Marika Jwumpe Nintanmpe Jwuŋkanni
Yuhana Batizelipyiŋi na kuni bégeli Yesu yyaha na
1
Jwumpe Nintanmpe pu ɲyɛ na Kile Jyaŋi Yesu Kirisita kyaa yu ke,
puru ɲwɔkwɔɔnre ti ɲyɛ nte.
2 Kile à fyânha a jwo u tùnntunŋi Ezayi sémɛŋi i:
«Wíi,
mii sí na tùnntunŋi tun mu yyaha na,
u sà kuni yaa mu mɛɛ naa,
3 sùpya mɛjwuu sí n‑pa raa fwore síwage e fànha na
“Yii kuni yaa Kafooŋi mɛɛ na,
yii kumpyɛrɛ nintiire yaa u áb.”»
4 Lire pyiŋkanni na,
Yuhana Batizelipyiŋi à kàre síwage e mà sà uye cyêe,
marii sùpyire batizeli,
marii yi yu pi á na:
«Yii yii toroŋkanni kɛ̂ɛnŋɛ,
yii i batize,
bà Kile si mpyi si yii kapegigii yàfa yii na mɛ.»
5 Zheruzalɛmu kànhe ná Zhude kùluni shiinbii niɲyahamii mpyi na sì u yyére,
maa ntɛ̀n li taan na pire kapyiiŋkii ɲyɛ a tíi mɛ,
Yuhana sí i pi batizeli Zhurudɛn baŋi lwɔhe e.
6 Ɲyɛ Yuhana vàanntinŋke mpyi a yaa ná ɲwɔhɔŋi shire e,
u mpyi maha uye pwu ná seepwɔge e,
maa uye ɲwɔ caa ná kampɛɛnɲyi ná tuwyiyi sɛɛre e.
7 U mpyi na yi yu sùpyirʼá:
«Ŋge u na ma mii kàntugo ke,
uru tayyéregʼà fànha tò mii woge na.
Ali mà naye tîrige si nta mpyi u tanhaɲyi mɛɛre sànhafoo,
mii ɲùŋkʼà cyɛ́rɛ lire mpyiŋi i.
8 Mii wi ke,
mii à yii batize lwɔhe e,
ŋka uru wi ke,
uru sí yii batize ná Kile Munaani i.»
Yuhana à Kile Jyaŋi Yesu batize
9 Cyire canmpyaagilʼe,
Yesu à yîri Nazarɛti kànhe e Galile kùluni i mà kàre Yuhana yyére.
Ka Yuhana si u batize Zhurudɛn baŋi lwɔhe e.
10 Yesu nivworoŋi lwɔhe e,
ka u u nìɲyiŋi ɲya u u múru,
ka Kile Munaani si ntîgʼa tɛ̀ɛn u na mpánmpɔrɔgɔ fiige.
11 Ka mɛjwuu si fworo nìɲyiŋi i na:
«Mii Jyaŋi u ɲyɛ mu,
mu kanʼà waha mii na sèlʼe.
Mu kapyiiŋkilʼà táan mii á mú.»
Sitaanniŋi na ɲcaa si Yesu sɔ̀n u kapii pyi
12 Lire kàntugo ka Kile Munaani si ŋkàre ná Yesu e síwage e.
13 U à canmpyaa beeshuunni pyi wani sige yaare shwɔhɔlʼe.
Cyire canmpyaagii funŋke e,
ka Sitaanniŋi si file u na,
maa ɲcaa si u sɔ̀n ŋgà kapii na.
Kile mɛ̀lɛkɛɛbii mpyi ná u e,
marii u tɛ̀re.
Yesu à fyacumii sicyɛɛre yyerʼa pyi u cyelempyii
14 Ɲyɛ Yuhana Batizelipyiŋi leŋkwooni kàntugo na kàsuŋi i,
ka Yesu si ŋkàre Galile kùluni i,
marii Kile Jwumpe Nintanmpe yu,
na ntùuli.
15 U mpyi na yi yu sùpyirʼá:
«Tènʼà nɔ,
Kile Saanre tènʼà byanhara.
Yii yii toroŋkanni kɛ̂ɛnŋɛ,
yii dá Jwumpe Nintanmpe na.»
16 Canŋka Yesu niɲaraŋi Galile baŋi ɲwɔge na,
u à fyácyaa shuunni ɲya,
Simɔ ná u sìɲɛɛŋi Andire,
pi mpyi na cwòo wàa baŋi i.
17 Ka u u yi jwo pi á:
«Yii taha na fye e.
Bà yii na fyaabii caa mɛ,
mii sí yii taanna yii raa sùpyire caa tʼa ma mii á.»
18 Ka pi i ntílʼa pi cwòobii yaha,
maa ntaha Yesu fye e.
19 Ɲyɛ pi à ta naha vili yyaha na sahaŋki ke,
ka Yesu si núrʼa sìɲɛɛ shuunni ɲya,
pire pi mpyi Zebede jyaabii,
Yakuba ná Yuhana.
Pi ná pi tuŋi Zebede mpyi a tɛ̀ɛn pi bakwɔɔge funŋke e,
na pi cwòobii takɛgɛyi yaa.
20 Ka Yesu si ntílʼa pi yyere,
ka pi i pi tuŋi Zebede ná u báarapyiibii yaha wani bakwɔɔge e,
maa ntaha u fye e.
