Yesu kànhe shiinbilʼà cyé u na
6
Lire kàntugo Yesu à núrʼa kàre u tukanhe Nazarɛti i,
u cyelempyiibii mpyi u fye e.
2 Canŋɔŋkʼà pa nɔ ke,
ka u u wá na sùpyire kâlali Kile Jwumpe kàlambage e.
Lirʼà u lógofeebii niɲyahamii kàkyanhala,
ka pi i wá na ŋko:
«Nte yákilifente ti ɲyɛ u á ke,
ná ɲcyii kakyanhala karigii u na mpyi ke,
taa u à jà a cyire puni ta ke?
3 Taha cíkyangaŋi bà u ɲyɛ u wi mɛ?
Mariyama pyìibii pi ɲyɛ Yakuba ná Zhoze ná Zhude ná Simɔ ná pùcɛribii pi ɲyɛ naha kànhe e ke,
pire mpii yyaha wuŋi bàlʼà?»
Ɲyɛ tire sɔ̀nŋɔrʼà nâara a pi pyi pi a ɲùŋɔ tugo Yesu na.
4 Ka Yesu si jwumpe lwɔ́ maa jwo pi á:
«Kile tùnntunŋɔ maha le ɲjire e cyeyi puni i,
fo u cìnmpyiibii ná u tukanhe ná u tupyɛnge yɛ.»
5 Pi ɲyɛ a dá Yesu na mɛ,
lirʼà u sige u ɲyɛ a kakyanhala karii niɲyahagii pyi wani mɛ.
U à u cyeyi taha yamii niŋkin niŋkin na,
maa pire cùuŋɔ.
6 Pi dánabaare Yesu na,
lirʼà u kàkyanhala.
Ka u u wá na kàlaŋi pyi na ntùuli kuru kàmpanŋke kànyi na.
Yesu à u cyelempyiibii tun pi sà a Kile jwumpe yu
7 Lire kàntugo ka Yesu si u cyelempyiibii kɛ ná shuunniŋi yyere na ntunni shuunni shuunni pi sà a Kile jwumpe yu.
Maa fànhe kan pi á mú,
pi a jínabii kɔ̀re pi a yige pifeebilʼe.
8 Maa yi jwo pi á:
«Fo kàbii bà mɛ,
yii àha yaage kabɛrɛ lwɔ́ raa ŋkɛ̀ɛge kuni i mɛ,
yii àha yalyire lwɔ́ mɛ,
yii àha boro lwɔ́ mɛ,
yii àha wyɛ́rɛ lwɔ́ nde dufaabilʼe mɛ.
9 Yii tanhanya lwɔ́,
ŋka yii àha vàanntinɲyi shuunni lwɔ́ mɛ.»
10 U à kwɔ̀ maa pi pyi:
«Yii aha ŋkàre kànha maha kànha na,
ka wà si ɲɛɛ yii sunmbage na ke,
yii à yaa yii pi tɛ̀ɛn wani fo mà sà yaa ná yii tèekani i.
11 Ŋka yii aha ŋkàre cyage kʼe,
ka pi i yii sunmbage cyé,
maa mpyi pi ɲyɛ a ɲɛnʼa yii jwumpe lógo mɛ,
yii nivworobii kuru kànhe e,
yii yii tooyi bambaŋi kwòro kwòrʼa wu wani,
lirʼà kajwuu kwɔ̀ kuru kànhe shiin na.»
12 Ka pi i ŋkàrʼa sà a Kile jwumpe yu sùpyirʼá,
na pi pi toroŋkanni kɛ̂ɛnŋɛ.
13 Marii jínacyaanbii niɲyahamii jínahii kɔ̀re na yige pi e,
marii yamii niɲyahamii tìri ná sìnmpe e marii Kile ɲáare,
ka pi i wá na ɲcùuŋi.
Yuhana Batizelipyiŋi kwùŋkanni
14 Lire tèni i,
Yesu mɛgʼà fworo cyeyi puni i,
ka saanŋi Erɔdi si u kyaa lógo.
