Yesu à fyacumii taanre yyerʼa pyi u cyelempyii
5
Ɲyɛ canŋka mà Yesu niɲjyereŋi yaha Zhenɛzarɛti baŋi ɲwɔge na,
sùpyire mpyi a yyérʼa u kwûulo Kile jwumpe ndògoŋi kurugo,
fo na piye ŋɔɔŋi kàmpanɲyi puni na,
na u fɛnre.
2 Ka u u mpa wílʼa bakwooyo shuunni ɲya baŋi ɲwɔge na.
Fyácyaabii mpyi a fworo yire bakwooyi i na pi cwòobii jyìi.
3 Ka Yesu si sà jyè kuru bakwɔɔge kʼe,
Simɔ woge ku mpyi ku ki,
maa yi jwo Simɔ á:
«Bakwɔɔge lwɔ́ baŋi ɲwɔge na mà file yyaha yyére dooni.»
Simɔ à lire pyi ke,
ka Yesu si ntɛ̀ɛn bakwɔɔge funŋke e,
maa Kile jwumpe yu sùpyirʼá.
4 Ɲyɛ tèni i u à pa ŋkwɔ̀ Kile jwumpe ɲjwuŋi na ke,
maa jwo Simɔ á:
«Bakwɔɔge file lwɔhe tacuguŋke e,
yii i yii cwòobii wà,
yii i fyaabii pìi cya.»
5 Ka Simɔ si u pyi:
«Cyelentuŋi,
wuu à numpilage puni pyi fyácyaani na,
wuu ɲyɛ a yafyin ta mɛ,
ŋka ná mu sʼà jwo amuni,
mii sí cwòŋi wà sahaŋki.»
6 Ɲyɛ pi à cwòobii wà ke,
ka pi i fyaa niɲyahamii cû fo cwòobii na ŋkwùun.
7 Ɲyɛ pi shɛ̀rɛfeebii pi mpyi bakwɔɔge sanŋke e ke,
ka pi i pire yyere na pi pa pire tɛ̀gɛ.
Ka pi i bakwooyi shuunniŋi ɲî fyaabii na,
fo bakwooyi mpyi na ŋko raa ntîri lwɔhe ɲwɔhʼi.
8 Simɔ Pyɛri à lire ɲya ke,
maa niŋkure sín Yesu fere e,
maa jwo:
«Kafooŋi,
laaga tɔɔn na na,
ɲaha na yɛ mii ɲyɛ kapimpyiŋɛ.»
9 Fyaabii pi mpyi a cû ke,
Simɔ ná u shɛ̀rɛfeebii mpyi a fyá pi ɲyahaŋkanni na.
10 Zebede jyaabii pi mpyi ná Pyɛri e,
ná pire pi ɲyɛ Yakuba ná Yuhana ke,
pire mpyi a fyá mú.
Ka Yesu si Simɔ pyi:
«Ma hà vyá mɛ.
Mà lwɔ́ numɛ na,
bà mu mpyi na fyaabii caa na ɲcwôre mɛ,
amuni mu sí raa sùpyire caa tʼa bârali mii na.»
11 Ɲyɛ ka pi i núrʼa pa baŋi ɲwɔge na,
maa kàntugo wà bakwooyi ná yi funŋɔ yaayi puni na,
maa ntaha Yesu fye e.
Yesu à tògofoo cùuŋɔ
12 Mà Yesu yaha lire kùluni kànhe kà na,
tògofooŋi wà na mpyi wani,
tòge mpyi a u tɛgɛlɛ ta sèlʼe.
Tèni i u à Yesu ɲya ke,
ka u u niŋkure sín u fere e,
maa yyahe cyígile,
maa u ɲáare:
«Kafooŋi,
mu aha ɲɛɛ,
mu sí n‑jà mii tòge láha mii na si mii fíniŋɛ.»