Yesu à jínaŋi wà kɔ̀rʼa yige nàŋi wʼe
21 Ka Yesu ná u cyelempyiibii si ŋkàre Kapɛrɛnamu kànhe e.
Canŋɔŋke,
ka u u jyè Kile Jwumpe kàlambage e,
na sùpyire kâlali.
22 Mpii pi mpyi wani na núru u ɲwɔ na ke,
u kàlaŋi pyiŋkanni mpyi a pire kàkyanhala,
ɲaha na yɛ u ɲyɛ a mpyi na pi kâlali Kile Saliyaŋi cyelentiibii fiige mɛ,
ŋka ná Kile sífente e u mpyi na pi kâlali.
23 Lire tèni i,
jínacyanŋi wà mpyi wani Kile Jwumpe kàlambage e,
ka uru si jwo fànha na:
24 «Nazarɛti kànhe shinŋi Yesu,
ɲaha shi ku ɲyɛ wuu ná mu shwɔhɔlʼe yɛ?
Mu à pa mpa wuu shi bò la?
Mii à mu cè,
ŋge u à fworo Kile e ke,
uru u ɲyɛ mu!»
25 Ka Yesu si fànha cyán jínaŋi na:
«Ma ɲwɔge tò!
Maa fworo ŋge nàŋi i!»
26 Ka jínaŋi si nàŋi cúnŋɔ cúnŋɔ,
maa ŋkwúulo fànha na,
maa fworo u e.
27 Ka lire si sùpyire puni kàkyanhala fo ti na yu tiyʼá:
«Ɲaha ku ŋkire yɛ?
Kàlavɔnŋɔ ŋge nàŋʼà kan ná Kile fànhe e,
u maha fànhe cyáan jínabii mú na pi i núru u ɲwɔ na!»
28 Ka Yesu mɛge si fworo Galile kùluni puni i.
Yesu à yamii niɲyahamii cùuŋɔ
29 Lire kàntugo ka Yesu ná u cyelempyiibii si fworo Kile Jwumpe kàlambage e,
maa ŋkàre ná Yakuba ná Yuhana e,
Simɔ ná Andire yyére.
30 Pi à sà Simɔ nafeɲcwoŋi ta u à sínni cifwuro cye e,
ka pi i u kyaa jwo Yesu á.
31 Ka Yesu si file u na tasinnage e,
maa u cû cyɛge na a yîrige.
Ka cifwure si ŋkwɔ̀,
ka u u yîri na sore pi á.
32 Yàkoŋke,
canŋa ɲyiinʼà cwo ke,
ka pi i ŋkàre ná yampii puni ná jínacyaanbilʼe Yesu yyére.
33 Kànhe shinɲyahara mpyi a bínni bage ɲwɔge na.
34 Ka u u yampe shiŋi niɲyahamafee cùuŋɔ,
maa jínacyaanbii niɲyahamii jínahii kɔ̀rʼa yige pi e,
maa jwumpe kwɔ̀n jínabii na,
ɲaha na yɛ pi mpyi a u cè Kile wuŋi wà.
Yesu kapani
35 Kuru canŋa nùmpanŋa ɲyɛ̀sɔɔge na,
ka Yesu si yîrʼa fworo,
maa ŋkàre sige funŋke e si sà Kile ɲáare.
36 Simɔ ná u shɛ̀rɛfeebilʼà yîrʼa fô u e ke,
maa ŋkàrʼa sà a u caa.
37 Pi à u ɲya ke,
maa u pyi:
«Sùpyire puni wá na mu caa.»
38 Ka Yesu si pi pyi:
«Wuu a sì wuu taan kànyi na.
Mii à yaa mii i Jwumpe Nintanmpe jwo wani mú,
ɲaha na yɛ mii kapani li.»
39 Lire e ka u u wá na ɲaare Galile kùluni puni i,
maa Jwumpe Nintanmpe yu Kile Jwumpe kàlambayi i,
maa jínabii kɔ̀re na yige pifeebilʼe.
Yesu à tògofoo cùuŋɔ
40 Ka tògofooŋi wà si file Yesu na,
maa niŋkure sín u fere e,
maa u ɲáare fànha na,
maa jwo:
«Mu aha ɲɛɛ,
mu sí n‑jà mii tòge láha mii na,
si mii fíniŋɛ.»
41 Nàŋi ɲùɲaarʼà Yesu ta ke,
ka u u u cyɛge sànha maa bwɔ̀n u na,
maa jwo:
«Mii à ɲɛɛ,
tòge ku láha ma na!»
42 Ka tòge si ntílʼa láha u na,
ka u u ɲcùuŋɔ.
43 Ka Yesu si u cye yaha,
maa li jwo a waha u á:
44 «Cû ma ɲwɔge na,
ma hà yaaga jwo sùpya á mɛ,
ŋka ta sì,
maa sà maye cyêe sáragawwuŋi na u u ma kàanmucya,
sárage kyaa Kile tùnntunŋi Musa à jwo tògofeebii ɲcùuŋɔŋi kyaa na ke,
maa kuru wwû.
Lire li sí li cyêe na mu à cùuŋɔc.»
45 Ŋka nàŋi ɲyɛ a jà a cû u ɲwɔge na mɛ.
U à kàrʼa sà a yi yu cyeyi puni i,
ka li i mpyi Yesu saha sì n‑jà n‑tíi n‑jyè kànha na mɛ.
U mpyi sige funŋke e,
ŋka lire ná li wuuni mú i,
sùpyire mpyi na yîri cyeyi puni i,
na u taa wani.