Ok Pogdugtul nong Manusiyaꞌ sok Suguan nok Tuhan
3
Na sog lam nong mga binatang talunan nog inimung nok Tuhan,
ong mamak og labi modalom og gakkalin.
Dadi ongon og gondow sinakan nong mamak og libun,
“Pigondian amu taꞌ tokodoy nok Tuhan kuman nog olo-olo nong mga bunga kayu dini?”
2 Tinumabal og libun,
“Mogdadi ami da kuman nog lam nituꞌ
3 liyu sog bunga kayu sok titongaꞌ nog bonuwa kini.
Pigondian ami nok Tuhan kuman bu mongonggayd nog bunga kayu koyon bagun diꞌ ami matoy.”
4 Tinaluan yanin nong mamak,
“Tantu tokodoy,
diꞌ amu matoy.
5 Miktaluꞌ ok Tuhan nong mamaꞌ niyon poꞌ kiosunanin nog bilaꞌ mokokan amu dun,
sunoy pa mobukaꞌ ok pikilan niyu bu kosunan niyu na bug olo ong mobais bu molaat,
mamaꞌ nok Tuhan.”
6 Poktontong nog libun sok kayu koyon,
kilingkatan yanin bu mobaisin kanon og bunga nin,
bu mosolag og legin dun bagun kumosun yanin.
Saan na inupuꞌ in og bunga koyon bangka nin kanoy.
Doksuꞌ binogoyanin og laki nin,
bangka sop kan.
7 Sunoy pa mibukaꞌ ok pikilan nilon bangka nilon pa kosayuhoy nong miglobas ilon.
Dadi sinobot-sobot nilon ong mga dawon nok kayu higera,a
bangka nilon tapisoy.
8 Dangan posunguꞌ na sumindop og gondow,
midongog nilon nong mipanow ok Tuhan Pogbayaꞌ-bayaꞌ sog lambul pomulan,
dadi miksolobuni ilon sog diyalom kayuhan.
9 Sugaid tinawag nok Tuhan og laki,
“Ayin ka na dun?”
10 Tinumabal og laki,
“Miksolobuni u dangan midongogu ok tingog nu sog lambul pomulan,
poꞌ miglobasu,
saan na mondoku.”
11 Miksak ok Tuhan,
“Manu ma?
Sima ong mikposun dinika nong miglobasa?
Kinuman ka taꞌ nog bunga kayu nok pigondiꞌ u dinika?”
12 Tinumabal og laki,
“Og libun nog binogoy nu dinakon,
binogoyanin akon nog bunga kayu kituꞌ,
saan na mikokan ku dun.”
13 Na sinakan nok Tuhan og libun,
“Manu ininang nu ma kituꞌ?”
Tinumabal og libun,
“Inakkalan ku nong mamak,
saan na kinuman ku dun.”
14 Tinaluan nok Tuhan ong mamak,
“Sabap sog ininang nu koyon,
pogbiddaon ku ika song mga len nog binatang,
ika hadja ok suknaan ku.
Mokponanapa,
bu mouglon nu og bogombun sog bon nu totubuꞌ.
15 Popogbantahon ku amu nog libun kini,
sampoy sok tupuꞌ nu bug tupuꞌ in.
Ludakon nok tupuꞌ in og gulu nu,
bu toktukon nu sop ok sakil nok tupuꞌ in.”
16 Tinaluan sop nok Tuhan og libun,
“Kologonan ka tokodoy bilaꞌ mogbodosa,
bu ponakitan ka bilaꞌ posunguꞌ a na mogbataꞌ.
Sugaid bisan maꞌ nituꞌ,
yonin da og leg nu sog laki nu,
bu pogbayaanin ika.”b
17 Doksuꞌ tinaluanin og laki,
“Miginongoga sog libun nu,
bu kinuman ka nog bunga kayu nok pigondiꞌ u dinika,
dadi sabap dinika mosugat og lupaꞌ nok suknaꞌ u.
Poktiksaan nu tokodoy monontong ok kotubuan nu sog bon nu totubuꞌ.
18 Tumubuꞌ sog lupaꞌ ong mga somponit bug bonganga,
sugaid kuman ka da nong mga pomulan diyon.
19 Moktiksaꞌ a momula bagun ongon ok kanon nu sampoy mokpuliꞌ a sog lupaꞌ.
Inimunga tidu sog lupaꞌ,
dadi sog lupaꞌ a da sop uliꞌ.”
20 Iningalanan ni Adam og libunin nog Hawa,c
poꞌ yanin og ginaꞌ nog lam nong manusiyaꞌ.
Ok Pokpoawaꞌ nok Tuhan niloꞌ Adam sog Bonuwa nog Eden
21 Na inimungan nok Tuhan Pogbayaꞌ-bayaꞌ si Adam bug libunin nok ponapot tidu sok panit nog binatang bagun ongon mosolug nilon.
22 Tubus miktaluꞌ ok Tuhan,
“Na mamaꞌ na dinita ong manusiyaꞌ,
mibukaꞌ na ok pikilan nilon song mobais bug molaton,
suboy saggaan ta ilon bagun diꞌ ilon sop mokoupuꞌ bu mokokan nog bunga kayu nong mogbogoy nok kotubuꞌ solama-lama.”
23 Dadi piluwas nok Tuhan ong manusiyaꞌ sog Eden bu piinangin og laki sog lupaꞌ nok piktiduhanin.
24 Dangan piawaꞌ na nok Tuhan ong manusiyaꞌ sog Eden,
binotanganin nong mga malaikatd mogipat sog lambul silangan nog Eden.
Binotanganin da sop solobuk kalis nong miksuliyab bug miglabadan diyon,
bagun daꞌdun ong mokopolani sok kayu nong mokobogoy nok kotubuꞌ solama-lama.