Ok Pokposun
pasal sok Kitab Ponognaan
Mga pigilugan,
Salam diniyu kotanan.
Ok kitab nok posunguꞌ niyu bastahon kini, yonin na ok Kitab Ponognaan nong misunuꞌ sog Kitab Tawrat. Modakol ong misulat sok Kitab Ponognaan kini miktolipun sok pokpoongon nok Tuhan og lupaꞌ bug langit diyalom nom ondow, bu jukup ok kotanan. Mibasta ta nok piongon nok Tuhan ong manusiyaꞌ nong migbatuk-batuk diyanin, bu pionongin ilon sog landuꞌ kolingkat nog bonuwa nog Eden. Gondow-gondow mogdunut-dunut ilon nok Tuhan. Tibuwa dangan mikodusa ilon, piawaꞌ ilon nok Tuhan sog Eden. Sugaid sog daꞌ in pa pawaoy, pinatoyin ok solobuk binatang bagun podogdoyan ilon, bu migjanjiꞌ yanin nog ongon ok tupuꞌ nilon nong mokosaggaꞌ sok pagas nog Iblis sog lomaꞌ-dinglaga (3:1-21).
Na migbogoy bu mikkurban og gumbataꞌ nilon nok siloꞌ Kabil bu si Habil sok Tuhan. Ok kurban ni Habil og bataꞌ nog bilibili bu kisulutan nok Tuhan dun. Sugaid og binogoy ni Kabil, ondaꞌ tabukoy nok Tuhan. Dadi milingit si Kabil, bangka nin patoyoy si Habil (4:3-12).
Biyan nini kiosunan ta nong manusiyaꞌ taga dusa. Kiosunan ta sop sok sinulat dini, ok Tuhan, yanin ong Mahasutsi. Diꞌ tokodoy yanin meleg nog dusa, bu og bayad nog dusa ok siksaꞌ. Saan na dangan miglanduꞌ na ok kolaatan nong manusiyaꞌ, mikohukum ok Tuhan nok papasonin ilon biyan song mosolag nog lunup. Sugaid inawonin si Nabi Nuh poꞌ mologdong yanin nok tow. Dadi sog daꞌ pa og lunup, sinuguꞌ yanin nok Tuhan mogimung nong mosolag nog gadjung bagun moawon yanin dunut salu baloyin sampoy na ong mga miglologinis nog binatang bu komanuk-manukan (6:13; 7:1-5).
Pogobon-obon miksidakol na sop ong mga manusiyaꞌ sog dunya bu sigi-sigi pa ilon monginang nog dusa. Dadi pikselen-selen nok Tuhan ong mga ponaluon nilon bagun diꞌ ilon moksinabutoy (11:1-9).
Sok Kitab kini sinulat da sop pasal ni Nabi Ibrahim nok sinuloyan nok Tuhan, poꞌ sinuguꞌ yanin kurbanon og bataꞌ in. Sugaid pagga nabi si Ibrahim, tinaluꞌ in sog bataꞌ in nok Tuhan da ong mokpiliꞌ nog bataꞌ bibili nok kurbanon. Ok kurban nog binogoy nok Tuhan gantiꞌ sog bataꞌ ni Ibrahim sog waktu koyon, kanaꞌ og bataꞌ bilibili. Tibuwa migjanjiꞌ ok Tuhan nog biyan sok tupuꞌ ni Nabi Ibrahim mobarakat og lam nog bangsa sog dunya. Saan na dangan mikobiyan nong ngibuhan nok tahun bu mitongow ni Yahiya Mongliliguꞌ si Isa Al-Masih, taluꞌ in, “Tontong niyu ba, yonin koyon og Bataꞌ Bilibili nok Tuhan nok kurbanon bagun papason og dusa nong mga manusiyaꞌ” (22:1-18 bu Kitab Injil, Yahiya 1:29).
Na si Isahak, og bataꞌ ni Nabi Ibrahim koyon, migbataꞌ yanin ni Yaꞌkubb, bu si Yaꞌkub migbataꞌ ni Yusupc bug mga koiluganin. Sugaid dangan migdalu ong mga koilugan ni Yusup diyanin, piksaluy nilon yanin toktob miimung yanin nog gulipon song Misir. Pagga si Yusup diꞌ meleg mogdusa sog gamu nin biyan sok pokpolani sog libunin, mipirisu yanin. Puluan nok tahun diyon yanin, tibuwa migduma ok Tuhan diyanin. Pogdoksuꞌ nituꞌ mikobogbad yanin nok toginop ni Pirꞌawn, bu miimung yanin nog ikoduwaꞌ kounutan song Misir. Tinumombaꞌ si Yusup nok pininda nok Tuhan sok kobaisan, ok poksipi nok koiluganin sok kolaatan, saan da inampunin da sop ong mga koiluganin. Dadi biyan ni Yusup miawon ong mokogulang-gilugin sok ponggutom, bu miglalin ilon song Misir. Minatoy siloꞌ Yaꞌkub bug Yusup song Misir. Sugaid sog daꞌ pa patoy si Yusup, mimilin yanin nog ongon da og waktu nong mokawaꞌ ong mga ponupuꞌ nilon song Misir bangka uliꞌ sok Kanaan.
Na song mga suksugan sok Kitab kini pasal niloꞌ Adam, Nuh, Ibrahim, Ismael, Isahak, Esaw, Yakub (nog ginantiꞌ nok Tuhan ong ngalanin moimung Israel), Yusup bug mga koiluganin, motongow ta nok taga kolasa-kololat ok Tuhan. Moliampunoy yanin bisan ong mga manusiyaꞌ lolayun sumaggaꞌ sok koleganin.
Bung mayan tonduan ita niyu nok Tuhan biyan sok sinulat kini, bu oyitonin ita niyu sog dalan nok posunguꞌ sok surgaꞌ.
Wassalam