13 Ɲyɛ Yesu à yire lógo ke,
maa cyɛge sànha maa bwɔ̀n u na,
maa jwo:
«Mii à ɲɛɛ,
tòge ku láha ma na!»
Ka tòge si ntílʼa láha u na.
14 Ka Yesu si u pyi:
«Cû ma ɲwɔge na,
ma hà yaaga jwo sùpya á mɛ.
Ŋka ta sì,
maa sà maye cyêe sáragawwuŋi na u u ma kàanmucya,
sárage kyaa Kile tùnntunŋi Musa à jwo tògofeebii ɲcùuŋɔŋi kyaa na ke,
maa kuru wwû.
Lire li sí li cyêe pi na na mu à cùuŋɔa.»
15 Ɲyɛ ka Yesu mɛge si li ɲwɔ cû na fwore sèlʼe.
Shinɲyahara mpyi maha mpa a bínnini u taan,
maa u jwumpe núru,
u a sì wá na pi cùuŋi.
16 Ŋka Yesu mpyi maha ŋkwɔ̀ a yîri pi taan,
maa sà Kile ɲáare síwage funŋke e.
Yesu à supyimuruŋɔ cùuŋɔ maa ku kapegigii yàfa ku na
17 Canŋka mà Yesu yaha Kile jwumpe ɲjwuŋi na,
Farizhɛɛnbii pìi ná Kile Saliyaŋi cyelentiibii pìi mpyi wani.
Pire mpyi a yîri Galile kùluni ná Zhude kùluni kànyi puni ná Zheruzalɛmu kànhe na.
Ka Yesu si wá na yampii cùuŋi ná Kafooŋi Kile sífente e.
18 Ka sùpyire tà si yaŋi wà tugʼa pa u yasinniŋke e,
uru nàŋi mpyi a mûruŋɔ.
Pi la mpyi si jyè bage e si u file Yesu na.
19 Ŋka sùpyire ɲyahaŋi kurugo,
pi ɲyɛ a jà a tajyige ta ná u e mɛ;
ka pi i dùgo bage kàtanŋke na,
maa kuru fûru,
maa supyimuruŋke ná ku yasinniŋke le a tîrige kuru wyige e Yesu fere e sùpyire shwɔhɔlʼe.
20 Yesu à li ɲya na mpii nàmpilʼà dá uru na ke,
ka u u jwo supyimuruŋkʼá:
«Nà wà we,
mu kapegigilʼà yàfa mu na.»
21 Kile Saliyaŋi cyelentiibii ná Farizhɛɛnbii pi mpyi wani ke,
ka pire si wá na ŋkunni maa jwo:
«Ɲaha na ŋge nàŋi ɲyɛ na Kile mɛge kɛ̀ɛge yɛ?
Fo Kile kanni bà mɛ,
wà sì n‑jà sùpya kapegigii yàfa u na mɛ!»
22 Ɲyɛ Yesu à pa pi kunuŋke ɲùŋke cè ke,
maa pi pyi:
«Ɲaha na tire nte sɔ̀nŋɔre shiŋi ɲyɛ yii funɲyi i yɛ?
23 Mà jwo “Mu kapegigilʼà yàfa mu na” ná “Yîri,
maa ɲaare” yii ɲyii na,
cyire kapyaagii mú shuunni i ndire jwumɔ pʼà táan yɛ?
24 Ŋka yii pi li cè na síŋi na ɲyɛ Supyaŋi Jyaŋi á naha ɲìŋke na,
u wà kapegii yàfa u na.»
Lire e u à jwo supyimuruŋkʼá:
«Ta núru na ɲwɔ na.
Yîri maa ma yasinniŋke lwɔ́ maa sì pyɛngɛ.»
25 Lire tèenuuni i,
ka nàŋi si yîri maa u yasinniŋke lwɔ́ a fworo sùpyire ɲyii na,
na Kile kêre,
na ŋkɛ̀ɛge pyɛngɛ.
26 Ka li i pi puni bilibili.
Pi mpyi na Kile kêre,
maa ŋko:
«Ei!
