Yii àha raa pi sanmpii cɛ̂ɛge mɛ
7
Yii àha raa pi sanmpii cɛ̂ɛge mɛ,
lire ká mpyi Kile mú sì yii cɛ̂ɛge mɛ.
2 Ɲaha na yɛ bà yii na sùpyire sannte cɛ̂ɛge mɛ,
amuni Kile mú sí yii cɛ̂ɛgɛ.
Cùŋkanni na yii ɲyɛ na sùpyire sannte cwôre ke,
amuni Kile mú sí yii cû.
3 Ɲaha na mu ɲyɛ na ɲyɛ̀sɛnni ɲaa ma cìnmpworoŋi ɲyiini i,
mà li ta bànnaŋi u ɲyɛ mu wuuni i ke,
mu ɲyɛ na uru ɲaa mà yɛ?
4 Mà tàanna ná lire e,
di mu sí n‑jà n‑jwo ma cìnmpworoŋʼá na u yyére ma a ɲyɛ̀sɛnni wwû u ɲyiini i,
mà li ta bànnaŋi ɲyɛ mu wuuni i yɛ?
5 Mu u à fyìnmɛ tò wwomɔ na ke,
fyânha a bànnaŋi wwû ma ɲyiini i,
lire ká mpyi,
mu sí raa ɲaa raa ɲcwúu ɲyɛ̀sɛnni tawwuge e ma cìnmpworoŋi ɲyiini i.
6 Yaayi yi ɲyɛ Kile wuyo ke,
yii àha raa yire kaan pwuunbilʼá mɛ,
lire baare e pi sí n‑jà n‑yîri yii kurugo si yii sulugo.
Yii àha raa yii kɔ́ɔnŋi loŋgara wuŋi cyáan caabii taan mɛ,
lire baare e pi sí raa u tánhani.
Kile maha u pyìibii ɲareyi shuu
7 Yii a Kile ɲáare,
u sí yii kan,
yii a ɲcaa,
yii sí n‑ta,
yii a bàrage kúuli,
ku sí múgo yii á.
8 Yii li cè na shin maha shin u ɲyɛ na ɲáare ke,
uru maha ntaa.
Shin maha shin u ɲyɛ na ɲcaa ke,
uru maha ɲaa.
Shin maha shin ká bàrage kúu ke,
ku sí múgo urufolʼá.
9 Jofoo u ɲyɛ yii shwɔhɔlʼe,
ŋgemu u sí ɲɛɛ kafaaga kan u pyàŋʼá,
mà li ta bwúuru u à ɲáare u á yɛ?
10 Lire ɲyɛ mɛ,
mà wwò kan u á mà li ta fya u à ɲáare yɛ?
11 Ɲyɛ yii sùpyiibii pi à pi ke,
cyage e yii maha jà a yacɛnɲyɛ kan yii pyìibilʼá ke,
yii ɲyɛ a cè a jwo na yii Tuŋi u ɲyɛ nìɲyiŋi na ke,
urʼà bégelʼa tòro yii taan si yacɛnɲyɛ kan u ɲáarafeebilʼá mà?
12 Lire e yaaga maha yaaga yii la ɲyɛ sùpyire sannte sʼa mpyi yii á ke,
yii lire pyi pi á mú.
Yire Kile tùnntunŋi Musa Saliyaŋi ná Kile tùnntunmpii sanmpii sémɛbilʼà jwo.
Kurigii shuunniŋi kani
13 Yii jyè tajyiɲwɔge nimbileni i.
Ɲaha kurugo yɛ kuni li maha kakyaare nɔ sùpyaŋi na ke,
lire tajyiɲwɔgʼà pêe,
lire kùnʼà pêe,
lire e shinɲyahara ɲyɛ na ɲaare.
14 Ŋka kuni li maha shìŋi niŋkwombaaŋi kaan ke,
lire tajyiɲwɔgʼà cyɛ́rɛ,
li ɲarama à pɛn,
li ɲaarafeebii ɲyɛ a ɲyaha mɛ.
Cige maha ɲcè ku yasɛɛre e
15 Kafinivinibii pi maha piye pyi Kile tùnntunmii fiige ke,
yii a yiye kàanmucaa pire na.
Pi aha a ma yii á,
pi maha piye pyi mpàa fiige,
mà li ta pi funɲyʼà pi sige yaayi fiige.
16 Yii sí pi cè pi kapyiiŋkii cye kurugo.
Wà sí n‑jà ɛrɛzɛn cige yasɛrɛ kwɔ̀n ŋguro cige na la?
Lire ɲyɛ mɛ,
mà fizhiye cige yasɛrɛ kwɔ̀n ŋguro cige na la?
17 Lire pyiŋkanni na,
cicɛnŋke yasɛɛrʼà ɲwɔ,
cipege woore sʼà pi.
18 Cicɛnŋɛ sì n‑jà raa yasɛrɛ nimpere seni mɛ.
Cipege mú sì n‑jà raa yasɛrɛ niɲcɛnnɛ seni mɛ.
19 Cige maha cige ku ɲyɛ ku ɲyɛ na yasɛrɛ niɲcɛnnɛ seni mɛ,
ku sí n‑kwɔ̀n n‑wà nage e.
20 Lire e ke yii sí pi cè pi kapyiiŋkilʼe,
bà cige maha ɲcè ku yasɛɛre e mɛ.
21 Mpii puni pi ɲyɛ na mii pyi “Kafooŋi,
Kafooŋi” ke,
pire puni sì n‑jyè Kile Saanre e mɛ,
mii Tuŋi nìɲyi wuŋi ɲyii wuuni pyifeebii kanni pi ɲyɛ jyifeebii.
22 Kuru canŋke ká nɔ,
shinɲyahara sí n‑pa mii pyi “Kafooŋi,
Kafooŋi,
wuu mpyi na Kile tùnnture yu mu mɛge na,
marii jínabii kɔ̀re na yige mu mɛge na,
marii kabwɔhii niɲyahagii pyi mu mɛge na mà?”
23 Lire tèni i,
mii sí yi jwo tire sùpyirʼá “Mii ɲyɛ a sàa yii cè mà ɲya mɛ.
Yii yîri na taan,
yii kapimpyiibii!”
Yákilifooŋi ná funŋɔ baa shinŋi kani
24 Shin maha shin ká mii jwumpe lógo,
maa pu kurigii ɲaare ke,
urufoo sí n‑jà n‑tàanna ná yákilifooŋi wʼe ŋgemu u à u bage faanra kafaafoge ɲuŋʼi ke.
25 Kuru bage faanraŋkwooni kàntugo,
zànbwɔhʼà cwo,
ka dùyi si ɲî na fwu na fwore,
ka kafɛɛge si wá na fwu sèe sèlʼe na kuru bage ŋɔɔŋi,
ŋka ku ɲyɛ a cwo mɛ,
ɲaha na yɛ ku nintaani na ɲyɛ kafaafogo ɲuŋʼi.
26 Ŋka shin maha shin ká mii jwumpe lógo,
maa mpyi u ɲyɛ na pu kurigii ɲaare mɛ,
urufoo na ɲyɛ mu à jwo funŋɔ baa shin,
ŋgemu u à u bage faanra nticyɛnŋi ɲuŋʼi ke.
27 Kuru bage faanraŋkwooni kàntugo,
zànbwɔhʼà cwo,
ka dùyi si ɲî na fwu na fwore,
ka kafɛɛge si wá na fwu sèe sèlʼe na kuru bage ŋɔɔŋi,
ka ku puni si mpi a wu.»