Yuhana Batizelipyiŋi kwùŋkanni
14
Ɲyɛ saanŋi Erɔdi à pa a Yesu shɛnrɛ núru ke,
2 maa jwo u báarapyiibilʼá:
«Yuhana Batizelipyiŋi wi,
u à ɲɛ̀ à fworo kwùŋi i,
lire kurugo u à jà na kakyanhala karigii pyi amɛ.»
3-4 Yii li cè na Erɔdi mpyi a u sìɲɛɛŋi Filipi cwoŋi kwɔ̀n a lwɔ́ mà pyi u cwo.
Uru ceeŋi mɛge na mpyi Erɔdiyadi.
Lire e ka Yuhana si yi jwo Erɔdi á na u ɲyɛ a yaa u u sìɲɛɛŋi cwoŋi shwɔ u na mɛ.
Ka puru jwumpe si waha Erɔdi na,
ka u u pi pyi pi à Yuhana cû a pwɔ a le kàsuŋi i.
5 Erɔdi la mpyi si Yuhana bò,
ŋka u mpyi na fyáge Yahutuubii yyaha na,
ɲaha na yɛ pi puni mpyi a li cè na Yuhana na ɲyɛ Kile tùnntunŋɔ.
6 Ɲyɛ Erɔdi canzegʼà pa mâhana a nɔ lire yyeeni ke,
ka u u pìi yyere maa kataan pyi.
Ɲyɛ mà pi yaha lire kataanni na,
Erɔdiyadi pworoŋʼà pa a ŋkwɔ̂hɔli shinyyerebii shwɔhɔlʼe,
ka lire si ntáan Erɔdi e,
7 fo u à kâa pùcwoŋʼá na u aha yaaga maha yaaga ɲáare urʼá ke,
kuru sí n‑kan u á.
8 Ka pùcwoŋi nuŋi si jwo a kan pùcwoŋʼá na u sà jwo saanŋʼá na u Yuhana Batizelipyiŋi ɲùŋke kwɔ̀n a le ŋkunanʼi,
u pa ŋkan urʼá.
9 Ka puru jwumpe si saanŋi yyahe pyi kʼà tanha.
Ŋka u mpyi na sì n‑jà n‑cyé mɛ,
ɲaha na yɛ u mpyi a kâa u shinyyerebii ɲyii na.
Ɲyɛ ka u u pìi pyi pi sà Yuhana ɲùŋke kwɔ̀n kàsuŋi i pi pa ŋkan pùcwoŋʼá.
10 Ɲyɛ ka pi i Yuhana ɲùŋke kwɔ̀n
11 mà le ŋkunanʼi,
mà kan pùcwoŋʼá,
ka u u ku kan u nuŋʼá.
12 Ɲyɛ lirʼà pyi ke,
ka Yuhana cyelempyiibii si mpa u buwuŋi lwɔ́ mà sà ntò,
maa sà u sànge wyì Yesu á.
Yesu à shiin kampwɔhii kaŋkuro ɲwɔ cya
13 Ɲyɛ Yesu à puru jwumpe lógo ke,
maa yîri kuru cyage e,
maa jyè bakwɔɔge kʼe,
mà kàre sige funŋke e.
Sùpyirʼà pa u saha cè ke,
maa fworo pi kànyi i,
maa ŋkàre u fye e tɔɔre na.
14 Yesu à fworo bakwɔɔge e mà pi ɲya pi à ɲyaha sèlʼe ke,
ka pi ɲùɲaare si u ta sèlʼe,
yampii pi mpyi tire sùpyire shwɔhɔlʼe ke,
ka u u pire cùuŋɔ.
15 Ɲyɛ yàkoŋkʼà pa nɔ ke,
ka u cyelempyiibii si file u na maa jwo:
«Cyelentuŋi!
Sige funŋke e wuu ɲyɛ,
canŋke sʼà kwɔ̀ a kwɔ̀.
Sùpyire cye yaha bà ti si mpyi si sà ɲjyì shwɔ ɲwɔkurugo kànyi i mɛ.»
16 Ka Yesu si pi pyi:
«Lire ɲyɛ a pi kakarala kwɔ̀ mɛ,
yii yabilimpii pi pi kan pi lyî.»
17 Ka pi i u pyi:
«Bwúuru ɲùnyɔ kaŋkuro ná fyapyaa shuunni kanna cyi naha wuu ɲuŋʼi.»
18 Ka u u pi pyi:
«Yii a ma ná yʼe.»
19 Ɲyɛ pi à pa ná yʼe ke,
ka u u sùpyire pyi tʼà tɛ̀ɛn ɲyɛge ɲuŋʼi.
