Yesu à supyimuruŋɔ cùuŋɔ maa ku kapegigii yàfa ku na
2
Canmpyalʼà tòro ke,
ka Yesu si núrʼa kàre Kapɛrɛnamu kànhe e.
Ka sùpyire si lógo na u ɲyɛ wani bage kʼe,
2 maa mpa bínni mà bage ɲî.
Tatɛɛngɛ sàha mpyi mɛ,
bage ɲwɔge mpyi a ɲî.
Ka Yesu si wá na Kile jwumpe yu pi á.
3 Lire na u ɲyɛ,
ka pi i mpa ná yaŋi wʼe,
u mpyi a mûruŋɔ.
Nàmbaa sicyɛɛre mpyi a u tugo.
4 Ŋka sùpyire ɲyahaŋi kurugo,
pi ɲyɛ a jà a nɔ ná u e Yesu na mɛ.
Ka pi i dùgo bage kàtanŋke na,
maa kuru fûru,
maa yaŋi ná u yasinniŋke le a tîrige kuru wyige e Yesu fere e sùpyire shwɔhɔlʼe.
5 Yesu à li ɲya na mpii nàmpilʼà dá uru na ke,
ka u u jwo supyimuruŋkʼá:
«Na jya,
mu kapegigilʼà yàfa mu na.»
6 Kile Saliyaŋi cyelentiibii pi mpyi a tɛ̀ɛn wani kuru cyage e ke,
ka pire si wá na yu piye funŋʼi:
7 «Ɲaha na ŋge nàŋi ɲyɛ na mpe jwumpe shiŋi yu yɛ?
U na Kile mɛge kɛ̀ɛge.
Fo Kile kanni bà mɛ,
wà sì n‑jà sùpya kapegii yàfa u na mɛ!»
8 Ka Yesu si ntílʼa pi funŋɔ sɔ̀nŋɔre cè,
maa yi jwo pi á:
«Ɲaha na yii ɲyɛ ná nte sɔ̀nŋɔre shiŋi i yɛ?
9 Mà jwo “Mu kapegigilʼà yàfa mu na” ná “Yîri,
ma a ma yasinniŋke lwɔ́ ma a ɲaare” yii ɲyii na cyire kapyaagii mú shuunni i ndire jwumɔ pʼà táan yɛ?
10 Ŋka yii pi li cè na li síŋi na ɲyɛ Supyaŋi Jyaŋi na,
naha ɲìŋke na,
u wà kapegii yàfa u na.»
11 Lire e u à jwo supyimuruŋkʼá:
«Ta núru na ɲwɔ na,
yîri ma a ma yasinniŋke lwɔ́,
ma a sì pyɛngɛ.»
12 Ka nàŋi si ntílʼa yîri,
maa u yasinniŋke lwɔ́ mà fworo sùpyire puni ɲyii na,
ka li i pi puni kàkyanhala,
ka pi i Kile pêe sèlʼe,
maa jwo:
«Wuu sàha nde fiige ɲya mɛ!»
Yesu à lyî ná mɛpɛngɛ shiinbilʼe
13 Yesu à núrʼa kàre Galile baŋi ɲwɔge na.
Ka shinɲyahara si wá na ma u yyére,
ka u u wá na pi kâlali.
14 U nintoroŋʼà Alife jyaŋi Levi ɲya u à tɛ̀ɛn múnalwɔɔre tashwɔge e.
Ka u u yi jwo u á:
«Yîrʼa taha na fye e».
Ka Levi si yîrʼa taha u fye e.
15 Canŋka Levi à Yesu ná u cyelempyiibii yyere pi sà lyî.
Múnalwɔɔre shwofeebii ná mɛpɛngɛ shiinbii piibɛrii mpyi a ɲyaha Yesu fyèɲwɔhɔshiinbilʼe,
ka Levi si pi niɲyahamii yyere pi sà lyî mú.
