Pogawaꞌ i

Ok Pokposun

pasal sok Kitab Pogawaꞌ

Mga pigilugan,

Salam diniyu kotanan.

Ok Kitab Pogawaꞌ kini ok suksugan pasal sok pogawon nok Tuhan song mga tow sok pongulipon dinilon nong mga tow . Sok Kitab Ponognaan kosunan ta nong miglalin si Yaꞌkub bug mga gumbataꞌ in sog bonuwa Misir kobalan nok ponggutom, sugaid og bataꞌ in nok si Yusup dan na song Misir migonong bu kounutan yanin sog bonuwa koyon. Diyon ilon kotanan minatoy song Misir.

Na ok ponupuꞌ nilon miksidakol bu tinawag ilon nog bangsa Israel, poꞌ si Yaꞌkub iningalanan da sop Israel. Pagga og bahasa nilon , tawagon da sop ilon nog bangsa Ibrani. Dangan miobon-obon na, inulipon og bangsa nog bangsa Misir, bu pimatoy ong mga gumbataꞌ nilon nok kolakihan nog bogu bataoy. Sugaid dangan binataꞌ si , sok tabang nok Tuhan, pisolag yanin nog bataꞌ ni nog libun, bu tinonduan yanin nong mga mokokosun dituꞌ. Na ongon og waktu nok sinugutan ni Musa ok koiluganin tow Israel, bu pinatoyin ok tow Misir, doksuꞌ mikopolaguy yanin sog bonuwa Midiyan.

Pogobon mikpotongow ok Pogbayaꞌ-bayaꞌ diyon ni Musa, bu piosun diyanin ong ngalanin. Tubus piangoyin si Nabi Musa song Misir bagun mokposampoy sok Pirꞌawn pasal sok suguan nok Tuhan nok sumboy kumboyonin mawaꞌ ong mga tow Israel. Sugaid daꞌ koleg ok Pirꞌawn. Dadi biyan sok kowasa nok Tuhan, pidatongan ok Pirꞌawn bug mga piktowanin nog balaꞌ sampoy minatoy ong mga gumbataꞌ nilon nog laki lunsan gulang bataꞌ. Ong mikopogawon song mga tow Israel sog waktu koyon, yonin na nog linoklas nilon og duguꞌ nog bilibili song mansing kilid bug tas pintuan nong mga baloy nilon mamaꞌ nok sinuguꞌ dinilon nok Tuhan. Saan na daꞌdun ong minatoy dinilon. Pokpatoy nog bataꞌ ni Pirꞌawn, bangka nin pa kumboyoy mawaꞌ ong mga tow Israel song Misir.

Sok kopanow nilon, ok Tuhan ong miguna dinilon, bu yanin ok sinumugut dinilon saan diꞌ ilon dagon nong mga tow Misir bisan ginonat ilon. Mikopanow ilon song mimala nog lupaꞌ sok titongaꞌ nog dagat. Tibuwa dangan ginonat ilon nong mga kosundaluhan nok Pirꞌawn, mikpoglomos ong mga kosundaluhan koyon.

Pogobon-obon mikodopot ong mga tow Israel sog . Diyon sog Bontud Sinay binogoyan ilon nok sopuluꞌ saraꞌ nok Tuhan bug duma pa mga suguan. Inimung nilon diyon og miunut sok sinuguꞌ dinilon nok Tuhan. Pigoyit-oyit nilon og baloy sutsi koyon ayin-ayin ilon mopanow sog waktu nilon sog ginlupaan mimala sog bon nok pat puluꞌ tahun.

Bung mayan tonduan ita niyu nok Tuhan sok pogbasta ta kini, bu potontulanin ita niyu sog dalan nok posunguꞌ sok surgaꞌ.

 

Wassalam