Pi à tɛ̀nnʼa kwɔ̀ ke,
ka u u bwúuru ɲùɲyi kaŋkuruŋi ná cyire fyapyaagii shuunniŋi lwɔ́,
maa yyahe yîrige nìɲyiŋi i,
maa fwù kan Kile á yi kyaa na.
Maa bwúuruŋi kwɔ̀n kwɔ̀n a kan u cyelempyiibilʼá,
pi à kan sùpyirʼá.
20 Sùpyire ti mpyi wani ke,
tire punʼà lyî a tìn.
Ka pi i ŋkwɔ̀ maa shàhii kɛ ná shuunni ɲî ɲjyìpaanyi na.
21 Pire lyìlyibilʼe,
nàmbaabii kanni mpyi a shiin kampwɔhii kaŋkuro (5.000) kwɔ̀,
cyeebii ná nàŋkopyire ɲyɛ a tɔ̀rɔ mɛ.
Yesu à ɲaara lwɔhe ɲuŋʼi
22 Ɲyɛ lire ɲwɔhɔ na,
mà Yesu yaha u u sùpyire cye yare,
u à u cyelempyiibii pyi pi à jyè bakwɔɔge e,
maa baŋi jyiile u yyaha na.
23 Ɲyɛ Yesu à ti cye yaha ke,
maa ŋkàrʼa sà Kile ɲáare ɲaŋke kà na,
u kanni.
U à kwôro wani fo mà pa nɔ yàkoŋke na.
24 Ɲyɛ bakwɔɔge e cyelempyiibii mpyi na baŋi jyiili ke,
lirʼà kuru ta ku u byanhare lwɔhe niŋke na.
Ka kafɛɛge si wá na fwu na lwɔhe tɛ̀re na bakwɔɔge ŋɔɔŋi na wàa kàmpanɲyi puni na.
25 Ɲyɛ numpilagʼà pa lyɛ ke,
ka Yesu si yîri na ɲaare na ŋkɛ̀ɛge pi fye e lwɔhe ɲuŋʼi.
26 Cyelempyiibilʼà u nimpaŋi ɲya lwɔhe ɲuŋʼi ke,
maa fyá sèlʼe fo na ɲcyɛ̂ɛnni maa jwo:
«Buŋi wà fwɔ̀ɔngɔ ku ɲyɛ ŋke!»
Mà pi fyagara wuubii yaha,
pi mpyi na kwuuyi wàa.
27 Mà pi yaha purʼe,
ka Yesu si ntílʼa jwumpe lwɔ́ maa pi pyi:
«Yii yákilibii tìŋɛ,
yii àha vyá mɛ,
mii wi.»
28 Ka Pyɛri si jwo:
«Kampyi mu u ɲyɛ u wi,
na yaha si ɲaara lwɔhe ɲuŋʼi,
si ma ɲùŋɔ bɛ̂.»
29 Ka Yesu si u pyi:
«Ta ma.»
Ka u u fworo bakwɔɔge e na ɲaare na Yesu ɲùŋɔ bêni lwɔhe ɲuŋʼi.
30 Ŋka u à pa kafɛɛge ɲya kʼà pêe maa fyá ke,
ka u u li ɲwɔ cû na ntîri lwɔhe ɲwɔhʼi,
maa ŋkwúuli:
«Kafooŋi,
na shwɔ!»
31 Ka Yesu si ntílʼa cyɛge sànha,
maa u cû maa jwo:
«Mu dániyaŋʼà cyɛ́rɛ dɛ!
Ɲaha na mu ɲyɛ a funŋke pyi niŋkin mà yɛ?»
32 Ka Yesu ná Pyɛri si jyè bakwɔɔge e,
ka kafɛɛge si ntílʼa yyére.
33 Ɲyɛ lirʼà pyi ke,
mpii pi mpyi bakwɔɔge e ke,
ka pire si niŋkure sín Yesu á maa jwo:
«Nàkaana baa,
Kile Jyaŋi u ɲyɛ mu.»
Yesu à yamii cùuŋɔ Zhenɛzarɛti kàmpanɲyi na
34 Ɲyɛ Yesu ná u cyelempyiibilʼà baŋi jyiile ke,
maa jyè Zhenɛzarɛti kùluni i.
35 Kuru cyage shiinbii mpyi a Yesu cè,
lire e pi à Yesu mpaŋi jwo puru màhampe puni i.
Ka sùpyire si wá na ma ná yampii shinŋi puni i Yesu á.
36 Pi mpyi na Yesu ɲáare na u pire yaha pi i bwɔ̀n u vàanntinŋke zhwɔ̀ɔre na kanna.
Yampii pi mpyi maha bwùun u na ke,
pire puni mpyi maha ɲcùuŋi.