Pìi mpyi na ŋko:
«Yuhana Batizelipyiŋi u à ɲɛ̀ a fworo kwùŋi i,
lire kurugo u à jà na kakyanhala karigii pyi amɛ.»
15 Pìi sí i ŋko na Kile tùnntunŋi Eli u à núrʼa pa,
pìi mú sí i ŋko na tèecyiini Kile tùnntunŋi wà u à ɲɛ̀ a fworo kwùŋi i.
16 Erɔdi à cyire karigii lógo ke,
maa jwo:
«Yuhana Batizelipyiŋi ɲùŋke mii à pyi pi à kwɔ̀n ke,
uru u à ɲɛ̀ a fworo kwùŋi i.»
17-18 Yii li cè na Erɔdi mpyi a u sìɲɛɛŋi Filipi cwoŋi kwɔ̀n a lwɔ́ mà pyi u cwo.
Uru ceeŋi mɛge na mpyi Erɔdiyadi.
Lire e ka Yuhana si yi jwo Erɔdi á na u ɲyɛ a yaa u u sìɲɛɛŋi cwoŋi shwɔ u na mɛ.
Ka puru jwumpe si waha Erɔdi na,
ka u u pi pyi pi à Yuhana cû a le kàsuŋi i.
19 Ka Erɔdiyadi lùuni mú si yîri,
maa wá na boŋkanni caa Yuhana na.
Ŋka u yabiliŋi mpyi na sì n‑jà mɛ.
20 Erɔdi mpyi na fyáge Yuhana na,
ɲaha na yɛ u mpyi a cè na Yuhana à tíi maa mpyi Kile sùpya.
Lire kurugo u mpyi a yaha u na.
Erɔdi nʼa mpyi a u mɛjwuuni lógo,
u funŋke mpyi maha mpɛn.
Lire ná li wuuni mú i,
Yuhana jwumpe mpyi maha ntáan u á.
21 Ɲyɛ Erɔdi canzegʼà pa mâhana a nɔ lire yyeeni ke,
ka u u kataan bégele u wwoɲɛɛbii ná sòrolashiibii ɲùŋufeebii ná Galile kùluni shinbwoobii mɛɛ na.
Kuru canŋke Erɔdiyadi sí u nimpyiini pyi Yuhana na.
22 Erɔdiyadi mpyi a nàmbage lèŋɛ saanŋʼá ná pùceebilini ndemu i ke,
mà sùpyire yaha kataanni na,
lirʼà jyè na ŋkwɔ̂hɔli,
ka li kyaa si ntílʼa táan Erɔdi ná u shinyyerebilʼá.
Ka saanŋi si jwo pùceebilinʼá:
«Yaage na mu na ɲcáa ke,
ku cyêe,
mii sí ku kan mu á.»
23 Maa ŋkâa pùceebilinʼá,
na u aha yaaga maha yaaga ɲáare urʼá ke,
uru sí ku kan u á,
ali u niɲarege mɛ́ɛ kʼà bɛ̂ uru kìni taaga niŋkin na.
24 Ka pùceebilini si fworo ntàani na,
maa u nuŋi yíbe:
«Ɲaha mii à yaa mii u ɲáare yɛ?»
Ka nufooŋi si u pyi:
«Yi jwo u á na u Yuhana Batizelipyiŋi ɲùŋke kan ma á.»
25 Kuru cyage mujye e,
pùceebilinʼà fyâlʼa jyè saanŋi yyére maa yi jwo u á:
«Mii la ɲyɛ mà Yuhana Batizelipyiŋi ɲùŋke kwɔ̀n a le ŋkunanʼi mà kan na á numɛ.»
26 Puru jwumpʼà saanŋi yyahe tanha sèlʼe,
ŋka mà u yaha u à kâa pùcwoŋʼá u shinyyerebii ɲyii na,
u la sàha mpyi si ɲcyé mɛ.