16 Kile Saliyaŋi cyelentiibii pi mpyi Farizhɛɛnbii toŋkuni i ke,
pire pìlʼà lire ɲya ke,
maa Yesu cyelempyiibii pyi:
«Ɲaha na yii cyelentuŋi na lyî ná múnalwɔɔre shwofeebii ná mɛpɛngɛ shiinbii piibɛrilʼe yɛ?»
17 Yesu à yire lógo ke,
maa jwo:
«Mpii pi à cùuŋɔ ke,
wempyiŋi kyaa ɲyɛ pire na mɛ,
mpii pi na yà ke,
pire na u kani ɲyɛ.
Mpii pi ɲyɛ na piye sɔ̂nŋi na pirʼà tíi ke,
mii ɲyɛ a pa ɲìŋke na pire tayyerege e mɛ.
Ŋka mpii pi à li cè na pire ɲyɛ a tíi mɛ,
pire tayyerege e mii à pa.»
Jwumpe Nintanmpe fànhʼà ɲyaha Yahutuubii làdaabii woge na
18 Ɲyɛ Yuhana Batizelipyiŋi cyelempyiibii ná Farizhɛɛnbii mpyi maha súnŋi leni,
ka sùpyire tà si mpa Yesu pyi:
«Ɲaha na Yuhana Batizelipyiŋi cyelempyiibii ná Farizhɛɛnbii wuubii maha súnŋi leni,
mu cyelempyiibii sí ɲyɛ na u leni mà yɛ?»
19 Ka Yesu si pi pyi:
«Cipooŋi ká mpyi ná cikwɔnbilʼe,
pi sí n‑jà n‑pyi lyìmbaa lire tèni i la?
Mà pi ná uru yaha siɲcyan pi sì n‑sìi n‑jà n‑kwôro lyìmbaa mɛ.
20 Ŋka tèni là na ma,
cipooŋi sí n‑pa n-yige pi shwɔhɔlʼe.
Lire tèni i pi sí n‑ta raa súnŋi leni.»
21 Ka Yesu si núrʼa jwo:
«Wà ɲyɛ na vàanvɔnŋɔ tɛ̀gɛ na vàanɲjyɛga tacwɔngɔ jwooli mɛ.
Lire ká mpyi,
vàanvɔnŋke maha vàanɲjyɛge kɛ̀ɛge,
tacwɔngʼa sì nâara a pêe.
22 Wà mú sí ɲyɛ na sinmpurugo leni seeye boolyɛgilʼea mɛ.
Lire baare e pʼaha mpa ntanha,
pu maha pu yaleŋke jya,
maa wu,
yaleŋkʼa sì ŋkɛ̀ɛge.
Sinmpurugʼà yaa kʼa leni seeyi boofɔnŋkilʼe!»
Ɲje Yesu à jwo canŋɔŋke kyaa na ke
23 Ɲyɛ canŋka Yesu ná u cyelempyiibii mpyi na ntùuli sùma kooyi yʼe.
Kuru canŋke na mpyi canŋɔŋɔ.
Ka u cyelempyiibii si cye le sùmaŋi i na ŋkwùun na mínage na ŋkùrub.
24 Farizhɛɛnbii pìlʼà lire ɲya ke,
maa Yesu pyi:
«Wíi,
ɲaha na mu cyelempyiibii na canŋɔŋke kafuunŋkii pyi yɛc?»
25 Ka u u pi pyi:
«Nde saanŋi Dawuda à pyi ke,
yii ɲyɛ a lire kâla mà?
Canŋka mà u ná u fyèɲwɔhɔshiinbii katege wuubii yaha,
26 u à jyè Kile bage e,
lire tèni i Abyatari u mpyi Kile sáragawwuubii ɲùŋufembwɔhe,
maa sárage bwúuruŋi wà lwɔ́ a kyà,
maa wà kan u fyèɲwɔhɔshiinbilʼá.
Mà li ta sáragawwuubii kanni pi mpyi a yaa pi jà a uru bwúuruŋi kyà.»