Kitab
PONOGNAAN
Ok Pokpoongon nok Tuhan nog Dunya
1
Sok tolipunan tokodoy piongon nok Tuhan og langit bug lupaꞌ.
2 Og dunya tagnaꞌ daꞌdun pa og bayuꞌ-bayuꞌ in bu daꞌdun pa og gungodin luwal sok tubig nog diꞌ motokkad bu dinungmaan nog dolom.
Bu og Ruh nok Tuhan og dinumibabow sok tubig.
3 Doksuꞌ mikparman ok Tuhan,
“Sumahaya!”
Dadi simahaya.
4 Kisulutan ok Tuhan sok sahaya nong mitongowin,
bangka nin poselenoy og dolag tidu sog dolom.
5 Ok sahaya iningalanan nok Tuhan Gondow,
bu og dolom iningalananin nog Gobi.
Na miniyan ok sogobi bu sondow.
Yonin na og ikosolobuk nog gondow.
6 Mikparman ok Tuhan,
“Sumboy ongon ong mokposuwoy nok tubig sok tas gawan bug tubig sok silung.”
7 Dadi miongon mogdayun.
Inimung nok Tuhan ong mokposuwoy nok tubig sok tas bu sok silung.
8 Iningalananin og inimungin kituꞌ Langit.
Na miniyan ok sogobi bu sondow.
Yonin na kituꞌ og ikoduwaꞌ ondow.
9 Doksuꞌ mikparman ok Tuhan,
“Motimbul tibuwa sok solobuk bonuwa ok tubig sok silung magun tumuwaꞌ og lupaꞌ.”
Dadi mitimbul mogdayun.
10 Iningalanan nok Tuhan ok kimalahan koyon Lupaꞌ bu ok tubig nong mitimbul kituꞌ,
iningalananin Dagat.
Poktontong nok Tuhan dun,
kisulutan yanin.
11 Na mikparman na sop ok Tuhan,
“Tumubuꞌ sog lupaꞌ og lam nog ginisan nok pomulan,
ong mga mogboyaan bug mga kayu mogbunga.”
Dadi miongon na mogdayun.
12 Timubuꞌ sog lupaꞌ og lam nog ginisan nok pomulan,
ong mga taga boyaan bug mga bunga kayu.
Poktontong nok Tuhan dun,
kisulutan yanin.
13 Na miniyan ok sogobi bu sondow.
Yonin na kituꞌ og ikotolu ondow.
14 Doksuꞌ mikparman ok Tuhan,
“Moongon sok kolangitan ong mga sahaya bagun moposelen og gondow tidu sog gobi,
bu ilon ong moimung gindanan sog gondow,
timpu bu tahun.
15 Mogligaꞌ ilon sok kolangitan bagun kosahayahan og dunya.”
Dadi miongon mogdayun.
16 Piongon nok Tuhan og duwaꞌ nong mosolag nok sahaya,
og gondow,
ok kinosolagan bagun sumahaya labung-solom,
bu ong mikaan,
og bulan bagun sumahaya sog gobi.
Piongonin da sop ong mga bitun.
17-18 Binotang nok Tuhan ong mga sahaya sok kolangitan bagun kosinagan og dunya nok sahaya nilon gondow-gobi,
bu piselenin og gondow tidu sog gobi.
Poktontong nok Tuhan dun,
kisulutan yanin.
19 Na miniyan ok sogobi bu sondow.
Yonin na og ikopat ondow.
20 Mikparman na sop ok Tuhan,
“Moongon sok tubig og lam nog ginisan taga kotubuꞌ bu moglayug ok komanuk-manukan sok tas gawan.”
21 Na piongon nok Tuhan ong mga kosottuwahan sog dagat,
bu ong mga taga kotubuꞌ nong mokoluksang bug mokobeteꞌ nog lumanguy bu mokpoponanap sog diyalom dagat bu sok tubig motobang.
Piongonin da sop ong mga miglologinis nok komanuk-manukan.
Poktontong nok Tuhan dun,
kisulutan yanin.
22 Dadi binarakatan ilon nok Tuhan.
Taluꞌ in,
“Poktupuꞌ bu poksidakol amu mga motubuꞌ sok tubig bagun mokanat amu sog gindagatan,
bu moktupuꞌ ok komanuk-manukan sog ginlupaan.”
23 Na miniyan ok sogobi bu sondow.
Yonin na og ikolima ondow.
24 Mikparman ok Tuhan,
“Moongon og lam nog ginisan nong mga taga kotubuꞌ sog lupaꞌ,
mokosolag bug mokobeteꞌ,
modongon,
mila,
sampoy ong mga mokpoponanap sog ginlupaan.”
Dadi miongon mogdayun.
25 Mikpoongon ok Tuhan nog lam nog ginisan nok taga kotubuꞌ kini.
Poktontong nok Tuhan dun,
kisulutan yanin.
26 Doksuꞌ mikparman ok Tuhan,
“Poongonon ta ong manusiyaꞌ nong mogbatuk-batuk dinita,
bagun mogbayaꞌ ilon nok kosodaan sog dagat,
komanuk-manukan sog gawan,
mga binatang bug sog lam nog ongon sog lupaꞌ.”
27 Dadi piongon nok Tuhan ong manusiyaꞌ nong migbatuk-batuk diyanin,
inimungin ilon nog laki bug libun.
28 Doksuꞌ binarakatan ilon nok Tuhan,
tinaluanin ilon,
“Pogbataꞌ bug poksidakol amu bagun mokanat pogonongoy nong mga tupuꞌ niyu og liwag nog ginlupaan,
bu amu ong mogbayaꞌ ayin-ayin sampoy sok kosodaan sok tubig,
sok komanuk-manukan sog gawan,
bu sog lam nong moglilow sog ginlupaan.”
29 Bu mikparman pa ok Tuhan,
“Tontong niyu,
bogoyan ku amu nog lam nok pomulan nong mogboyaan bug mga kayu nong mogbunga bagun niyu mokan.
30 Bogoyan ku da sop nok pomulan nok kanon og lam nong mga binatang,
komanuk-manukan sampoy ong mga mokpoponanap sog ginlupaan.
Og lam nok taga kotubuꞌ,
ok pomulan ok kan nilon.”
Na maꞌ nituꞌ.
31 Tinontong nok Tuhan og lam nok piongonin bu kisulutan tokodoy yanin.
Na miniyan ok sogobi bu sondow.
Yonin kituꞌ og ikonom ondow.