27 Kuru tanuge e,
ka u u sòrolashiŋi wà tun u sà Yuhana ɲùŋke kwɔ̀n,
u a ma.
Ka uru si ŋkàre kasubage e mà sà Yuhana ɲùŋke kwɔ̀n,
28 mà le ŋkunanʼi mà pa ŋkan pùceebilinʼá,
ka uru sà ŋkan u nuŋʼá.
29 U cyelempyiibilʼà u mbòŋi kyaa lógo ke,
maa mpa u lwɔ́ a sà ntò.
Yesu à shiin kampwɔhii kaŋkuro ɲwɔ cya
30 Ɲyɛ Yesu tùnntunmpilʼà piye bínni u taan,
maa pi kapyiiŋkii puni ná pi kàlaŋi nimpyiŋi puni jwo u á.
31 Sùpyiibii nimpaampii ná niŋkaribii mpyi a ɲyaha a tòro,
fo mà Yesu ná u cyelempyiibii sige yalyire na,
ka u u yi jwo pi á:
«Yii a wá wuu yîri naha,
wuu raa sì wuu mɛge cyage sige e,
yii i sà ŋɔ̀ wani.»
32 Ka pi i bakwɔɔge lwɔ́ mà kàre pi mɛge cyage e sige e.
33 Shinɲyahara à pi niŋkaribii ɲya mà pi cè.
Ka kuru cyage kàmpanɲyi kànyi shinɲyahara si fê à núrʼa sà pi caanra sige e.
34 Yesu à fworo bakwɔɔge e mà pi ɲya pi à ɲyaha sèlʼe ke,
ka pi ɲùɲaare si u ta sèlʼe,
ɲaha na yɛ pi mpyi mu à jwo mpàa pi ɲyɛ piye ɲùŋɔ kurugo.
Ka u u wá na pi kâlali karii niɲyahagii na.
35 U cyelempyiibilʼà tèni ɲya li i ntùuli ke,
ka pi i file u na maa jwo:
«Cyelentuŋi!
Sige funŋke e wuu ɲyɛ,
canŋke sʼà kwɔ̀ a kwɔ̀.
36 Sùpyire cye yaha tʼa sì sishwɔnbugure ná kànyi na,
ti sà yalyire cya a shwɔ.»
37 Ka Yesu si pi pyi:
«Yii yabilimpii pi pi kan pi lyî.»
Ka pi i u pyi:
«Wuu mɛ́ɛ ká ŋkàrʼa sà shin niŋkin canmpyaa ŋkwuu shuunni (200) báara sàra tɛ̀gʼa bwúuru shwɔ mà pa ŋkan pi á,
uru sí n‑jà pi ta la?»
38 Ka Yesu si núrʼa pi yíbe:
«Yii sà wíi!
Bwúuru ɲùɲyi jùuli yi wá yii á yɛ?»
Ka pi i sà kàanmucyaga pyi,
maa mpa Yesu pyi na bwúuru ɲùnyɔ kaŋkuro ná fyapyaa shuunni yi wá wani.
39 Ɲyɛ ka Yesu si u cyelempyiibii pyi na pi sùpyire tìŋɛ tìŋɛ,
kuruyo kuruyo ɲyɛ̀puruge ɲuŋʼi.
40 Ka pi i ntɛ̀ɛn shiin ŋkuu ŋkuu (100) ná shiin beeshuunni ná kɛ kɛ kuruɲyi i.
41 Ka Yesu si bwúuru ɲùɲyi kaŋkuruŋi ná fyapyaagii shuunniŋi lwɔ́ u cyeyi i,
maa yyahe yîrige nìɲyiŋi i maa fwù kan Kile á yi kyaa na.
U à kwɔ̀ ke,
maa bwúuruŋi ná fyapyaagii kwɔ̀n kwɔ̀n mà kan u cyelempyiibilʼá pi à táa sùpyire na.
