Kitab
POGAWAꞋ
Ok Koulipon nong mga Tow Israel song Misir
1
Na sog waktu nong miglalin sog bonuwa Misir si Yaꞌkuba,
nok tawagon da sop nog Israel,
migunut diyanin ong mga gumbataꞌ in bug mga mimonugangan diyanin bug mga gapuꞌ in.
Yonin kini ong mga ngalan nong mga gumbataꞌ in nog laki:
2 Siloꞌ Ruben,
Simeon,
Lebi,
Yahudb,
3 Issakar,
Sebulun,
Benhamin,
4 Dan,
Naptali,
Gad,
bu si Aser.
5 Og bataꞌ in nok si Yusupc asal na dituꞌ song Misir.
Kotanan nok ponupuꞌ ni Yaꞌkub nog laki,
mikosaut pitu puluꞌ kotow.d
6 Dangan miniyan na ok tinahunan,
mikpomatoy na siloꞌ Yusup bug kotanan nok koiluganin bu ong mga sinumunud dinilon nok pangkatan.
7 Sugaid ong mga ponupuꞌ nilon nog iningalanan nong mga tow Israel,
mikkodakol ilon,
bu masi-masi pa ilon dumakol,
boyaan mikkopagas ilon tokodoy.
Milokop nilon og bonuwa Misir.
8 Dangan miobone,
ongon og bogu Pirꞌawnf nong miksultan sog bonuwa Misir nog daꞌ pokokosun nok pasal ni Yusup.
9 Miktaluꞌ ok Pirꞌawn koyon song mga piktowanin,
“Tontong niyu ba,
ong mga tow Israel modakol bu mopagas pa ilon tidu dinita.
10 Na sumboy ta ilon akkalan bagun diꞌ ilon dumakol.
Poꞌ bilaꞌ soupama ongon og bunuꞌ,
insunoy lumampiꞌ ilon song mga banta ta momunuꞌ dinita,
bangka ilon awaꞌ sog bonuwa ta.”
11 Dadi mimiliꞌ ilon nong mga mobingis nong mogbobantoy bagun mominasa song mga tow Israel.
Tinogol ilon moginang nong mobogat bu piimung ilon nog duwaꞌ buk siyudad,
yonin na ok Pitom bug Ramsis nog imungon nong mga budiga para sok Pirꞌawn.
12 Tibuwa ilakad sooy ilon binsanaoy,
labi pa tanan pogdodungag og dakol nilon bangka kokanat.
Na miondok ong mga tow Misir song mga tow Israel.
13 Dadi dinungagan pa nilon ok kobingis nilon song mga tow Israel.
14 Linogon tokodoy nilon ong mga tow Israel song mobogat nog ginang.
Piimung nilon nong mga briksg dunut pokpodokotin ong mga tow Israel,
bu piinang da sop nilon sog guma.
Daꞌdun tokodoy og lolat nilon song mga tow Israel.
15 Na ongon og gondow,
pitawag nok Pirꞌawn song Misir og duwaꞌ kotow Ibranih nok pandoy mokpobataꞌ,
yonin na siloꞌ Sipra bug Puwa.
16 Taluꞌ in,
“Bilaꞌ mokpandoy amu sok kolibunan nog bangsa Ibrani,
sokaliꞌ laki og bataꞌ in,
patoy niyu,
sugaid bilaꞌ og libun,
potiyangoy niyu na.”
17 Tibuwa og duwaꞌ kotow pandoy kini,
migogondok ilon sok Tuhan.
Dadi daꞌ ilon tombaꞌ sok suguan ni Pirꞌawn.
Pitiyangan nilon motubuꞌ ong mga gumbataꞌ nog laki.
18 Na pitawag mokpuliꞌ ni Pirꞌawn og duwaꞌ kotow pandoy kituꞌ bangka nin sakoy,
“Manu daꞌ niyu ma inangoy ok suguan ku?
Manu daꞌ niyu da ma patoyoy ong mga gumbataꞌ laki nog bogu bataoy?”
19 Tinumabal og duwaꞌ kotow nok pandoy,
“Ampun,
Pirꞌawn,
ong mga kolibunan nong mga tow Ibrani kolomuhan ilon mogbataꞌ.
Ondaꞌ ilon pogbatuk song mga kolibunan nong mga tow Misir,
dadi migbataꞌ na ilon sog daꞌ ami pa datong.”
20-21 Na pagga migogondok sok Tuhan og duwaꞌ kotow pandoy koyon,
pihatulan ilon nok Tuhan,
bu binogoyanin ilon nok tupuꞌ.
Na pasal song mga tow Israel,
sigi-sigi pa ilon dumakol bu migdodungag ok pagas nilon.
22 Doksuꞌ nituꞌ miksuguꞌ ok Pirꞌawn sok kotanan nok piktowanin,
“Pilak niyu sok subaꞌ ong mga gumbataꞌ laki nong mga tow Israel nog bogu bataoy,
sugaid bilaꞌ og libun,
potiyangan niyu na motubuꞌ.”