Wuu à kakyanhala karii ɲya niɲjaa dɛ!»
Yesu à lyî ná mɛpɛngɛ shiinbilʼe
27 Lire kàntugo ka Yesu si fworo ntàani na,
maa wílʼa múnalwɔɔre shwofooŋi wà ɲya u à tɛ̀ɛn u báaraŋi tapyige e.
U mɛge mpyi Levi.
Ka Yesu si yi jwo u á:
«Yîrʼa taha na fye e.»
28 Ka Levi si báaraŋi puni ɲwɔ yaha maa ntaha Yesu fye e.
29 Lire kàntugo Levi à kataan nimbwoo pyi Yesu mɛɛ na u pyɛnge e.
Shinɲyahara mpyi na lyî ná pi e siɲcyan.
Pire shwɔhɔlʼe,
múnalwɔɔre shwofeebii mpyi a ɲyaha.
30 Farizhɛɛnbii ná Kile Saliyaŋi cyelentiibii pìlʼà lire ɲya ke,
maa Yesu cyelempyiibii yíbe:
«Ɲaha na yii ɲyɛ na lyî marii byii ná múnalwɔɔre shwofeebii ná mɛpɛngɛ shiinbii piibɛrilʼe yɛ?»
31 Ka Yesu si pi pyi:
«Mpii pi à cùuŋɔ ke,
wempyiŋi kyaa ɲyɛ pire na mɛ,
mpii pi na yà ke,
pire na u kani ɲyɛ.
32 Mpii pi ɲyɛ na piye sɔ̂nŋi na pirʼà tíi ke,
mii ɲyɛ a pa ɲìŋke na pire tayyerege e mɛ.
Ŋka mpii pi à li cè na pire ɲyɛ a tíi mɛ,
pire tayyerege e mii à pa,
bà pi si mpyi si pi toroŋkanni kɛ̂ɛnŋɛ mɛ.»
Jwumpe Nintanmpe fànhʼà ɲyaha Yahutuubii làdaabii woge na
33 Ka pi i u pyi:
«Tèrii niɲyahagilʼe Yuhana Batizelipyiŋi cyelempyiibii ná Farizhɛɛnbii wuubii maha súnŋi leni marii Kile ɲáare,
mu wuubii sí maha lyî marii byii canŋa maha canŋa.»
34 Ka Yesu si pi pyi:
«Yii na sɔ̂nŋi na yii sí n‑jà fànha cyán cifɔnŋi pooŋi ceveebii na,
pi i súnŋi le mà cipooŋi yaha ná pi e la?
35 Ŋka tèni là na ma,
cipooŋi sí n‑pa n-yige pi shwɔhɔlʼe.
Lire tèni i pi sí n‑ta raa súnŋi leni.»
36 Ka Yesu si tàanlini là jwo pi á na:
«Wà ɲyɛ na vàanvɔnŋɔ kwùnnʼa tɛ̀gʼa vàanɲjyɛga tacwɔngɔ jwooli mɛ.
Lire ká mpyi,
mu maha vàanvɔnŋke kɛ̀ɛge,
vàanvɔnŋke kwɔnge ná vàanɲjyɛge sí ɲyɛ na jìnʼa yiye lwɔ́ mɛ.
37 Wà mú sí ɲyɛ na sinmpurugo leni seeye boolyɛgilʼeb mɛ.
Lire baare e pʼaha mpa ntanha,
pu maha pu yaleŋke jya,
maa wu,
yaleŋkʼa sì ŋkɛ̀ɛge.
38 Sinmpurugʼà yaa kʼa leni seeyi boofɔnŋkilʼe.
39 Lire ná li wuuni mú i,
sùpya ɲyɛ a sìi na sinntanhaga byii maa núrʼa yyaha yige sinmpurugo kurugo mɛ.
Ɲaha kurugo yɛ u maha jwo na nintanhage kʼà táan.»