2
Na midoksuꞌ na ok pogimung nog langit bug lupaꞌ bu olo-olo na sog lam nituꞌ.
2 Midoksuꞌ na og inimung nok Tuhan,
tubus sog ikopitu ondow,
ondaꞌ yanin poginang.
3 Binarakatan nok Tuhan og ikopitu ondow bu pilabi nin bagun mosutsi,
poꞌ linotaanin na og ginangin mokpoongon.
Kodungagan ok Suksugan pasal sok Koongon nong Manusiyaꞌ
4 Na kopulian ta ok suksugan pasal sok pokpoongon nok Tuhan Pogbayaꞌ-bayaꞌ nog langit bug lupaꞌ.
5 Sog waktu koyon daꞌdun pa ok sigbot nong mitubuꞌ dun,
bu daꞌdun pa ong minolinsing nok pomulan,
poꞌ daꞌ pa podupioy nok Tuhan og lupaꞌ.
Daꞌdun pa sop ok tow,
dadi daꞌdun pa ong mokopoguma dun.
6 Sugaid ongon ok kotubudan sog lupaꞌ nong mikopotubig sog lam nog dibabowin.
7 Na minalap nog lupaꞌ ok Tuhan,
bangka nin imungoy nok solobuk manusiyaꞌ.
Tubus inoyupin og luwang nok sung nong manusiyaꞌ og ginawa nong mokopotubuꞌ,
dadi kiongonan yanin nok kotubuꞌ.
8-9 Pidinsamaꞌ nok Tuhan ong mobais nog bonuwa sog lambul silangan,
yonin na og Eden.
Pitubuꞌ in sog lupaꞌ koyon og lam nog ginisan nok kayu nong mokololiyag tontongon bu mobais kanon og bunga nin.
Sok titongaꞌ in pitubuꞌ in og duwaꞌ buk kayu.
Ok solobuk mokobogoy nok kotubuꞌ solama-lama,
bu ok solobuk mokobogoy nok kokosun pasal sog ginang mobais bu molaton.
Na dituꞌ in pionong ok tow nog inimungin kituꞌ.
10 Na ongon ok subaꞌ miglayas sog Eden.
Kitubiganin og lam nok pomulan diyon,
doksuꞌ mibahagiꞌ pat buk og biyanan nok subaꞌ.
11 Ong ngalan nong mikuna nok subaꞌ Pison.
Yonin koyon og limibut sog lam nog bonuwa nog Habila,
nog ongon og bulawanin.
12 Og bulawan sog bonuwa koyon mobais,
bu ongon sop og ginisan nog litaꞌ nong momut bug mohalgaꞌ nog batu dituꞌ.
13 Ong ngalan nog ikoduwaꞌ nok subaꞌ Gihon.
Yonin koyon og limibut sog lam nog bonuwa nok Kus.
14 Og ikotolu nok subaꞌ,
ngalanin Tigris.
Yonin koyon ong miglayas sok silangan nog bonuwa nog Asiriya.
Ong ngalan nog ikopat nok subaꞌ Alpurati.
15 Na pionong nok Tuhan Pogbayaꞌ-bayaꞌ og laki koyon sog bonuwa nog Eden bagun mokopoguma bug mokopogipat yanin song mga pomulan koyon.
16 Na sinuguꞌ nok Tuhan og laki koyon,
taluꞌ in,
“Bayaꞌ nu kuman sog lam nog bunga nong mga kayu kini,
17 sugaid og bunga nok kayu nong mokobogoy nok kokosun pasal sog ginang nong mobais bu molaton,
naꞌ a kuman dun,
poꞌ sog gondow nok kuman ka dun,
matoya na dodaꞌ.”a
18 Doksuꞌ miktaluꞌ ok Tuhan,
“Kanaꞌ mobais og laki kini nok sala nin da.
Imungan ku yanin nog duma nin nong mosulut bug mokotabang diyanin.”
19 Dadi og lam nong mga binatang bug komanuk-manukan kituꞌ nog inimung nok Tuhan tidu sog lupaꞌ,
inoyitin sog laki,
bagunin motongow bug olo ok pongingalan nog laki koyon dinilon.
Na bisan olo ok pongingalanin dun,
yonin na kituꞌ ong ngalanin.
20 Dadi pingingalanan na nog laki og lam nong mga binatang,
modongon bug mila,
bu ok komanuk-manukan.
Sugaid para sog ginawa nin,
daꞌdun ong mosulut bu mokotabang diyanin tidu dinilon.
21 Dadi pianok nok Tuhan og laki koyon.
Soliyanin mianok motulug,
inalap nok Tuhan ok solobuk gusuk nog laki,
bangka nin tingkopoy og gangol koyon.
22 Tidu sog gusuk nog laki koyon inimung nok Tuhan og libun,
bangka nin oyitoy diyanin.
23 Poktanud nog laki miktaluꞌ yanin,
“Na yonin na kini ok tulan tidu sok tulan ku
bug gungod tidu sog gungodu!
Dadi ingalanan ku yanin nog libun
poꞌ inalap yanin tidu sog laki.”b
24 Saan na sumuwoy og laki sog gommaꞌ bug ginaꞌ in bu mampuꞌ sog libunin,
bangka ilon poksolobuk.
25 Miglobas ong moglaki-bini koyon,
sugaid diꞌ ilon mosipog.