Luka 4

Sitaanniŋi na ɲcaa si Yesu sɔ̀n u kapii pyi

(Macwo 4.1-11; Marika 1.12-13)

Ɲyɛ mà Yesu yaha u à ɲî na, u à yîri Zhurudɛn baŋi ɲwɔge na mà kàre síwage e.

2 U à canmpyaa beeshuunni pyi síwage e, u ɲyɛ a yafyin lyî mɛ, ka katege si u ta. Cyire canmpyaagii funŋke e, ka Sitaanniŋi si file u na maa ɲcaa si u sɔ̀n ŋgà kapii na.

3 Ɲyɛ ka u u Yesu pyi: «Ná sí u ɲyɛ mu, yi jwo ŋke kafaagʼá ku kɛ̂ɛnŋʼa pyi bwúuru.» 4 Ka Yesu si u pyi: «Yʼà sémɛ Kile Jwumpe Semɛŋi i “Yalyire kanni bà ti ɲyɛ na sùpyaŋi ɲwɔ caa mɛ.”»

5 Lire kàntugo ka Sitaanniŋi si dùgo ná u e nìɲyiŋi na, maa diɲyɛŋi kìrigii puni cyêe u na yyerege niŋkin, 6 maa u pyi: «Mii sí ɲcyii kìrigii puni ɲùŋufente ná cyi nàfuuŋi kan mu á, ɲaha na yɛ tʼà kan mii á. Shinŋi u à táan mii á ke, urʼá mii sí ti kan. 7 Mu aha ɲɛnʼa niŋkure sín maa mii pêe, yire puni sí n‑pyi mu wuyo.» 8 Ka Yesu si u pyi: «Yʼà sémɛ Kile Jwumpe Semɛŋi i:

“Ta ma niŋkure sínni ma Kafooŋi Kile á, maa uru kanni pêre.”»

9 Lire kàntugo ka Sitaanniŋi si ŋkàre ná Yesu i Zheruzalɛmu kànhe e, maa sà dùgo ná u e Kileɲaarebage ɲùɲcyage e, maa yi jwo u á: «Ná Kile Jyaŋi sí u ɲyɛ mu, kwɔ̀n a cwo ɲìŋke na, 10 ɲaha na yɛ yʼà sémɛ Kile Jwumpe Semɛŋi i:

“Kile sí u mɛ̀lɛkɛɛbii tun, pi a mu kàanmucaa.

11 Pi sí mu cwɔhɔ ná pi cyeyi i,

bà li si mpyi kafaaga kà ŋkwɔ̀ mu tɔɔge kà bânni mɛ.”»

12 Ka Yesu si u pyi: «Yʼà sémɛ Kile Jwumpe Semɛŋi i “Ma hà raa ma Kafooŋi Kile ɲwɔ cwôre mɛ.”»

13 Ɲyɛ Sitaanniŋi à Yesu sɔ̀n a kànha shiŋi puni u kapii pyi ke, maa yîri u taan maa u yaha na tèni labɛrɛ sigili.

Yesu kànhe shiinbilʼà cyé u na

(Macwo 13.53-58; Marika 6.1-6)

14 Lire kàntugo ka Yesu si núrʼa kàre Galile kùluni i. fànhe mpyi u e sèlʼe. Ka u mɛge si fworo lire kùluni puni i. 15 U mpyi na Jwumpe Nintanmpe yu sùpyirʼá Kile Jwumpe kàlambayi i, ka tire puni si wá na u mɛtanga yiri.

16 Ka Yesu si ŋkàrʼa sà nɔ Nazarɛti i. Kuru kànhe na u à lyɛ. e, ka u u jyè Kile Jwumpe kàlambage e bà u mpyi maha ntêe na li pyi mɛ, maa yîrʼa yyére si Kile Jwumpe kâla. 17 Ka pi i Kile tùnntunŋi Ezayi sémɛŋi kan u á, ka u u u ɲwɔ múgo maa cyage kà kâla:

18 «Kafooŋi Kile Munaani ɲyɛ mii ɲuŋʼi.

U à mii cwɔɔnrɔ na mii u pa Jwumpe Nintanmpe jwo fòŋɔfeebilʼá,

si kàsujyiibii ɲjahaŋi kyaa jwo pi á,

si fyinmpii ɲyiigii mùgoŋi kyaa jwo pi á,

mpii pi ɲyɛ cwɔ̀nrɔmpe e ke, si pire yige pi kyéregefeebii cye e,

19 tèni i Kafooŋi Kile sí ɲwɔ sùpyire na si kacɛnnɛ pyi ti na ke, si lire kyaa jwo.»

20 Lire kàntugo ka Yesu si Kile Jwumpe Semɛŋi ɲwɔ tò maa u kan Kile Jwumpe kàlambage kacwɔnrɔŋʼá, maa ntɛ̀ɛn. Ka sùpyire puni si ti ɲyiigii le u e. 21 Ka Yesu si yi jwo pi á: «Kile Jwumpe yii à lógo numɛ ke, purʼà fûnŋɔ yii ɲyii na niɲjaa.» 22 Pi puni mpyi na u mɛtange yu. Jwumpe u à jwo ke, ka puru si mpyi kakyanhala pi punʼá. Ka pi i wá na yi yu piye shwɔhɔlʼe: «Taha Yusufu jyaŋi bà mɛ?»

