funŋke e ke,
kuru kà ɲyɛ a sìi na jìnʼa u ɲwɔ́hɔ mɛ.
Ŋka ɲjemu yi na fwore sùpyaŋi funŋke e ke,
yire yi maha sùpyaŋi ɲwɔ́hɔ Kile yyahe taan. [
16 Ŋgemu la ká mpyi si karii yyaha cè ke,
urufoo u u niŋgyigigii cyán sèlʼe.]»
17 Tèni i Yesu à yîri sùpyire taan mà jyè bage e ke,
ka u cyelempyiibii si u yíbe lire tàanlini ɲwɔhe na.
18 Ka u u pi pyi:
«Yii yabilimpii,
ali numɛ yákilitan ɲyɛ yii á mà?
Mpe mii na yu ke,
yii ɲyɛ na puru núru mà?
Yaaga maha yaaga kʼà yîri cyíinŋi na mà jyè sùpyaŋi funŋke e ke,
kuru sì n‑jà u ɲwɔ́hɔ mɛ.
19 Tire nte yalyire ɲyɛ na jyè sùpyaŋi zòmbilini funŋke e mɛ,
lage e ti maha jyè,
lire kàntugo,
urufoo ká shà yaare e,
ti maha fworo.»
Pure jwumpe cye kurugo,
Yesu à li cyêe na yalyire punʼà fíniŋɛ.
20 U a jwo:
«Ɲcyii cyi ɲyɛ sùpyaŋi zòŋi na ke,
cyire cyi maha u ɲwɔ́hɔ Kile yyahe taan.
21 Ɲaha kurugo yɛ sɔ̀nŋɔpeere maha fwore sùpyaŋi zòmbilini i,
mu à jwo tasinnage kɛgɛmɛ karigii ná nàŋkaage ná supyibuuni ná
22 jacwɔɔre ná ntiimbaaŋi ná pege ná nàɲwɔhɔre ná silegebaare ná ɲyipɛɛnni ná jwoore ná yàmpeente ná funŋɔbaare.
23 Cyire ɲcyii kapegigii cyi ɲyɛ na fwore zòmbilini i ke,
cyire cyi maha sùpyaŋi ɲwɔ́hɔ Kile yyahe taan.»
Supyishiŋi sanŋi cwoŋi wà à dá Yesu na
24 Ka Yesu si yîri wani mà kàre Tiri ná Sidɔn kànyi kàmpanŋke na.
U à nɔ wani ke,
maa jyè bage kʼe.
U la ɲyɛ a mpyi wà sì uru kyaa cè mɛ.
Ŋka u ɲyɛ a jà a ŋwɔhɔ mɛ.
25-26 Ka ceeŋi wà si u kyaa lógo,
maa ntílʼa pa niŋkure sín u fere e.
Uru ceeŋi mpyi Yahutu mɛ,
u mpyi na yîri Sirofenisi kùluni ie.
Jínaŋi wà mpyi u pworoŋi i,
ka u u Yesu ɲáare na u u kɔ̀rʼa yige u e.
27 Ka Yesu si ceeŋi pyi:
«Yyére nàŋkopyire si lyî a tìn fɔlɔ,
ɲaha na yɛ mà nàŋkopyire yalyire lwɔ́ a wà pwunmpyirʼá,
lire ɲyɛ a ɲwɔ mɛ.»
28 Ka ceeŋi si u pyi:
«Kafooŋi,
yire ɲyɛ sèe,
ŋka pwuunbii pi maha ntɛ̀n tàbalaŋi ɲwɔhʼi ke,
pire maha nàŋkopyire yalyire paanre lyî.»
29 Ka Yesu si yi jwo u á:
«Mu ɲwɔshwɔɔrʼà ɲwɔ,
mu sí n‑jà núru pyɛngɛ,
mii à jínaŋi yige mu pworoŋi i.»
30 Ka u u núrʼa kàre pyɛngɛ mà sà pyàŋi ta u à sínni yasinniŋke na,
jínaŋi mpyi a fworo u e.
Yesu à nàŋi wà niŋgyigii múgo
31 Ka Yesu si yîri Tiri ná Sidɔn kànyi kàmpanŋke na,
maa ŋkàre Galile baŋi kàmpanŋke na,
maa sà jyè Dekapoli kùluni i.
32 Ka pi i shà ná nàŋi wʼe u yyére.
Uru nàŋi mpyi ɲùɲcunnɔ,
jwumpe sʼà waha u á mú sèlʼe.
Ka pi i Yesu ɲáare na u u cyɛge taha u na,
bà u si mpyi si ɲcùuŋɔ mɛ.
33 Ka Yesu si nàŋi cû mà yîri sùpyire taan mà kàre tatɔɔnge e.
Kuru cyage e,
u à kampeeni le u niŋgyigigilʼe,
maa ntilwɔhe ta u ɲjini na.
34 Maa ɲùŋke dùrugo kileŋi i,
maa ŋɔ̀ a kùuŋɔ,
maa jwo:
«Efata» lire ɲwɔhe ku ɲyɛ:
«Yii múgo!»
35 Lire tèni mujye e,
ka niŋgyigigii mú shuunni si múgo,
ka ɲjini mú si sànha.
Ka u u wá na ntíili na yu.
36 Yesu à núrʼa pa sùpyire cyage e ke,
maa yi jwo a waha pi á,
na pi àha sùpyaŋi wabɛrɛ yaha u yi cè mɛ.
Ŋka u jwumpʼà pyi kee pʼà pi nâara,
ka pi i ntílʼa sà a pu yu na ntùuli.
37 Sùpyire ti mpyi wani ke,
li mpyi a pire puni kàkyanhala sèlʼe,
ka pi i wá na ŋko:
«Karigii niɲcɛnŋkii kanni u na mpyi.
U maha ɲùɲcunnibii pyi pi i núru,
maa búbuubii pyi pi i yu!»