42 Sùpyire ti mpyi wani ke,
tire punʼà lyî a tìn.
43 Bwúuruŋi ná fyaabii paanyi yʼà kwôro ke,
yire mpyi a shàhii kɛ ná shuunni ɲî.
44 Mpii pi à lyî ke,
pire nàmbaabii kanni mpyi shiin kampwɔhii kaŋkuro (5.000).
Yesu à ɲaara lwɔhe ɲuŋʼi
45 Ɲyɛ lire ɲwɔhɔ na,
mà Yesu yaha u u sùpyire cye yare,
u à u cyelempyiibii pyi pi à jyè bakwɔɔge e,
maa baŋi jyiile u yyaha na,
Bɛtisayida kànhe yyére.
46 Yesu à ti cye yaha ke,
maa ŋkàrʼa sà Kile ɲáare ɲaŋke kà na.
47 Numpilagʼà wwɔ̀ mà u cyelempyiibii ta bakwɔɔge e baŋi niŋke e,
uru kanni u mpyi ɲìŋke na.
48 Numpilyage na,
kafɛɛge mpyi na pi bêni,
ka Yesu si li ɲya na pi à kànha bakwɔɔge mpuruŋi taan.
Pi sàha mpyi na jìnʼa ku pyi ku u ŋkɛ̀ɛge fwɔfwɔ mɛ.
Ka Yesu si yîri na ɲaare na ŋkɛ̀ɛge pi fye e lwɔhe ɲuŋʼi.
U à byanhara pi na ke,
ka u la si mpyi sʼa ntùuli pi ŋkere na.
49 Ŋka pi à u nimpaŋi ɲya lwɔhe ɲuŋʼi ke,
pi mpyi na sɔ̂nŋi na buŋi wà fwɔ̀ɔngɔ ki,
ka pi i yîri na kwuugii wàa,
50 ɲaha na yɛ pi puni ɲyii mpyi u na,
pi puni zòompii mpyi a kwɔ̀n.
Ka Yesu si ntílʼa jwumpe lwɔ́ maa pi pyi:
«Yii yákilibii tìŋɛ,
yii àha vyá mɛ,
mii wi.»
51 Ka u u jyè bakwɔɔge e pi fye e,
ka kafɛɛge si ntílʼa yyére.
Lirʼà pi puni kàkyanhala fo pi funŋɔ jwumpʼà kwɔ̀.
52 Pi ɲyɛ a mpyi a cè supyishiŋi u ɲyɛ Yesu mɛ.
Kakyanhani u à pyi mà bwúuruɲyahage kan sùpyirʼá ke,
lirʼà pyi pi ɲyii na,
ŋka pi funɲyi mpyi a múgo mɛ.
Yesu à yamii cùuŋɔ Zhenɛzarɛti kàmpanɲyi na
53 Ɲyɛ Yesu ná u cyelempyiibilʼà baŋi jyiile ke,
maa nɔ Zhenɛzarɛti kùluni i,
maa bakwɔɔge yyéeŋɛ baŋi ɲwɔge na.
54 Pi à fworo bakwɔɔge e ke,
ka sùpyire si Yesu ɲya a cè,
55 maa ŋkàre cyeyi puni i mà sà a Yesu mpaŋi kyaa yu.
Cyaga maha cyagʼe pi mpyi a u kyaa lógo ke,
pi mpyi maha ma ná yampilʼe na yîri kàmpanɲyi puni na,
pi yasinniɲyi ɲuŋʼi.
56 Yesu nʼa mpyi a nɔ cyaga maha cyagʼe ke,
kànbwɔhɔ yo,
kànbilere yo,
sishwɔn bùguro yo,
sùpyire mpyi maha mpa ná yampilʼe maha mpa yaha tafage e,
marii u ɲáare na u pi yaha pi a bwùun u vàanntinŋke zhwɔ̀ɔre na kanna.
Yampii pi mpyi maha bwùun u na ke,
pire puni mpyi maha ɲcùuŋi.