23 Ka Yesu si pi pyi: «Mii à li cè na yii sí nde tàanlini jwo n‑wà mii na “Wempyiŋi, maye cùuŋɔ ma yabiliŋi” si mii cɛ̂ɛge na kakyanhala karigii yii à lógo na mii à pyi Kapɛrɛnamu kànhe e ke, na ɲaha na mii ɲyɛ a cyire fiige pyi naha na tukanhe na mà yɛ?» 24 Maa núrʼa jwo pi á: «Sèeŋi na mii sí yi jwo yii á, Kile tùnntunŋi wà tufiige maha le ɲjire e u tukanhe e mɛ. 25 Ŋka sèeŋi na mii sí yi jwo yii á, Kile tùnntunŋi tìiŋi i, leŋkwucyeebii mpyi a ɲyaha kìni i. Yyee taanre ná yiɲyɛ baani funŋʼi zànhe ɲyɛ a pa mɛ, ka katibwɔhɔ si ɲcwo kìni puni na. 26 Ŋka Kile ɲyɛ a Eli tun Izirayɛli leŋkwucwoŋi wà yyére mɛ, fo kìni labɛrɛ wu, uru mpyi Sarɛpita kànhe na, Sidɔn kùluni i.

27 Mà bâra lire na, Kile tùnntunŋi Elize tìiŋi i, tògofee niɲyahamii na mpyi Izirayɛli i, ŋka pi wà ɲyɛ a pa Elize yyére si ticuumpe ta mɛ, fo kìni labɛrɛ wu, u mɛge mpyi Nama, Siri kìni shin u mpyi u wi.»

28 Mpii puni pi mpyi Kile Jwumpe kàlambage e ke, tèni i pirʼà puru jwumpe lógo ke, ka pi lùgigii si yîri sèlʼe. 29 Ka pi i yîri, maa Yesu kɔ̀rʼa yige kànhe e. Pi kànhe mpyi a cyán ɲaŋke kà ɲuŋʼi, ka pi i ŋkàre ná u e ɲaŋke ɲùɲcyage e, si u ŋɔɔŋɔ ɲcyán ɲaŋke kacyage e. 30 Ka Yesu si pi paha a fworo.

Yesu à jínaŋi wà kɔ̀rʼa yige nàŋi wʼe

(Marika 1.21-28)

31 Ka Yesu si ŋkàre Galile kùluni kànhe kà na, kuru mɛge ɲyɛ Kapɛrɛnamu, maa wá na sùpyire kâlali e. 32 Ka u kàlaŋi si sùpyire kàkyanhala, ɲaha na yɛ u mpyi na pi kâlali ná Kile sífente e.

33 Lire tèni i, jínacyanŋi wà mpyi wani Kile Jwumpe kàlambage e, ka uru si jwo fànha na: 34 «Ei! Nazarɛti kànhe shinŋi Yesu, ɲaha shi ku ɲyɛ wuu ná mu shwɔhɔlʼe yɛ? Mu à pa mpa wuu shi bò la? Mii à mu cè, ŋge u à fworo Kile e ke, uru u ɲyɛ mu!» 35 Ka Yesu si fànha cyán jínaŋi na: «Ma ɲwɔge tò! Maa fworo ŋge nàŋi i!» Ka jínaŋi si nàŋi cyán sùpyire shwɔhɔlʼe, maa fworo u e. U ɲyɛ a kapii pyi u na mɛ. 36 Ka lire si sùpyire puni kàkyanhala fo ti na yu tiyʼá: «Mpe ɲyɛ jwumɔ dɛ! U maha fànha cyáan jínabii na ná u sífente e, pi a sì wá na fwore pifeebilʼe.» 37 Ka Yesu mɛge si fworo lire kùluni puni i.

Yesu à Pyɛri nafeɲcwoŋi cùuŋɔ

(Macwo 8.14-17; Marika 1.29-34)

38 Ka Yesu si fworo Kile Jwumpe kàlambage e, mà kàre Simɔ pyɛngɛ. U à sà Simɔ nafeɲcwoŋi ta u à sínni cifwuro cye e. Ka pi i li cya Yesu á, u pa ɲwɔ u na. 39 Ka Yesu si file u na, maa fànha cyán cifwure na, ka ti i láha u na. Ka u u ntílʼa yîri na sore pi á.

40 Canŋaɲyiicwoore na, yama shi maha shi pu mpyi kànhe e ke, ka pi i mpa ná pire puni i Yesu yyére. Ka u u u cyeyi taha pi puni niŋkin niŋkinŋi na, maa pi cùuŋɔ. 41 U mpyi na jínacyaanbii niɲyahamii jínahii kɔ̀re na yige pi e. Pire jínabii mpyi na yu fànha na: « u ɲyɛ mu!» Ŋka Yesu mpyi maha fànha cyáan pi na, maa jwumpe kwùun pi na, ɲaha na yɛ pi mpyi a cè na uru u ɲyɛ .

Yesu kapani

(Marika 1.35-39)

42 Ɲyɛ ɲyɛ̀gʼà pa múgo ke, ka u u fworʼa kàre sige funŋke e. Shinɲyahara mpyi a fworo na u caa. Pi à pa u cya a ɲya ke, ka pi la si mpyi u u ŋkwôro ná pire e. 43 Ka u u yi jwo pi á: «Jwumpe Nintanmpe pʼà yyaha tíi ná e ke, mii à yaa mii u puru jwo kànyi sanɲyʼá, ɲaha na yɛ lire mɛɛ na mii à tun.»

44 Lire e ka Yesu si wá na ɲaare na mâre na Jwumpe Nintanmpe yu Zhude kùluni Kile Jwumpe kàlambayi i.